|

وقتِ اشاعت :   March 6 – 2016

اے نوں ھچ وڑا چیریں گپے نہ اِنت کہ بلوچستان ءَ حالکاری ءِ عاقبت گوں ماتی (راجی ) زباناں بندوک اِنت ۔ اے جوانیں گپے کہ روتاک آزادی ءَ اے گپ چہ وھد ءَ ساری پہمیتگ البت پیشگی ٹپاس ءُ کتہ کاریانی باپُشت ءَ یک تُرسے ہست اِنت کہ باریں بلوچی تاک پہ وتا وانوکے شوہاز کت کناں یا ناں ؟ بلے اے تُرس بلوچی تاک ءِ پکاری ءُ لوٹ ءِ پُشدر ءَ ھلاس بوت کنت ۔ نوکیں نوبت ءَ بلوچی زبان ءَ پہ وت ءَ ھنچو وانوک ودی کتگ کہ ھپتگے تاکے وانگ ببیت۔ آزادی ءِ اے ساچینک ءِ سفر تیوگیں روتاکے ءِ سفر اِنت بلے کجام ہم سفرے چہ اولی گامگیج ءَ بنا ببیت اے درگت ءَ روتاک آزادی ءَ وتی اولی گامگیج زُرتگ روتاک آزادی زانت ءُ سرپد اِنت کہ اُشتر وتی بار ءَ وت بارت بلے واجہ ءِ جی ءُ جان ءَ لوٹ اِت پمیشکا ساچینک ءِ اے سفر ءَ آئی ءِ ہمراہ ءُ دوزواہ آئی ءِ وانوک ءُ نبشتہ کار اَنت اگاں وانوک ءُ نبشتہ کارانی دلبڈی گوں ساچینک ءَ گون بوت اَنت گڈا اے سفر ءِ بُرّگ گوں شات ءُ شاتکامی ءَ بیت ۔
ساچینک ءِ اولی تاک شمے دیم ءَ اِنت اِشی ءَ را گہتر ءُ جوان تر کنگ ءِ حاترا شمے سرءُ سوج پکار اِنت مئے نزوریانی شون دئیگ ءَ ھچ چک ءُ پد مبیت ھرچ وڑیں سوج ءُ پنتانی دلبڈی کنگ بیت۔

شونکار