|

وقتِ اشاعت :   March 13 – 2016

ساچینک ءِ دومی تاک شمے دیم ءَ اِنت اولی تاک ءِ سرا مارا بازیں دلبڈی یے رستگ کہ پرائی ءَ ما وتی دوزواہ ءُ سنگتانی منّت واریں ۔بے شک ساچینک ءِ منزل ءُ مراد آئی ءِ وانوک ءُ نبشتہ کار اَنت اے درگت ءَ چہ جرمنی ، مسقط ، بحرین ، دبئی ، انگلینڈ ءُ ایرانی بلوچستان ءَ مارا سنگتاں وتی سوج ءُ سلاہ داتگ اَنت ۔ کہ اے مئے راہ ءِ توشگ اَنت ما ھما دراہیں سنگتانی منّت واریں کہ آہاں مارا کلوہ(SMS ) ءُ گوانک ( Call ) کتگ ءُ مئے دلبڈی کتگ ۔ ساچینک ءِ بنکی مول ءُ مراد بلوچی زبانءِ دیمرؤی ءُ بلوچ ھمروچی جیڑھانی گشوار یانی چن ءُ لانچ ءِ نیت ءُ سلاہ ءُ سکین اِنت ۔اے درگت ءَ ساچینک ءِ وس ءَ کہ ھرچی بوت کنت آ پرائی ءَ ساڑی ءُ جاڑیگ اِنت ۔ 21 کرن ءَ دنیا ءَ ھما جیڑھ کہ آھاناں جیڑھ گشگ ءَ مردم ءَ میار کنت بلے بلوچستان ءُ بلوچ اے وھد ءَ مستریں جیڑھ اَنت پمیشکا ساچینک اے جیڑھاں ہم دیم ءَ آرگ ءِ جہد ءَ اِنت تنکہ بلوچ ءِ توار اشکنگ بہ بیت ( تُری گوشدارگ مہ بیت ) ء ُ مھلوک وتی جیڑھانی بنزیاہ ءُ گشواریاں بزانت ۔ اے درگت ءَ ساچینک بلوچستان ءِ گچینیں جیڑھاں دیم ءَ آرگ ءِ حاترا ھمک ھپتگ یک جیڑھے ءِ کش ءُ پہناتاں گرگ ءِ جہد ءَ کنت ۔ اے ھپتگ ءِ جیڑھ گوادر ءَ آپ ئیگ اِنت ۔ گوادر ءَ آپ ءِ جیڑھ سک دیریگین ات بلوچستان ءِ رھشون ءُ جہگیر اے جیڑھ ءِ دیم ءَ بے وس اَنت بلے زانگ بیت کہ اے ھنچکیں مزنیں جیڑھ ءِ نہ اِنت کہ چو پیشدارگ بوھگان اِنت ۔اے لیکہ چنچو تچک اِنت گشگ نہ بیت ، بائدیں وانوک ءُ نبشتہ کار وتی لیکھاں دیم ءَ بیار اَنت۔ اگاں بازیں مردمانی رِدا مکران ءَ دو ترمپ ءِ رچگ ءَ پد آپ ءِ جیڑھ ھلاس بوتگ بلے اے گشواری اداروکی اِنت بلوچستان ءِ ہستیں سرکار ءُ بلوچ پارلیمانی راج دوست ایشی ءِ دائمی ایں گشوارے بشوہاز اَنت ۔ دومی ساچینک ءِ آؤکیں تاک سی پیک ( گوادر کاشغر کوریڈور ) ءِ سرا بیت وانوک ءُ نبشتہ کار وتی لیکہ ءُ نکاناں پہ ھمے بنگپ ءَ پما روان بدئنت ۔ منّت وار۔
شونکار
azadibalochi@gmail.com