|

وقتِ اشاعت :   March 13 – 2016

کمپیوٹر چہ یونانی زبان ءِ گال کمپیوٹ ءَ دراتکگ کہ ایشی ءِ بنداتی بزانت ھساب کنگ اِنت۔
کمپیوٹر یک انچیں مشین یا الیکٹرانک کاربوج یے (آلہ ) کہ ایشی ءِ تہ ءَ ھساب ءُ شمارءَ ابید ھررنگیں سرپدی (معلومات)مُچ کنگ بنت ءُ زلورت ءِ وھد ءَ اے سرپدی اسکرین یا کاگد ءِ سرءَ چاپ کنگ بنت۔
سرپدی ءِ کمپیوٹر ءِ تہ ءَ مان گیجگ ءِ کارءَ کمپیوٹر ءِ زبان ءَ اِن پُٹ (مان گیجگ) گوشنت ۔
کمپیوٹر اے سرپدیءَ یک پروگرامنگ پروسیس یا ٹہینتگیں مراگش ءِ وسیلاءَ گوازینان کنت ءُ وتی یادداشت ءَ یا دل ءَ مچ کنت۔
اے پروگرامنگ پراسس ھما برنامہ یا مراگش انت کہ کمپیوٹر ءِ مجگ ءَ چہ پیسرا ایر کنگ بوتگ انت ءُ نوں کمپیوٹراے پرماناں وانان کنت ءُُ وتی کارءَ دیم ءَ بران کنت۔
وھدے مالومداری( معلومات)، برنامہ یا مراگش ءِ ھساب ءَ روان کنت ء ُ آسر ءَ اسکرین یا کاگد ءِ سرا چاپ کنت، کمپیوٹر ءِ زبان ءَ اے کار ءَ آؤٹ پُٹ (ڈنّ گیجگ)گوشنت ۔
بزاں کمپیوٹر ءِ سادھیں کارپیسرا اِن پُٹ زورگ اِنت پدءَ گوں پروسس ءَ چیزے کار کنگ انت رندءَ ایشانی آؤٹ پُٹ دئیگ انت۔
INPUT . . . . . PROCESS .. . . . . OUTPUT
سرپدی ءِ جند کمپیوٹر ءِ زبان ءَ ڈیٹا گوشگ بیت۔ کمپیوٹر ءِ یاداشت آئی ءِ میموری گوشگ بیت ءُ دل آئی ءِ ھارڈ ڈسک گوشگ بیت۔
Data 236 سرپدی
Memory 236 یاداشت ( ھوش )
HardDisk 236 دل
وکتاں پہ ھندسہ ءِ ھساب کنگ ءَ ھما کاربوج یا آلہ کارمرز کنگ بوتگ آئی ءِ نام کیلکولیٹر یا ھساب کشّ گوشگ بوتگ ۔ انگت ھم بازیں جاھاں پہ گونڈیں ھساب کتاب ءَ ھمے ھساب کشّ یا کیلکولیٹر ءَ کارمرز کن انت۔

calulator
ھساب کشّ ءُ کمپوٹر ءِ میان ءَ مستریں تپاوت ایش اِنت کہ ھساب کشّ یا کیلکولیٹر سادھیں نمبراں شمار کنت ءُ ھما دمان ءَ آسر یا نتیجہ ءَ دیم ءَ کارایت بلے کسے بُلوٹیت کہ اے سرپدی مارا سالے ءَ رند ھم گوں مروچیگیں تاریخ یا رمس ءَ دست بہ کپیت ءُ ما چہ آئی ءَ دگہ پیچیدائیں ھسابے ھم بہ گیشین ایں گُڑا چوش بوت نہ کنت۔
کمپیوٹر ءِ کاربوج اول سرءَ ایوکا پہ گران ءُ پیچیدئیں ھساب ءُُ شمارءِ گیشینگ ءَ کارمرز بوتگ بلے کم کم ءَ آئی ءِ کار چہ ھساب ءُ شمارءَ دیم ءَ روان بوتگ ءُ مروچی دنیا ءَ چوشیں کارے پش نہ کپتگ کہ بے کمپیوٹرءِ کمک ءَ دیم ءَ برگ ببیت ۔
اگں ما وتی چماں چپ ءُُ چاگرد ءَ شانک بہ دئیں ھمے گنداِیں کہ یک نیمگے ءَ بینک ءِ سرجمیں ھساب ءُ شمارہ کمپیوٹر ءِ چمدار اَنت ءُ دومی نیمگ ءَ نادراھجاھانی سرجمیں کار، تُری نادراھانی کارت (کارڈ ) کشّگ بِبیت یا کہ زرّانی دئیگ ، ایکس رے ءِ مشین بِبیت کہ الٹرا ساؤنڈ ءِ مشین ، مجگ ءِ اسکیننگ ڈیوائس بِبیت یا پیچیدئیں دل ءِ بُربرین ، سرجمیں کار یک نہ یک وڑے ءَ کمپیوٹر ءِ چمدار اَنت۔
پاکستان ءِ رنگیں ملک کہ ایشی ءِ مَھلوک دنیا ءِ بزگتریں مَھلوکانی رِدءَ شمار بنت ادا ھم تجارت، رسانک ، بیمہ ءُ دگہ بازیں کارانی دیم ءَ بروک ھمے کمپیوٹرے ۔ پمشکا اے ملک ءَ ھم کمپیوٹر ءِ پڑ روچ پہ روچ دیمروئی کنان اِنت ۔ ھمے سوب انت کہ مزنیں شہرانی بنداتی وانگ جاہاں( پرائمری اسکولاں) ھم کمپیوٹر ءِ درس وانینگ بئیگ ءَ انت۔ بلے مئے بلوچستان ءِ گیشتریں ڈیھ چہ اے آسراتیاں انگت زبہر انت پمشکا ڈیھ ءِ نودربر چہ دنیا ءَ انگت سک پُشت ءَ اَنت ۔
اے سرھال ءِ بنگیج کنگ ءِ بُنکی مول ءُ مراد ھمیش اِنت کہ ما وتی ھما وانوکاں کہ اے ساھت ءَ بلوچستان ءِ کسانیں دمگاں جاہ مہ نند انت ءُ سرپد نہ انت کہ کمپیوٹر چے بلاہ یے ءُ آھانی دل ءَ گالانی ٹک جنوک (ٹائپیسٹ) ءُ کمپیوٹر ءِ زانتکار یا کہ اُگدہ ءِ مردم انت، آھاں سرپدی دئیگ انت کہ کمپیوٹر چی یے ، آئی ءِ کارمرزی کجام جاھاں بیت، کجام تب ءِ نودربر کمپیوٹر ءِ پڑ ءَ اتک کن انت ، کمپیوٹر ءِ کم مُدتی وانگ یا شارٹ کورسز کجام کجام انت ءُ اے شارٹ کورسز کجانگو کاردئینت۔ پہ کمپیوٹر ءِ پروفیشنل وانگ ءَ اکیڈمک وانگ چے بئیگ لوٹیت۔ چہ نیٹ ءَ کمپیوٹر ءِ درس چون زورگ بیت ءُُ پروفیشنل سرٹیفیکیشنز یا سند زورگ چی یے ۔
انچش کہ من بُرز ءَ گوشت کہ کمپیوٹر یک انچیں الیکٹرانک مشینے کہ آئیءِ سرا سرپدی ریکارڈ بنت پدا یک کاریچے یے (پراسیس ) وسیلہ ءَ آ کمپیوٹر ءِ دل ءَ محفوظ بنت یا کہ اسکرین ءُ پرنٹر ءِ سرا چاپ بنت۔
اگاں ما کمپیوٹر ءِ زائری ءُ سربُری جوڑشت یا ساخت ءَ بچاریں ھمے گندیں کہ مئے دیم ءَ یک ٹی وی ءِ رنگیں کوکایے ایر انت کہ ما مونیٹر ءِے گوشیں، ٹائپ رائیٹر یا کلیتگ ءِ رنگیں تختہ یے ایر انت کہ ما آئی ءَ کی بورڈ گوشیں ءُ یک دگہ ڈبّہ یے دیم ءَ کئیت کہ ما آئی ءَ سی پی یو گوشیں کہ بن اسلا ھمے کمپوٹر ءِ مجگ اِنت۔
اگاں بچاریں کمپیوٹر ءِ سادگ تریں دروشم ھمیش اِنت۔ بزاں کی بورڈ (کلیتگ) ، مونیٹر، سی پی یو۔
چہ کی بورڈ ءَ ما ٹائپ کنیں ءُ سرپدی ءَ کمپیوٹر ءَ مان دئیں۔ کمپیوٹر ءِ سی۔ پی ۔ یو، چہ وتی مجگ ءَ کاربندایت ءُ وتی یاداشت ءَ ایریں برنامہ یا مراگش ءَ وانان کنت ءُ داتگیں پرمانے ھساب ءَ کارءَ کنان کنت ءُ پدءَ مونیٹر ءِ اسکرین ءِ سرا اے سرپدی ( معلومات )ءَ ھما دروشم ءَ کہ ما گندگ لوٹیں پیش داران کنت۔
کی بورڈ یا کلیتگ ادا اِن پُٹ ڈیوائس انت بزاں مالومداری مان گیجگ ءِ آلہ یا کاربوج ءُُ مونیٹر اِدا آؤٹ پُٹ ڈیوائس اِنت بزاں مالومداری ءِ چہ کمپیوٹر ءِ یاداشت ءُ دل ءَ ڈن کشگ ءِ کاربوج۔
کمپیوٹر وھدے چہ وتی سادھیں دروشم ءَ دیمروئی کنان پیچیدھیں دروشم ءَ سربیت ما گندیں کہ ان پٹ ڈیوائس ایوکا کی بورڈ نہ اِنت بلکیں گوں کی بورڈ ءَ ماؤس (مُشک ) ءِ بئیگ ھم المی چیزے ۔ اے مشک آ مشک نہ انت کہ مئے لوگاں سل کنت اشی ءِ نام مشک پمشکا ایر انت کہ اے کاربوج یا آلہ ءِ دروشم مشک ءِ وڑا انت۔
ھمے رنگہ پہ آؤٹ پُٹ ءَ ایوکا مونیٹر کارمرز نہ بیت بلکیں ما پرنٹر ءَ ھم پہ اے کارئیگی کارمرز کنیں۔ (برجاہ)