|

وقتِ اشاعت :   April 16 – 2016

صوبائی وزیر اعلیٰ نواب ثنا اُﷲ ءَ کمانڈر سدرن کمانڈ ءُ چیف سیکریٹری ءِ ہمراہی ءَ پسنی دِکّہ ءُ مول ءِ تر ءُ تاب کت ءُ اودے مردماناں حال دات کہ پسنی ءِ دِکہّ ءِ کار سرجم بوتگ ءُ پسنی ءِ ھَندی ماھیگیر چہ دِکہ ءُ مول ءِ آسراتیاں نپ ءُ سیت گرگان اَنت ۔پسنی دِکہّ ٹھیکدارانی شر جوڑ نہ کنگ ءِ سوب ءَ بے کار بوتگ اَت کہ لہتیں وہدے کار ءَ پد دِکہّ ریکاں گپتگ ءُ ماھیگیرانی کار داشتگ کہ پد ءَ سپا کنگ نہ بوتگ۔ گوْ ستگیں وزیر اعلیٰ ءِ دور ءَ پسنی ءِ مہلوک ءَ باز واہ ءُ پریات کت بلے وزیر اعلیٰ ءَ گوش نداشت نوکیں وزیر اعلیٰ ءِ اے گامگیج ءَ پسنی ءِ دِکہّ یک برے پد ءَ کاریگی کتگ ۔ بندرءَ پسنی ءِ ریکاں دِکہّ چاریں نیمگ ءَ گپتگ اَت کہ چر آئی ءِ سوب ءَ یکدار ءُ لانچ دِکہّ ءِ کش ءُ گوْ را آتک ءُ اوشتات نہ بوت اَنت۔ایشی ءِ سوب ءَ دِکہّ ءِ کار بند کنگ بوت ءُ گوْ ستگیں دَہ سالاں اے دِکہّ کاریگی نہ بوتگ۔بندر ءَ دِکہّ ءِ کار نواب اکبر خان بُگٹی ءِ حکومت ءِ دور ءَ بوتگ اَت انوگیں حکومت ءَ ایشی ءِ سپائی ءِ کار ءِ حاترا چہ درائیں دنیا ءَ کَلّانہیں ءُ ریپکاریں مردم لوٹ اِت ءُ آؤرت اَنت تنکہ اے پسنی ءِ دِکہّ دو وار وتی کار ءَ بِنا بکنت ۔ اے پہ نوکیں وزیر اعلیٰ ءُ پہ پسنی ءِ مہلوک ءَ نیکیں پالے پہ حکومت ءَ اے حاترا کہ حکومت ءَ پہ بازیں جکانسریاں پداے دِکہّ کاریگی کت پَدّر اِنت کہ ایشی ءِ تہا دِکہّ منیجنگ ڈائریکٹر ءُ سیکریٹری فشریز ءِ ہم مزنیں دستے ھوار اِنت ۔ پسنی ءِ مہلوک ءِ حاترا اے حاترا کہ نوں 2400 ماھیگیر دِکہّ ءِ مزنیں ھال (Hall ) ءِ تہا وتی بیپاری کاراں برجم داشت کن اَنت۔اے وڑا اے د مگ ءِ مردماں بیپار ءِ جوانیں آسراتی رَست کن اَنت۔فشریز ءِ سیکریٹری ءِ گُشگ اَت کہ کم چہ کم یازدہ فریزنگ پلانٹ ءُ سرد جاہ جوڑ کنگ بوتگ اَنت کہ ھَندی ماھیگیرانی ماھیگاں گَہَگ ءَ نیل اَنت ۔ اے وہد ءَ د مگ ءَ دو رنگ ءِ بیپاری مردم کارءَ اَنت یکے کراچی ءِ کمپنی انت وہدے کہ دومیانی سیادی گوں مزن ھور ءَ اِنت کہ آئی ءِ تہا مسقط ، دبئی ، ایران ءُ ایندگہ مُلکانی بیپاری ھوار اَنت۔دوھیں گروپ ماھیگاں چہ ھَندی ماھیگیراں زُور اَنت ءُ پد ا وتی کمپنیاں دیم دئینت کہ چہ اودا اے ماھیگ دوریں روکپت جاپان ءُ زِرباری کوریا ءَ دیم دئیگ بنت اے راج چہ دنیا ءِ درائیں راجاں گیشتر ماھیگی وردن کارمرز کن اَنت ۔ فشریز ڈیپارٹمنٹ ءِ کارِندہ گوں سیکریٹری ارشد بُگٹی ءِ ہمراہی ءَ اے درچ ءَ سک باز ھذمت کنگان اَنت کہ آہانی جہدانی برکت ءَ اے کاردیم ءَ رؤگان اِنت ۔ دومی دست ءَ پسنی دِکہّ ءِ جوڑ بوھگ پہ مُلک ءِ مالی دیمروئی ءَ ہم باز کُمککار بوت کنت۔فشریز ڈیپارٹمنٹ ءِ جہد پہ مُلک ءِ ایندگہ بہرگانی حاترا ہم یک شونے کہ آ ہم مُلک ءِ مالی دیمروئی ءِ حاترا ھنچو کار بکن اَنت ۔ پسنی دِکہّ ءِ جوڑ بوھگ ءَ 2400 ماھیگیرانی روزگ ءِ رَسگ صوبہ ءِ مالی دیمروئی ءِ حاترا جوانیں گامگیجے ۔ نوں بائدیں صوبائی حکومت ماھیگیرانی آسراتی ءِ حاترا لون ءُ ایندگہ ازبابانی دئیگ ءِ جار ءَ بِپرّین اِیت ۔ اے درگت ءَ وزیر اعلیٰ نواب ثنا اُﷲ زہری جوانیں گامگیجے زُرت کنت کہ آہانی تہا یکے ایش اِنت کہ پسنی ءَ ریک ءِ توپان باز کیت بائدیں ایشی ءِ دارگ ءِ حاترا پیشیگی گامگیجے زُورگ بہ بیت اگاں ناں دِکہّ پدا بند بوھگ ءِ گُمان ہست اِنت۔