|

وقتِ اشاعت :   April 16 – 2016

دگنیا ءِ توک ءَ چونیں راجے بہ بیت آ ئی ءِ وتی دود ءُ ربیدگ ءُ وتی بولی بنت آہانی وتی نبشتہ کنگ ءِ رھبند (حروفِ تہجی ) بنت ۔چونیں راجے بہ بیت آہانی و اھگ ھمے بیت کہ مہلوک وتی زبان ءَ در بہ بر اَنت ءُ وتی زبان ءَ گپ بجن اَنت مئے دود ءُ ربیدگ ءَ وتی بکن اَنت۔اے وڑیں راجانی زبان زانت نند اَنت ءُ وتی زبان ءِ ساھگ (رسم اُلخط ) ءَ پہ آب گیشن انت انچیں’’ آب‘‘ زیر اَنت کہ آوانی ادائیگی سبک بہ بنت ھمک مردم وانت ءُ نبشتہ کرت بکن اَنت وتی زبان ءَ گپ جنگ ءَ پہر بند اَنت دری ڈیھاں رؤاَنت وتی پُچ ءُ پوشاکاں گوں رؤ اَنت دری ڈیھانی کانوداں مَنّ اَنت۔ عرب ، انگریز ، فارسی ، چینی دگہ ہر کجا رؤ اَنت وتی زبان ءَ ھبر کن اَنت ما ہر کجا رواں دگرءِ زبان ءَ ھیل کنگ ءُ ھبر کنگ ءِ جہد ءَ کنیں مئے مہلوک پوریات کنگ ءَ دبئی ، سعودی ءَ رؤ اَنت پدا کائینت بدل بنت گپ گپ ءَ عربی لبز کارمرز کن اَنت ۔ مئے راجی سروک وت ءَ راجی سروک گُش اَنت در مُلک ءَ رؤ اَنت پینٹ ءُ پتلون گوْ را کن اَنت واتر کائینت انگریزی لبز کارمرز کن اَنت مھلوک ءَ گوں نند اَنت وت ءَ بلوچ روایتانی امین گُش اَنت مہلوک ءَ روایتانی درس ءَ دئینت ۔ما وتارا تیوگا بلوچ پرچہ نکنیں؟ما نا وانندھاں ، بلوچ راج ءِ تہا وانندھیں مردم نیست کس ءَ درس گاھاں وانتگ ، نقل کرتگ ءُ ڈگری گپتگ اَنت ، نئے وانگ زان اَنت نئے کہ نبشتہ کنگ، پارلیمنٹ ءَ چینکس مردم رؤ اَنت ؟سد درسد بگشاں رَد نباں وانگ ءُ نبشتہ کنگ ءَ نزان اَنت آ کہ وانگ ءُ نبشتہ کنگ زان اَنت آپارلیمنٹ ءَ شُت کُرت نکن اَنت ۔اے کہ پارلیمنٹ ءَ رؤ اَنت نئے کہ راجے دوست اَنت نئے زبان دوست اَنت ایشاں پہ وتی راج ءُ زبان ءَ چے کرتگ ؟ کجاماں گوں وتی زبان ءَ مہر ءُ دوستی است ؟دل اِش لوٹ ایت مئے ماتی زبان اسکولاں وانینگ بہ بیت آ بیچارگ اسمبلیاں سر بوت نکن اَنت ،آ کہ اسمبلیاں رؤ اَنت آواناں گوں وتی ماتی زبان ءَ گوں مہر ءُ دوستی نیست ، آ وتی ماتی زبان ءَ کم گپ جن اَنت ۔بلوچ بہ بنت یا پشتون قوم پرست بہ بنت یا مذہب پرست یا جمہوریت پسندبہ بنت ایشاناں گوں وتی ماتی زباناں مہر نیست !ہاں آوانی پگر ھمیش اِنت کہ ما بِکٹّاں وزیر ءُ گزیر بباں ، وزیرِ اعلیٰ بباںءُ بگشاں مئے برات پیادگ گردنت۔ مردم شماری ءِ حق ءُ مخالفت ءَ زھرشانی کن اَنت ، دھاندلی ءِ ھلاپ ءَ احتجاج بیت بلے وت پدا گوں ہمیشاں ھوار اَنت ما ندیستگ کہ ایشاں زھرشانی کرتگ کہ سکولاں بلوچی ءُ براہوئی ءُ پشتو وانینگ بہ بیت اگاں اسکولاں ماتی زباناں وانینگ نہ بیت ماں اسمبلیاں دَز کَشّ باں ۔ اسکولاں اولی تَبّک ءَ ماتی زباناں وانینگ بوھگ ءَ اِنت اے گپ گیشینگ نہ بوتگ بلوچی ءُ براہوئی زبان ءِ آب ( حروفِ تہجی ) چینکس اَنت ما ندیستگ تیوگیں زبانانی آب یک کَچ بوتگ اَنت بلوچی ءُ براہوئی ءِ توک ءَ ھما آب کارمرز بوھگ ءَ اِنت کہ آ اُردو ءَ کارمرز کنگ بوھگ ءَ اِنت ۔اُردو وت یک زبانے نہ اِنت چونیں زبان ءِ بہ بیت آئی ءِ وتی لوز بنت، آئی ءِ وتی راجے بیت ، ءُ آئی ءِ وتی دود ءُ ربیدگ بنت ۔ اُردو ڈکشنری ءَ پَچ بکناں ، نبشتہ اِنت اے لوز ( لفظ ) پِلاں زبان ئیگ اِنت ۔ھندی ، عربی ، فارسی ، انگریزی ، یونانی ، بنگالی ، تُرکی ، جرمن ءُ دگہ زبان ئیگ اَنت ۔ من چشیں لوزے ندیستگ کہ نبشتہ کنوک اِنت اے اُردو ءِ جِند ءِ لوزے ۔ اُردو زبانے نہ بوتگ پہ زبردستی زبانے جوڑکنگ بوتگ ۔ اُردو ءِ حروف تہجیانی توک ءَ انچیں حرف است ھمک مردم آوانی پَرک ءَ کَشّگ کُرت نہ کنت دَرور ، ث ، س ، ص ، ح ، ھ ، ع ، ا ، ت ، ط ، ض ، ظ ، ق، ۔ کالج ءُ یونیورسٹیانی دربروک اے آبانی پَرکاں کَش اِت کُرت نکناں ۔ صمد چہ ث ءَ ، ص ءَ ، س ءَ نبشتہ بکن صمد بیت ، ثابت چہ کجام آب ءَ نبشتہ کنے ثابت بیت ، حلوہ ءَ کجام آبءَ نبشتہ بکن حلوہ بیت ؟ھمک مردم ءِ کارے نہ اِنت آہانی تپاوت ءَ کَشّ اِت کُرت بکنت۔ بژن ءِ گپ ایش اِنت کہ مئے پروفیسراں قاعدہ رِد بند داتگ اَنت آ وت مَنّ اَنت کہ پِلاں آب بلوچی ءُ براہوئی آبے نہ اِنت پدا ھم قاعدہ ءِ توک ءَ کارمرز کنگ بوتگ ۔ پرچہ۔۔۔ ؟ زانو گر گُش اَنت اگاں یک ماڑی یےءِ بُن ہِشت چوٹ ھیر کنگ بہ بیت آ ماڑی سرجم نہ بیت یا چوٹ بیت ۔بلوچی بُنگیجی ءِ توک ءَ یازدہ آب دئیگ بوتگ اے بلوچی ءِ آب نہ انت ۔ براہوئی قاعدہ ءِ توکءَ دہ آب دئیگ بوتگ اے براہوئی آب نہ اِنت ۔ براہوئی ءِ تہا ھما آب ہست اَنت آ ایش اَنت ث ، ح ، ذ ، ص ، ض ، ط ، ظ ، ع ، فءُ ق ۔ براہوئی ءِ توک ءَ چشیں لوزے نیست کہ چمئے آباں چہ بنا بہ بیت ۔ بلوچی ءِ تہا ث ، ح ، خ ، ص، ض ، ط ، ظ ، ع ، غ ، ف ءُ ق ۔ چمئے آباں ھچ چُشیں لوزئے نیست کہ بلوچی ءَ بنا بہ بیت ۔ما اگاں اولی جماعت ءِ قاعدہ یے جوڑ کُرت نکنیں دیم ءَ آ دگہ جماعتانی کتاباں چوں جوڑ کُرت کنیں ؟ اے کتاباں ما گنداں بلوچستان ءِ توک ءَ وانندھیں مردم باز کم اِنت ۔ اقوامِ مُتحّدہ ءِ چارٹر ءَ نبشتہ اِنت کہ کجام مردم ءَ وتی ماتی زبان ءَ وانگ ءُ نبشتہ کنگ نزانت آ تعلیمی تناسب ءَ شمار بوت نکنت ۔ اقوامِ مُتحّدہ ءِ چارٹر ءِ رِدا انوں وانوکیں مردم پہ چم ءِ دارُو ءَ نہ گوْ اہیت ۔ پگر کنگ لوٹیت کہ زبانانی نیمگ ءَ دلگوش گوْ ر کنگ لوٹیت ۔بائیدگ اِنت کہ مئے سیاست دان ، پارلیمنٹ ءِ توک ءَ نندوک چہ واب ءَ پاد بیا اَنت ۔ وتی زبان ءَ میرٹ ءُ ایمرجنسی ءِ دروگیں پُتّاریان ءُ مہلوک ءِ رپینگ ءَ یلہ بدئینت اگاں ما ھچی نہ کُرت گڑا باندا اے زبانانی نبشتہ کنوکیں مردم گار بنت ۔ وہدے ما گپ کنیں ہپتاد در سد دری زبانانی لوز کارمرز کنیں وتی زبانانی ایوک ءَ راھبند (گرائمر ) ءَ کارمرز بکناں۔( نوں گرائمر ہم بدل کنگ بوھگان اِنت کہ زبان نہ اُوشتیت بدل بیت) ۔ بولان چینل ءُ وش نیوز ءَ مئے بلوچ گپ جن اَنت مئے پیریں مردم مارا جست کن اَنت کہ اے کجام زبان ءَ گپ جنگ ءَ اِنت ؟ بیا اِت دو مارچ ءَ گوں وتی دود ءُ ربیدگ ءَ ہور زبان ءِ روچ ہوں ھیر کنیں ءُ آ روچ ءَ وتی زبانانی ذگریں لوزاں ابید دگہ ھچ لوز کارمرز نکناں !