|

وقتِ اشاعت :   April 24 – 2016

گُل خان ءَ دراجیں(پارسنگ) ءِ(بحرانی ) سرا ھم کار کُتگ بلے گیشترتجربگ کسان ءُُ درمیانائیں پارسنگ ءِ سرا کُتگ ۔ پہ درور : دَر بہ کپیت آپتاب گرم چو آس ءِ زراب سُہر چو سُہریں گُلاب زندہ بِبیت انکلاب یا پادا کہ وتن بُن گپت تئی پُلیں چمن بُن گپت تئی کوہ ءُُ دمن بُن گپت پادا او گِھیں ورنا! یا کدم کدم رواں بہ بئیت دلیر ءُُ پہلواں بہ بئیت پہ شانِ مادر ءِ وتن فدا گوں مال ءُُ جاں بہ بئیت پہ نام ءُُ ننگ ءُُ آبرو سراں وتی دیاں بہ بئیت پہ کٹ ءُُ سوب ءِ منزل ءَ کدم، کدم رواں بہ بئیت یا جہان ءَ ھبر گوں نزوری نہ بیت اِدا زندگی گوں لگوری نہ بیت نزورانی ھکّ ءَ نہ منّیت کسّ گوں زورآوراں دپ ٹکوری نہ بیت ھبر پدّرا اِنت روچ ءِ مسال گوں گُرک ءُ پس ءِ یجّہ ھُوری نہ بیت پہ ہرگام دامے، پہ ہر راہ ءَ کھڈ رؤگ مں جہان ءَ ، پہ کُوری نہ بیت یا بیلاں! بیلاں! دَرکپ ئے دیما، تْرنب ءُُ توار اِنت جنگانی ریھتگ انت دُژمن میتگ ءُُ ہلکاں ، لجّ ءُُ میار اِنت ننگانی مرچی مچارئے موسم ءُُ وھد ءَ ، سنج ءُُ سلاھاں نز آرِئے جیڑواں براتی ، بِلّ ئے مروچی دَنزاں بچارئے جنگانی ھمے رنگ ءَ گُل خان ءَ مردّف غزل ءَ ابید غیر مردّف غزل ھم نبشتہ کُتگ ۔ پہ دَرور اے مردف ءُ غیر مردف غزلانی لہتے بنداں بچارئے: پہ وَت ءَ زندے ہلکاپیں تلبدار مناں اے گناھے اگاں، بند بند ءَ گنہگار مناں سرمچاراں پہ وتی ساہ ءَ من ءَ تُرس نہ انت زندءِ ھکانی تلبدار ءُُ نگہدار مناں گھیرت ءُ لج ءُُ مڑا ، توکل ءُُ سس ءِ سورت دل ءَ ھر کُنگر ءِ ، ماں میتگ ءُُ بازار مناں ربّ ءِ منکر من نَیاں، نئے چہ نبی ءَ پاکیں کوم ءِ دلبند ءُُ وتن مات ءِ پرستار مناں منی سنگت ، منی ھمراز ءُُ ھمدل نہ بیت ھچّی وڑ ءُُ داب ءَ گو حاسل تہاریں شپ، گروک ءُُ گرند ءُُ توپان دراجیں راہ ءُُ دیریں پند ءُُ منزل نہ بیتہ چو کسے ، نئے بیت دیما جہان ءَ مئے وڑیں نابود ءُُ جاہل وتی ملک ءِ تہ ءَ پردیس ءُُ بے نان وتی لوگ ءِ تہ ءَ مئے ھک انت باتل ہندوستان ءِ نامداریں شاعرءُُ کواسیں نَدکار سرور عالم راز سرورؔ وتی نبشتانک ’’ فیض کی شاعری ‘‘ ءَ بیان کنان گوشیت کہ شائری ءَ تہ ءَ گالانی تکراربرے برے شئیرءِ زیبائی ءُُ معنویت ءَ گیمرینیت بلے اُستادیں شاعرانی گورا انچیں تیکینک الّما بنت کہ آ چہ گالانی تکرار ءَ وتی شئیر ءِ کدّ ءُُ بالاد ءَ مزن بہ کن انت۔ ‘‘ گُل خان نصیر ؔ ءِ بازیں پربندانی تہ ءَ ماراگالانی تکرار گندگ ءَ کَیت بلے بید چَہ لہتے پربنداں گیشتریں پربندانی تہ ءَ گالانی تکرار موسیقیت پیدا کنگ ءَ انت پہ درور : منی وتن یک پچیں دیارے منی وتن دشت ءُُ کوہسار ے منی وتن کیچگ ءُُ تیابے منی وتن پَٹ ءُُ ریگزارمنی وتن ھرچے است منیگ انت یا وتن وتن ، منی وتن بہشت ءُُ زندگی وتن گُل خان ءِ شاعری ءِ تہءَ مارا زگریں بلوچی ءَ ابید براہوئی ، فارسی ءُ اردو ءِ گالانی کارمرزی ھم گندگ کئیت۔ ’’ آئی ءَ مکرانی گالوار ءَ ابید رخشانی ءُ سلیمانی گالوار ھم کارمرز کُتگ۔ ‘‘ گُل خان ءِ کلیات ءِ تپاسگ ءَ ماراقافیہ یا پیشرد انی مزنیں کساسے دست کپیت کہ پہ نودربراں مزنیں کمک اِنت ۔ پہ درور: توار، سحار، تہار، دیار، شُمار، بہار، تلار، اوار، کہار، ڈگار، چنار، کشار، کٹار، گُبار، پتار، مزار، سگار، لوار ، ودار، مہار، ستار، مدار، بشار، گہار، سمار، زکھار۔۔۔ بار، وار، کار ، آر، یار، سار، جار، دار، شار، زار۔ ۔ ۔ تاری، واری ، زاری ، باری ،جاری ، ساری، گاری ، نہاری، کچاری، تیاری ، کاری ، مداری ، کتاری ، کٹاری، گہاری ، مزاری، اواری ، معیاری۔۔۔ نوش، پوش، پروش، ہوش، چوش، گوش، کوش،جوش،روش،موش،کھروش،ہمروش،گُلپوش، تروش، شموش، گروش، اگھوش۔۔۔ زبان ، گمان ، تچان، جہان، ترپان۔۔۔ جبین ، حسین، زمین ، جنین، مشین، زمین ءُُ دگہ بازیں گُل خان ءَ شئری زلورت ءِ ھساب ءَ چہ دری زباناں ھم سک باز کُمک زرتگ بلے کُل آئی ءِ وتیگ ءَ گیشتر چَہ براہوئی ءَ زٗرتگ ۔ میر گُل خان نصیرؔ ءِ شائری چہَر ءُُ شُبین ءِ مڈی اَنت۔ آئی ءَ وتی شاعری ءِ تہءَ چیدگ بزاں علامات کارمرزگ ءِ ھم کامیابیں تجربہ کُتگ چوش کہ بولان ، آہوئے صحرائی ، کوکو ، کپوت، ماہ ، استار، کلکشان ، شاتل ، زِر، چَول ، گرند ، گِروک ، ھانی ، شہہ مرید، زندان ، قاتل ، پاہو ، ساقی ، شراب ءُُ دگہ بازیں۔ من ءَ سھب ءِ سمین چَہ کوہساراں گوں نرمیں آہ سرداں کنت بیَدار شلیت ءُ ھم شَلینیت شبنمی ءَ سمین، دٗوریں دل ءِ روپیت زَنگار چو ھون سُھریں تلار ءَ آزگیں دل نہ چنڈیت چہ مُجیں زُلمانی یلگار زمین چنڈ ءُ گروک، گرئنداں بہ پیچیت نہ لرزنت دست ءُُ مئے سیاھیں دل ءِ تار وتن مات ءِ ماں جیگ ءَ ننگریں بچ ترپنت چو جلوہ ناکیں بامی استار روچ آسیت ، بلے دیر نہ بنت ، دہنز شپ ءِ چاردھی ماہ، چو جنوزانیں کج ءَ ، برباد انت شپ کپیت زُوم وسیاہمار بنت ہارودیں زہیر سُھب بامیت ، سَمین ءِ گوں دل ءَ بیداد اِنت گُل خان ءِ ءِ درشان داب یا اسلوب چَہ وتی عہد ءِ سرجمیں شائراں پہکا جتا اِنت ۔ آئی ءِ شئیری اِزم ءِ تہءَ جمالیاتی ءُُ زیبائی ءِ سِنچ ءُ مارشت ھم گندگ کئیت ءُ مقصدیت ھم۔ آئی ءِ شاعری ھُشکیں پُتّاری نہ اِنت بلکیں آئی ءِ جند ءِ شخصیت ءُُ کردءِ آدینک انت۔ ’’ ڈیوا‘‘، ’’بیا او مرید‘‘، ’’دل ءِ چماں گوں بچار‘‘، ’’ترا نود بیاراَنت‘‘، ’’مھگل‘‘ ، ’’ زہیر نالی گوشیت ‘‘، ’’اُشتر ‘‘ ، ’’ بلُّک‘‘ ، ’’ اومان ‘‘ ، ’’ تَوئے ‘‘، ’’چمانی ٹپ ‘‘، ’’من ءَ زہیر بیتگ ‘‘، ’’ بیا او مہپری‘‘ ، ’’بے علمیں جنک‘‘، ’’ منی ساہ ‘‘ ، ’’واب ءَ دیستگ‘‘، ’’ زندگی چم جنت ‘‘ ، ’’ زندگی ‘‘ ، ’’ مہر نزاناں‘‘، ’’ آس زہیرانی ‘‘، ’’گوہر ترپیں استار‘‘ ، ’’دیدار تئی بیتگ‘‘، ’’نئے پہ گرانُک ءَ‘‘ ءُُ دگہ بازیں انچیں پربند انت کہ مارا ازم ءِ تہ ءَ جمالیاتی ءُ زیبائی ھواری ءَ گندگ کاینت۔ شہید پروفیسر صبادشتیاری وتی پٹ ءُُ پولی نبشتانکانی گیچین دپتر ’’انگریں واھگ‘‘ ءِ تاکدیم ۹۹ ءَ بہ گرتاں ۱۰۶ ءَ ’’گُل خان نصیر ‘‘ ءِ ازم ءِ سرا گپ جنان گوشیت : ’’ گوں واجہ گُل خان نصیرؔ ءَ مئے مستریں زوراکی ءُ ناانصافی اے بوتگ کہ آئی ءِ شاعری ءِ ڈیل ءُ بالاد ءَ معین کنگ ءِ ھاترا گیشتریں براھُندگ رُنگراھاں کپتگ انت۔ ‘‘ (۲)دیمترءَ بیان کنت: ’’من وَ اے گوشاں کہ گُل خان نصیرؔ ھما اولی مردانت کہ آئیا بلوچی احتجاجی و راجی شاعری ءِ یک انچیں کشکے کشّت کہ آئیا رند ہر شاعرے ءَ اے دَگّ و راہ گپت گُڑا آئیا الّما نصیرؔ ءِ پدگیری کُت۔ ایوکا پدگیری انّاں بلکیں چہ آئیے ’’ ڈکشن ‘‘ ءَ بہ گر دانکہ ’’ شعر دپگال ‘‘ کنگ ءِ اسٹائیل درست اِش وتی کُت۔ زاناں اے یک کسانیں گپّے کہ بلوچی نوکیں شاعری ءِ تاریخ ءِ ۳۵ سال ءِ سرا گُل خان نصیرؔ ءِ رنگ ءُ دروشم ءِ جمبر ساھیل انت۔ گُل خان نصیر ؔ ءِ ازم ءِ یک مستریں جوانی شرّی یے ایش انت کہ بلوچی شاعری ءِ تاریخ ءِ تہا آھما یک سروک شاھیں شاعر انت کہ چہ درستاں گیش آئیا ھَئیت ءِ تجربہ کُتگ۔ دروشم ءُ ھئیت ءِ ھما بازرنگی و باز پھناتی کہ گُل خان ءِ گوارا ہست دگہ ھچ جاگہ ءَ مارا گندگا نئیت۔ ‘‘(۲) میر گُل خان نصیر ؔ ءِ شائری ءِ فلسفہ آئی ءِ زندگی ءِ فلسفہ انت۔ انچش آ گوں وتی سیاسی جہدءَ کمیٹڈ بوتگ کہ ھُشک ءُُ ترّی ءِے نزانتگ ۔ھمے رنگ ءَ آئی ءَ وتی شائر ی ءِ ھدائی داد پہ مقصد کارمرز کُتگ۔ گمان ھمیش انت کہ آئی ءَ ماں وتی شائری ءَ پہ زانت آسانیں ءُُ تچکیں زبان ءُُ بیان کارمرز اِتک ءُُ مول ءُُ مرادہ ءِ ے مے بیتگ کہ وانوک تُری وانندگ بہ بنت اگں نا بے وانندگ ھر دوئیں یکیں رنگ ءَ ایشاں پہم اِت بہ کن انت، پمشکا گُل خان ءِ شائری ءَ شئری ابہام ءِ جاہ ءَ مارا تچکیں پگر ءُُ مارشت گندگ کاینت ءُ اے ھما نُکتہ انت کہ ایراد گروکاں لنکگ چست کنگ ءِ راہ دَنت ۔ گُل خان ءَ چہ وتی شائری ءَ وتی چاگرد ءِ بزگی ءُُ بدھالیءِ انچیں اکسے پیشداشتگ کہ وانوک ءُُ اِشکنوک تُری ھرکجا بہ بنت آ چہ گُل خان ءِ چمّاں بلوچ ءُُ بلوچستان ءِ آزگیں ٹپاں دیست کن اَنت۔ ’’ بلوچ‘‘ گُُل خان ءِ زندگی ءُُ شائری ءِ آئیڈیل کارست انت ، پمشکا آئی ءِ دُعا پہ بلوچ انت ، پہ بلوچ ءِ رُژنائیں باندات انت ءُُ پہ بلوچ ءِ سرزمین ءِ وشّی ءُُ وشّ ھالی انت ۔ بلوچ ! تیرے چو دَر رَوت اچ کمان ءَ گوزیت انت آہِنیں پَلکاں شَپان ءَ بلوچ زہرے کہ تہل کنت انت دپان ءَ بِبیت ھردیں مقابل گوں بدان ءَ بلوچ آسے کہ بُن دنت انت لدان ءَ گنوکاں سارکنت ، پُروشیت بُتان ءَ آ بلوچ ءِ سرءَ زلم ءُُ زُوراکیانی ھلاپ انت ۔ آئی ءَ یک نیمگے ءَ بلوچ راج ءِ ناتپاکی ، ناسرپدی ءُُ وتی ھکّ ءِ نزانگ ءِ درد اَت ءُُ دومی نیمگ ءَ وتی بزگ ءُُ لاچاریں راج ءِ وتی جند ءِ ملک ءِ تہ ءَ چو گلامانہ زندگی گوازینگ ءِ گم۔ باور کن اِت، براتاں منی، مرچی ھما کَوم، زندگ اِنت پدکنزگ ءَ عیبے گِرانت، تِیرانی گرمیں شنزگ ءَ ھمے سوب انت کہ گُل خان ءِ مہری شائری بِبیت کہ راجی ، مزاحمتی بِبیت یا کہ پنت ءُُ نصیحتے ، آ ھمک رنگ ءَ گوں وتی ماتی زمین ءِ مہر ءَ ھمگرنچ انت۔ بیا او مرید، بیا او مرید بیا او مرید دیوانگیں بیا بیا کہ دیوانے کنوں مولانگ ءُُ مستانگیں سوحتہ ترا اِشک ءِ زِراب مارا گماں کُرتہ کباب تَو ھانل ءِ دَرداں زَرئے ما پہ وتن جانانگیں پَرک ھچ نہ انت مئیگ ءُُ تئی دردءَ ءُُ زِرد ءِ آچش ءَ تَو ھانل ءِ اِشک ءَ گنوک ما پہ وتن دیوانگیں۔