|

وقتِ اشاعت :   October 30 – 2016

نامداریں ناشراں یکبرے پدا بلوچستان ءَ ارش کت اے رندی اشانی نشانگ پولیس ٹرینگ سینٹر سریاب روڑ کوئٹہ اَت ۔اے ارش ءَ آہاں کساس ششت ءُُ دو(۶۲) مردم کشت ءُُ ۱۱۷ ءَ گیش مردم ٹپی کت ۔ماں ٹپی آں بازینانی جاور شر نہ اِنت ۔سرکاری حالانی رد ءَ چار ءُُ شش ناشر پولیس ٹرینگ سینٹر ءَ پترتگ انت ءُُ پدا داں ہاسٹل ءَ سر بوھگ ءَ سوبین بوتگ انت کہ اودا بازین ھئیل کاریں پولیس جاہ منند بوتگ انت ناشراں گوں سر بوھگ ءَ تیر گواری بنا کتگ بلئے ہما دمان ءَ پولیس سینٹر ءَ ساڑی ایں گارڈاں آھانی سرا تیر گواری کتگ کہ آئی ءِ سوب ءَ درائیں سینٹر ءِ مردم سہی بوتگ انت کہ ٹرینگ سینٹر ءِ سرا ارش کنگ بوتگ ہمے گارڈانی سوب ءَ بازین پولیس ءِ کارندھے رکینگ بوتگ ۔ہمے ناشراں چہ دو وت کش ہم گون بوتگ انت کہ آہاں ہمے ساہتاں وتارا تراکینتگ اے ناشر ماں پولیس ٹرینگ سینٹر ءَ شپ ءِ نیم ءَ مان اتکگ انت ءُُ اشاں پیسرا ہما مردم نشانگ کتگ انت کہ چوکیداری ءَ بوتگ انت بلئے تنیگہ اے گپ پکا نہ انت کہ کل چنچو مردم کشگ بوتگ انت؟ پرچکہ شوشل میڈیا ءَ اے حساب گیش گشگ بوتگ حالانی رد ءَ ناشراں کم چہ کم ۲۵۰ پولیس ہیلکار انگیر کتگ بلئے ایف سی ءَ گوں سوب مندی ءُُ اے درائیں مردم رکینتگ انت ءُُ جوانین جاگہےءَ سر کتگ انت اے ویل ءِ گرگ ءَ گوں ایف سی ءُُ پولیس ہما دمان ءَ جاہ سر بوتگ اَنت،ہیل کاری سینٹر چپ ءُُ چاگرد کنگ بوتگ، چریشی ءَ پد گوں ہیلی کاپٹراں درائیں جاہ چارگ ءُُ ٹُپاسگ بوتگ تنکہ چوش مہ بیت کہ ناشر ے جاہ یے بہ ٹپ ایت ؟اے ساہتاں صوبہ ءِ حکومت ءِ درائیں مزن سندیں واکدار ہمے جاہ ءَ سربوتگ انت اے وھداں بلوچستان وزیر اعلی یکشلءَ چہ درائیں گامگیجاں سہی ءُُ سرپد کنگ بوتگ تنکہ رکینی کارندگاں درائیں ہیل کاری سینٹر سپا ءُُ پلگار نہ کتگ دومی نیمگ ءَ وزیر اعلی ءِ حکم ءِ ردا درائیں سر شہر ءِ ہسپتالاں ایمرجنسی جنگ بوتگ۔ سرجن ءُُ ڈاکٹر پابند کتگ انت کہ ہسپتالاں ساڑی بہ بنت جان سلامتی ءِ سیکرٹری ءَ ہم گوں گشادی کار کتگ اے باری چشیں کم گشادی گندگ نہ بوتگ کہ چدو پیسر ۸ اگست ءِ ویل ءَ گندگ بوتگ ات ہمے وڑا چیریں ادارگ چہ ناشرانی گپ ءُُ حبراں ہم سہی ءُُ سر پد بوتگ انت کہ چہ کجا گپ ءَ اَنت ءُُ چے گشگان اَنت ءُُ آہاں سوج ءُُ سر کئے کنگان اِنت ؟ادارگ ہما دمان ءَ سرپد بوتگ انت کہ آہاناں چہ افغانستان ءَ سوج ءُُ سرکنگ بوھگان انت ۔پاکستان ءِ حکومت ءَ چدو پیسر ہم افغان صدر ءَ را اے گشتگ کہ ماں پاکستان ءَ ناشری ءَ افغانستان ءِ حاک کارمرز کنگ بوھگان انت اے درچ ءَ اے ویل ءَ اے گپ پکا کت کہ پاکستان ءَ ناشری ءِ مستریں بنزیاہ افغانستان اِنت پرچکہ پاکستان ءَ آرمی پبلک اسکول ،کے پی کے یونیورسٹی ءُُ کوئٹہ سول ہسپتال ءِ ارشانی وھد ءَ افغانستان ءِ حکومت حال داتگ کہ ارش کنوکاں فون ءِ سرا چہ افغانستان ءَ سوج ءُُ سرکنگ بوتگ۔ چرے ارش ءَ بلوچستان ءِ مہلوک سک دلپدرد بوتگ انت پرچکہ اے ہیلکار چہ بلوچستان ءِ دور ءُُ دریں دمگاں آتکگ انت ءُُ اشانی میّت پدا ہمے دور ءُُ دریں دمگاں دیم دئیگ بوتگ انت چریشی ءَ اے درا بیت کہ یک ارشے ءَ درائیں بلوچستان ٹپی کنگ بوتگ کہ پہ حکومت ءَ ایشی ءَ سنبالگ گران اِنت ۔ہما روچ ءَ وزیر اعظم ءُُ چیف آف آرمی اسٹاف کوئٹہ اتکگ انت کہ جاوراں وت بگند انت پدا آہاں ایمنی ءُُ سلامتی ءِ حاترا یک گندُکے کت امیت انت اے درچ ءَ حکومت جوانیں گامگیج دیم ءَ کارایت۔