| صد یق بلوچ

وقتِ اشاعت :   January 1 – 2017

حکومت ءِ نیمگ ءَ گوادر بندن ءَ نوکیں پنچ دھکہ( برت )جوڑ کنگ ءِ سوڈگ باز وشیں حالے ۔چد ءُُ پیسر سرکار ءَ چین ءِ مدت ءُُ کمک ءَ ایوک ءَ سے دھکہ جوڑ کتگ ءُُ ۲۰۰۶ ءَ کار بنا کتگ ۔پدا گوستگیں دہ سالاں بنجاہی حکومت ءَ گوادر بندن ءِ سرا پہیوکے ہم حرچ نہ کتگ بلئے دومی نیمگ ءَ بنجاہی حکومت ءِ نیمگ ءَ لاہور ،راولپنڈی مزنیں موٹروے ایوک ءَ ہشت ماہ سرجم کت ءُُ اے مزنیں کار ءِ سرجمی ءَ ہچ براں اے گپ جنگ نہ بوت کہ بنجاہی حکومت ءِ کر ءَ فنڈ نیست ۔بلئے بلوچستان ءَ اے وڑیں کاراں دہ دہ سال لگ ایت ءُُ ہرچ سال ءَ گریوگ بیت کہ ’’ بلئے فنڈ ہلاس بوت اَنت‘‘ بلوچستان ءَ کجام ہم اے وڑیں مزنیں کارے بچار کہ سی سال ءَ پیش ءَ سرجم بوتگ ؟ کچی شت ءِ کار ءَ سی سال گیش انت بلئے انگت گوکو اِنت ءُُ ملگ ءُُ پاد آھگ نزانت مالی کارانی زانتکارانی گشگ اِنت کہ ایشیءِ سرجمی ءَ انگت دگہ دہ سال درکار اِنت پرچکہ اے شت ءَ را جوانیں وڑے ءَ جوڑ کنگ نہ بوتگ بلکیں سر ءَ گوازینگ بوتگ ۔ہمے وڑا سی پیک ءِ بابت ءَ اے حاترا سرجمیں حال مہلوک ءَ دئیگ نہ بنت پرچکہ اے کار ءِ سیادی گوں بلوچستان ءَ اِنت ۔اگاں کہ سرکار ءَ اے پنچیں دھکہاں ھوار دگہ ہپتاد دھکہ جوڑ کنگی اِنت پرچکہ گوادر بندن ہپتاد دھکہ ءَ چہ گیش ئیگ اِنت ءُُ لہتیں دھکہ پہ جہاز ءُُ گرابانی شرکنگ ءَ ہم درکار بیت ۔اے وھد ءَ نوں زانگ نہ بیت کہ گوادر بندن ءَ سرجم بوھگ ءَ دگہ چنچو سال ءُُ زر ءُُ مال درکار بیت ؟ دومی نیمگ ءَ پلاننگ کمیشن ءَ دہ سال بیت کہ یک پروپوزلے (Proposal) داشتگ ءُُ چیر داتگ کہ یک یورپی ملکے ءَ داتگ کہ آ گوادر ءَ گراب جوڑ کنگ ءِ یک انڈسٹری شرکنگ لوٹ ایت کہ آئی ءِ حاترا بلوچستان ءُُ پاکستان ءِ سرکار ایوک ءَ گوادر ءِ نزیک ءَ زمینے بدئینت ایندگہ زر ءُُ مالاں آ وت حرچ کن اَنت بلئے پلاننگ کمیشن ءَ اے پروپوزل چیر گور چینتگ ءُُ دہ سال بیت کہ اے ملک ءَ را ہچ وڑیں جواب ءُُ پسو دئیگ نہ بوھگان اِنت ۔اگاں کہ اے یورپی ملک ءَ پاکستان ءِ اے بدیں تب ءُُ رو ءِ سرا مزنیں جاک ءُُ سلواتے کتگ بلئے پاکستان ءِ حکومت ءِ گوش ءَ مورے ہم نہ وارت ۔ کسانین دمگانی ( صوبہانی) رہشوناں ہمک براں پلاننگ کمیشن اے حاترا بیجنگ ءَ بارت تنکہ چین ءَ باور بہ بیت کہ کستریں دمگ سی پیک ءِ درچ ءَ پنجاب ءِ دیمروئی ءَ وش ءُُ رازی اَنت۔ دومی نیمگ ءَ سی پیک ءِ درچ ءَ کہ ہرچ زرے کہ کستریں دمگاں دئیگ بوھگان انت آیا آ وام اَنت کہ دیم ءَ ہمے کستریں دمگاں دئیگی اَنت کہ انعام اَنت ؟ اے بابت ءَ بائدیں بنجاہی حکومت دمگی حکومتاں سہی ءُُ سرپد بکنت کہ کستریں دمگ کہ چین ءَ ہرچ منگ نامہ یے دست رند کن اَنت آ سوفٹ ءَ لون اَنت ۔کمرشل کریڈٹ یا گرانٹ ،ان۔ایڈ اَنت اے گشگ بہ بیت کہ بنجاہی حکومت اے درائیں کارانی واماں وت دنت ؟اگاں بنجاہی حکومت وت اے واماں دنت گڈا ایندگہ دمگی حکومتانی سروزیراں بیجنگ ءِ برگ ءِ چے زلورت اِنت ۔اے ہنچیں جست اَنت کہ پاکستان ءِ مہلوک اشانی پسو ءَ چہ بنجاہی حکومت ،سینٹرز ،ایم این اے ءُُ بلوچستان ،سندھ ، ءُُ خیبر ءِ دمگی حکومتاں چے دلمانگ اَنت پرچکہ پاکستان ءِ مہلوک ءَ را سی پیک پیسریگیں پنچ دیوانانی حال دئیگ نہ بوتگ ءُُ نوں گشگ بوھگان اِنت کہ اے جے سی سی ءِ ششمی دیوان اِنت ۔دمگی رسانک در ءِ مزنیں جاک ءُُ پریاتے ءَ پد بلکیں اے ششمی دیوان ءَ کستریں دمگانی سروزیر برگ بوتگ اَنت ءُُ اے جار پرینگ بوتگ کہ سی پیک ۴۶ ملین ءَ چے ۵۷ ملین ءِ کنگ بوتگ گمان ہمیش اِنت کہ اے ۱۰ ملین کستریں دمگانی سرا ءَ حرچ کنگ بنت۔اے درگت ءَ ارزشت داریں جاہ گوادر ءِ بندن اِنت کہ بلوچستان ءَ اِنت بائدیں بلوچستان ءِ ارزشت چہ ایندگہ سیہیں دمگاں گیشتر بہ بیت۔