|

وقتِ اشاعت :   February 16 – 2017

مئیر کراچی وسیم اختر کا کہنا ہے کہ پی سی بی پاکستان سپرلیگ کا فائنل کراچی میں کرائے تو وہ اس کی تمام ذمہ داری لینے کو تیار ہیں۔
پاکستان میرین اکیڈمی کراچی میں اسپورٹس گالا کی تقریب سے خطاب کے دوران مئیر کراچی وسیم اختر کا کہنا تھا کہ وہ گزشتہ روز ملک کے مختلف حصوں میں ہونے والی دہشت گردی کے واقعات کی پرزور مذمت کرتے ہیں، موجودہ حالات میں ہمیں متحد ہونا ہوگا۔ پاک بحریہ کی امن مشقیں خوش آئند ہیں، امن مشقوں سے ُدشمن کو پیغام گیا ہے کہ وہ اپنے ناپاک ارادوں سے بازرہے۔
وسیم اختر نے کہا کہ ہمارے ملک کو اسپورٹس گالا جیسے ایونٹس کی شدید ضرورت ہے، ایسے ایونٹس کے انعقاد میں زیادہ اخراجات بھی نہیں ہوتے لیکن ان کے دور رس فوائد ہوتے ہیں۔
پی ایس ایل کے حوالے سے میئر کراچی کا کہنا تھا کہ اگر موجودہ واقعات کی وجہ سے بین الاقوامی کھلاڑی پاکستان نہ بھی آئیں تب بھی پی ایس ایل کا فائنل ملک میں ہی ہونا چاہیے، وہ پی سی بی کو پیشکش کرتے ہیں کہ اگر پی ایس ایل کا فائنل کراچی میں کرائیں تو وہ اس کی تمام تر ذمہ داری لینے کے لیے تیار ہیں۔