(۲۱ فروری زبانانی میان استمانی روچ)
زبان ءِ زندگ دارگ ءَ بازیں جہد ے کنگ کپیتءُُ بازیں سکی ءُُ سوری ھم سگگ لوٹیت۔چیاکہ ایوک ءَ گپ کنگ ءَ زبان دیمروی نہ کنت ءُُ اے درگت ءَ بازیں پِڑے ءَ بورتاچی کنگ کپیت چشکہ وانگ ءُُ زانگ ماں ماتی زبان ءَ بہ بیت، رسانک ءِ زبان ماتی زبان ءَ بہ بیت، لبزانک ماتی زبان ءَ بہ بیت،سرکاری ءُُ نیم سرکاری کارگسانی زبان ءُُ کُلیں کارپد ماتی زبان ءَ بہ بنت گڈا یک زبانے دیمروی کت کنت۔چشکہ مئے شہدیں بلوچی زُبان چہ اے کُلیں آسراتیاں زبہر اِنت بلئے انگت ءَ ہرکس وتی وس ءُُ واک ءَ ایشی ءِ دیم ءَ برگ ءُُ زندگ دارگ ءِ جہد ءُُ کوشست ءَ اِنت۔چیاکہ زُبان زندگیں راجانی پجار اِنت ءُُ زبان کہ زندگ اِنت گڈا راج ابدمان اِنت۔ سیدظہور شاہ ہاشمی گشیت
راجے کہ بہ بیت گُنگ نہ مانیت نہ مانیت
مانیت پہ ادارکے بزان زندگ ءُُ مُردار
دگنیا ءِ تہا ہر راج ءَ وتی ماتی زبان ءِ زندگ دارگ ءِ واست ءَ قربانی دیگ ءَ چک ءُُ پد نہ بوتگ ءُُ آ کہ چک ءُُ پد بوتگ انت مروچی بیست ءُُ یکمی کرن ءَ آ چہ شہدیں زبان ءَ پہک ءَ زبہر انت ءُُ ہر پڑ ءَ دری راجانی چم دار اَنت۔وھدیکہ ہر سال ءَ 21فروری ءِ روچ ماں سرجمیں دُگنیا ءَ میان اُستمانی ماتی زبانانی روچ ءِ نام ءَ برجم دارگ بیت گڈا مارا ھما شہید یات کاینت کہ آھاں وتی نُگرہیں سر پہ وتی ماتی زبان ءِ زندگ دارگ ءُُ رکینگ ءَ ندر کُت انت۔ھمئے روچ ءَ بزان 21فروری 1952 ءَ ڈھاکہ یونیورسٹی،جگن ناتھ یونیورسٹی ءُُ ڈھاکہ میڈیکل کالج ءِ چار نودربراناں ڈھاکہ ہائی کورٹ ءِ دیم ءَ شہید کنگ بوت چیاکہ آھانی لوٹ اَت کہ رودراتکی پاکستان ءَ اردو ءَ ھوار بنگالی ءَ را ھم سرکاری سطح ءَ مننگ بہ بیت۔بلئے بدبہتی ءَ ھمئے نودربراناں آھانی ھمئے لوٹ ءِ پدا شہید کنگ بوت ءُُ آھاں وتی ھیشی سر پہ وتی ماتی زبان ءِ پہازگ ءَ ندر کُت ءُُ ماں سرجمیں دُگنیا ءَ یک نامے ایر کُت ۔ھمے نودربرانی قربانی ءِ پدا راجانی ہوریں گل (UNO) ءِ زیلی ادارگ UNESCOءَ 17نومبر1999ءَ 21فروری ءِ روچ پہ ماتی زباناں برجم دارگ ءِ جار پرینت ءُُ ھمے پیم ءَ ماں سرجمیں دُگنیا ءَ اے روچ شریں وڈے ءَ برجم دارگ بیت ۔ ھمے بنگالی نودربرانی یات کنگ ءِ واست ءَ ڈھاکہ ءِ تہا شہید مینار ءِ نام ءَ یک یادگاری مینار ے ھم جوڈ کنگ بوتگ کہ ایشی سرا ھما شہید بوتگیں نودربرانی عکس ھم جتگ اَنت۔
ھمے پیم ءَ 21فروری ءَ ماتی زبان ءِ برجم دارگ ءِ ھمراھی ءَ بائد انت ما بلوچ وتی بلوچی زبان ءِ دیمروی ءِ واست ءَ یک مشت بہ باں ءُُ ہر کس وتی وس ءُُ واک ءَ زبان ءِ دیمروئی ءَ گوں بلوچ راج ءِ کواس ءُُ ندکاراں ھم کوپگ ءُُ ھم گام بہ بیت ۔چیاکہ تپاکی زندگیں راجانی بُنکی چیدگ اِنت ۔تپاک بئے گڈا دیم ءَ جُنز اِت کن ئے ،دیم ءَ جنزگ ءِ واست ءَ ماتی زبان وتی ھمگام کنگ کپیت،ماتی زبان ءِ ھمگامی ءَ منزل ءَ کہ سر بئے گڈا پیریں مات ھم تئی منت ءَ پہ بچکندے گِیپت کہ منی بچ ءَ منا ءُُ منا چہ سہگریں وھد ءَ پہازیت ءُُ رکینت۔
