|

وقتِ اشاعت :   April 12 – 2017

گیانا: پاکستان نے تین ایک روزہ میچز کی سیریز کے تیسرے اور آخری میچ میں ویسٹ انڈیز کو 6 وکٹوں سے شکست دے کر سیریز 1-2 سے اپنے نام کرلی۔ ویسٹ انڈیز کے شہر پروویڈنس میں کھیلے گئے فیصلہ کن معرکے میں ویسٹ انڈین کپتان جیسن ہولڈر نے ٹاس جیت کر پہلے بیٹنگ کا فیصلہ کیا تو مقررہ 50 اوورز میں 9 وکٹوں کے نقصان پر 233 رنز بنائے جب کہ گرین شرٹس نے شعیب ملک کی شاندار سنچری کی بدولت ہدف 4 وکٹوں کے نقصان پر باآسانی حاصل کرلیا۔ ہدف کے تعاقب میں گرین شرٹس کا آغاز مایوس کن رہا اورصرف 36 کے مجموعی اسکور پر ابتدائی 3 بلے باز پویلین لوٹ گئے۔ احمد شہزاد 3، بابراعظم 16 اور کامران اکمل بغیر کوئی رنز بنائے آؤٹ ہوئے۔ چوتھی وکٹ پر محمد حفیظ اور شعیب ملک نے 113 رنز کی شراکت قائم کی اور ٹیم کا مجموعی اسکور 149 تک پہنچا تو حفیظ 81 رنز بنا کر آؤٹ ہوئے، انہوں نے 2 چھکوں اور 8 چوکوں کی مدد سے 86 گیندوں پر 81 رنز کی شاندار اننگز کھیلی۔ کپتان سرفراز احمد اور شعیب ملک نے پانچویں وکٹ پر زبردست انداز میں بیٹنگ کرتے ہوئے مخالف بولروں کی خوب پٹائی کی اور ہدف 43.1 اوور میں حاصل کرلیا۔ شعیب ملک نے 2 چھکوں اور 10 چوکوں کی مدد سے 111 گیندوں پر 101 رنز کی ناقابل شکست اننگز کھیلی جب کہ کپتان سرفراز احمد بھی 24 رنز کے ساتھ ناٹ آؤٹ رہے۔ ویسٹ انڈیز کی جانب سے شینن گبریل نے 2، جیسن ہولڈر اور ویراسیمی پرمال نے ایک ایک وکٹ حاصل کی۔ اس سے قبل ویسٹ انڈیز کی جانب سے ایون لیوز اور والٹن نے اننگز کا آغاز کیا تاہم دونوں کھلاڑی 40 رنز کے مجموعی اسکور پر بالترتیب 16 اور 19 رنز بنا کر پویلین لوٹ گئے جس کے بعد کیرن پاول اور شائی ہوپ میدان میں اترے تاہم پاول 23 رنز بنا کر عماد وسیم کا شکار بنے۔ چوتھی وکٹ پر جیسن محمد اور شائی ہوپ نے 101 رنز کی شراکت قائم کی اور ٹیم کا مجموعی اسکور 169 تک پہنچا تو جیسن محمد 59 رنز بنا کر جنید خان کا شکار بن گئے جب کہ دیگر کھلاڑیوں میں ہوپ 71، جوناتھن کارٹر11، کپتان جیسن ہولڈر 12، ورسیمی پرمال 8 اور دیوندرا بشو بغیر کوئی رنز بنائے آؤٹ ہوئے۔ پاکستان کی جانب سے محمد عامر، جنید خان اور شاداب خان نے 2،2 جب کہ عماد وسیم اور حسن علی نے ایک ایک وکٹ حاصل کی۔ واضح رہے ویسٹ انڈیز نے آخری مرتبہ 1991 میں پاکستان کو ون ڈے سیریز میں شکست دی تھی۔ اب دیکھنا یہ ہے کہ پاکستان ویسٹ انڈیز کے خلاف 26 سالہ ریکارڈ کا دفاع کرے گا یا ویسٹ انڈیز اس ریکارڈ کو مزید طویل ہونے سے روکے گا۔