چہ کسانی ءَ من ءَ دوچیز ءِ ھب ءُُ واہگ انت کتاب ءِ وانگ ءُُ تر ءُُ گرد ءِ اے ہر دو واہگ تنی وہد ءَ جوانیں رنگ ءَ سرجم نہ بوتگ انت کتابانی زرے است کہ آئیءِ تہا اوژناگ نہ بیت ہمے رنگ ءَ دنیا پراہ ءُُ شاہیگان انت پہ تر ءُُ گرد ءَ ہلاس نہ بیت۔پیسر ا من سعودی عرب ءُُ ایران ءَ دیستگ انت بلئے پاکستان ءِ کراچی ءُُ کوئٹہ ءَ ابید دگہ مزنیں شہر نہ دیستگ انت پہ بلوچی لیکچررءِ ٹیسٹ ءِ ہاترا سر اسلام آباد ءُُ پدا لاہور ءَ کپت نوکری و نہ رست بلئے سفرنامہ ءَ نبشتہ کنگ ءِ موہ رست چوناھیگا ءَ ہمک وہد ءَ من ماتیں گلزمیں یل کنگ ءُُ دور یں جاہے روگ ءِ ارداہ کرتگ دل بے تاہیر بوتگ ءُُ ماتیں زمیں ءِ مہر گیش بوتگ ۱۳ جنوری ءِ سہب ءَ مہلہ وہدے من چہ بلوچستان یونیورسٹی ءِ ٹیچر ہاسٹل ءَ دیم پہ سدابہار ٹرمینل ءَ رہادگ بوتاں ڈن ءَ چلتن ءُُ کوہ ءِ مردار مدامی وڑا گوں وتی شان ءَ مک ات انت ءُُ جلشک دئیگ ءَ ات انت۔بلئے مروچی اے کوہ من ءَ دگہ ءَ رنگ ءَ ودی بوہگ ءَ ات انت سہب ءِ سرا مہلہ شال ءِ کوہ سک جلوہ دئیگ ات انت یا منی چم دگر ات انت کہ ہمک روچ من ایشاں گوں اے چماں نہ چارتگ ات ۔انچو وہد گوازان ات ۔دل ءِ بے تاھیری گیش بوہان ات من بالاچ حمید نورؔ ءُُ جاوید اشرف ءَ سدا بہار ٹرمینل ءَ بے تامیں نشتہ ئے کرت پرچکہ اے ہوٹل ءَ ترا جست نہ کنت انت وتی دل ءِ تب ءَ پرتو ناشتہ ءُُ وارگ کار انت ءُُ دپ ءِ پرا زر گر انت ( ماپدا سرپد بوتیں کہ اے ھنر ایشاں چہ کجا ھئیل کرتگ)
سدا بہا ٹرمینل شال ءِ مستریں ٹرمینل انت کہ ات پاکستان ءِ بازیں شہراں چہ ادا ہمک روچ بس درکیت آ ٹرمینل کہ من ایران ءَ دیستگ انت۔ اے آہانی چارک ءِ کچ ءَ نہ بوت بسانی اوشتاگ ءِ جاہ ءُُ لہتیں گار گس پہ مسافراں دگہ ہچ وڑیں آسراتی نیست ۔چہ اے ٹرمینل ءَ پہ اسلام آباد ءَ ہمک روچ ءَ ساعت نو ءُُ دہ بس درکیت یکے قول آہانی ءَ ڈائیو بسے کہ چہ سبی ،نصیر آباد ءَ دیم پہ اسلام آباد ءَ روت ءُُ دومی سادئیں بس انت کہ چہ ژوب ءُُ ڈیرہ اسماعیل خان ءِ راہ پہ اسلام آباد ءَ روت ۔
ماسنگتاں ڈائیو بس ءَ ٹکٹ چہ بولان ،نصیر آباد ءِ روڑ ءَ وتی سفر ءِ بندات کرت اے بس ءِ گیشتر مسافر پشتو ءُُ پنجابی ات انت بلوچ مالہتیں ات انت مئے بس کسا س ۲۰:۹ ءَ رھادگ بوت دشت ءِ سبزگیں ءُُ ملگوزایں دمگ ءَ چہ گوست اے جاہ ترا بزگی ءِ نشانی گندگ ءَ کپت اے راہ ءُُ کشک بازیں بادشاہ ءُُ زانتکاراں وتی وہدءَ دیستگ انت بزاں چہ ہمے راہ گواستگ انت ءُُ دنیا ءِ مزن مزنیں شہرانی سرا ارش اش کرتگ بلئے اے جاہ ءِ بزگیں بلوچ ءِ زندگی ہما گواستگیں پڑی ءِ رنگ ءَ انت ’’ باریں کئی بدعا انت کہ ،دائم لگتمال انت بلوچ‘‘ ۔دیم ءَ روان بولان گوں وتی بلوچی شان ءُُ غیرت ءَ مک ات بولان ءَ بازیں نرمزاریں ءُُ لگواریں بلوچ دیستگ بولان بلوچستان ءِ چیدگ انت بے بلوچستان ءَ نہ بیت بولان ۔
بولا نءِ مزن شانیں کوہ ءُُ ترشتیں تلار سبزیں سک سارتیں آپ ءُُ کانیک چہ جنت ءَ پہ بلوچاں کم نہ انت۔ بلوچاں مدام سکیاں گپتگ بولان آہانی وتی دلبند ءِ تہا جاہ داتگ بولان وت سرجمیں راجدپترے داریت بولان ءِ کوہانی تہا جوڑکرتگیں ٹینل و ریل ءِ ٹریکاں من ءَ پہ جیڑگ ءَ مجبور کرت کہ انگریزاں آوہداں نہ کہ سائنس ءُُ ٹیکنالوجی ءَ انیکس دیمروئی کرتگ ات اے کوہانی دل چو درتگ انت ءَ اے ٹینل ءُُ ریل ءِ ٹریک جوڑ کتگ انت ؟؟؟ آہاں گوں چنکس ایمانداری ءَ کار کرتگ آہاں اے حبر زانتگ کہ ما پہ ادارکی ادا انت مدامی اے جاہاں آباد نہ بنت بلئے آہاں پہ وتی کسانیں مول ءُُ مراد ءِ ہاتر انچیں ٹینل ءُُ پل جوڑ کرتگ کہ اے ملک دگہ سد سال ءَ اے وڑیں کار کت نہ کنت من گوں وتی سنگتاں فرنگیانی ایمانداری ءُُ کارانی سر گپ جت آ مروچی ہمے ہاتر اسوب مند انت کہ آ ہمک کار ءَ گوں ایمانداری ءَ کن انت نوزدہمی سدی ءَ انگریزاں بلوچستان ءِ تہا ریل ءِ ٹریک ،سڑک ،نادرجاہ کتابجاہ جوڑکتگ ۔انگریزاں اگاں بلوچانی سرا حاکمی کرتگ آہاں لٹ ءُُ پل کرتگ بلئے مرداں لہتیں آسراتی ہم داتگ چوں مروچی دور ءِ وڑ ا ناروائی نہ کرتگ ۔مئے نوکیں واجہاں ءَ ایوک ءَ مئے مڈی دوست انت بلوچستان ءَ نہ جوانیں سڑک است نہ وانگجاہ ،ءُُ نادراہ جاہ ءُُ دگہ آسراتی ہمے بولان ءِ کوہانی تہا ٹینل ءِ کش ءَ روڑءَ بچار انچو پروشت ءُُ پروش ءِ آماچ انت کہ گپ نہ بیت ۔دومی اے روڑ انچو کسان ءُُ تنک انت وہدے یک گاڑی یے چہ دومی نیمگ ءَ آہگ ءَ بیت اے نیمگ ءِ گاڑی ءَ ودار کنگی بیت برے برے اے روڑ ءَ دو دو گھنٹہ ودار کنگی بیت چے ہمے جاہ ءَ فرنگیانی سوب مندی ءُُ مئے واجہانی بے سوبی زانگ بیت ۔آہانی ایمانداری ءُُ مئے بے ایمانی زانگ بیت (کئی گلہ ءَ کنے ءُُ زنگ ءَ کئی جنئے)
دیمتر ءَ مچھ ءِ بزگی مئے دیم ءَ گواست کہ اے جاہ ءِ بزگیں بلوچانی زند گوستگیں کرن ءِ چہرگ ءَ جنت بلئے بولان اولی روچاں بگرداں روچ ءِ مروچی گوں آہاں وفاداری ءُُ ہمراہ داری کنگ ءَ انت ڈھاڈر ءُُ سیبی ءِ کوچگی زند ءُُ آئی ءِ تہا نشتگیں مردمانی درداں وت زبان است بلئے
چمے بہ بیت پہ گندگ ءَ
گوشے بہ بیت پہ اشکنگ
انچو ما دیم ءَ روان ات ایں زندگی ءِ رنگ ءُُ ڈول بدل بوہگ ءَ ات انت داں کہ چمانی تیراں کار کت پٹ ءُُ ڈن ات انت گیشتر ھشکاوگیں ڈاگار انت ہماجاہ ءَ کہ ترمپے آپ کپتگ ات جنوری ءِ سردیں ماہ پل ءُُ بہار رستگ ات روڑ ءِ کش ءَ گوراں دور دور ءَ بزگیں بلوچانی کڈک ءُُ گدان درا بوت انت۔ اے جاہ ءِ بلوچ پہوالی زند گوازینگ ءَ انت انچو گمان بیت افریقہ ءِ جنگل ءِ مردمانی وڑا اے جاہ ءِ بازیں مردماں شہری زند نہ دیستگ ءُُ ھچ سرپد نہ انت ہمے کوچگانی تہا بلوچ مال چاری کنگ ءَ ات انت ہمے وہداں من ءَ شے مرید ءِ دیوانگی یات اتک کہ آئی ءَ اے جاہ ءَ چون زند گوازینتگ گوں وتی درداں ؟؟ ما کتابانی تہا بلوچانی پہوالی زندءِ بابت ءَ وانتگ اے جاہ ءِ کل چیزاں گوں وتی چماں گندگ ءَ ات انت کہ بزگیں بلوچ انگت ہما پیشی زندگواینگ ءَ انت ہمے یکیں روڑ ءَ ابید سرکار ءِ دگہ ہچ نشانی گندگ ءَ نیت۔ہما پروشتگیں ءُُ حاکیں گس ہما بزگی ءُُ گژنگی نوکیں دنیا ءِ اے جاہ ءَ ہچ رنگ گندگ ءَ نیت اگاں کسے ءَ گواستگیں وہد ءِ بلوچانی بابت ءَ فلم جوڑ کنگی انت گڈا ہمے جاہ ءَ بئیت ۔ کمو دیم ءَ بختیار آباد ءُُ ڈومکی مئے دیم ءَ گواست کہ ایوک ءَ نام اِش مزن انت ءُُ زند ہما پشی رنگ ءَ انت انگریزاں آوھد ءَ ہمک جاہ ءِ ایل اسٹیشن جوڑ کتگ کہ انگت ہما وڑا سلامت انت کہ چہ مئے واجہانی جوڑ کرتگیں کوئیاں زیبدار ءَ بنت اے سائنس ءُُ ٹیکنالوجی ءِ دور ءَ من بازیں مردماں سائیکلانی سرا دیست کہ گوں ٹیکم ءُُ ہھتوڑی ءَ ریل ءِ ٹریک ءَ جوڑ کنگ ءَ ات انت واہ مئے نوکیں دور ءِ انجیئنراں شما چنکس دیمروئی کرتگ ؟؟ نصیر آباد ءِ تہا زندگی ءِ ہما کہیں رنگ ات داں کہ چم کار کنگ ءَ ات انت بزگی ءُُ ھواری ات اے جاہ ءَ زندگی ءِ رنگ چہ بلوچستان ءِ دگہ جاہانی زند ءَ جتائیں رنگے ءَ ات۔
