|

وقتِ اشاعت :   April 23 – 2017

سید ہاشمی بلوچی زبان ءِ ہما مزن نامیں شاعر بوتگ کہ آئی ءَ وتی شائری ءِ تہا ذگریں بلوچی لبز کارمرز کتگ ۔واجہ ءِ شائری ءِ اندر ءَ مارا نوکیں لبزیات نوکیں حیال ءُُ مارشت شک باز گندگ ءَ کیت ۔سید ہاشمی بلوچی ءِ ہما زانتکارایں شائر بوتگ کہ آئی ءِ گورا مارا ذگریں بلوچی لبزانی مزنیں امبارے گندگ ءَ کیت ۔سید ہاشمی ءِ دور ءُُ باریگ ءَ چوشین بازین بلوچی شائر بوتگ انت کہ آہاں وتی شعرانی تہا بلوچی لبز کم ءُُ دری زبانانی لبز سک باز کارمرز کتگ بلئے سید ہاشمی ہما بلوچ شائری بتگ کہ آئی ءَ ہما دور ءَ ہم وتی شئیرانی تہا ایوک ءَ بلوچی ءِ ذگریں لبز کارمرز کتگ انت کہ مرچی ہم واجہ ءِ شئیرانی زیبداری ءَ پدرکنت ۔سید ءِ کرا اے ہاترا بلوچی ءِ ذگریں لبز سک باز است پرچکہ سید بلوچی زبان ءِ سرا سک باز کارکتگ۔ وہدے ما سید ءِ شئیراں واناں داں بازیں جاگہہ ءَ مارا انچیں لبزیات گندگ ءَ کیت کہ وانوک ئیداں بنت کہ اے چونیں لبزانت کہ سید ءَ وتی شئیرانی تہا کارمرز کتگ انت بوت کنت کہ سید اے لبز یات اے ہاترا وتی شئیرانی اندر ءَ کارمرزکتگ انت کہ وہدے دنز ءُُ مجانی تہا اے لبزیات گار ءُُ بیگواہ مہ بنت۔ سید ہاشمی وتی بنداتی دور ءِ شائراں اے ہاترا ءَ جت ءُُ گستائیں مقامے داریت کہ آئی ءَ وتی شئیرانی جلواہ ذگریں بلوچی لبز کتگ انت ۔وہدے سید ۲۰ دسمبر ۱۹۵۰ ءَ کراچی ءَ یک بلوچی شائری دیوان ءَ وتی اولی شئیر ءَ وان اَنت داں مردم پہمیت سرپد بیت کہ سید گوں چونیں لبزاں شائری کنگ انت ناگمانی چست بنت درکاینت اُپارگ منی من دپ ءَ داراں نہ بیت دل لہڑ جتیں دارگ منی چاردہ الائیگیں شپ تئی ہاتر ءَ سہبوں کتگ دیمتر ءَ گونمن نہ بیت ہچ رنگ ءَ دل دارگ منی چہ وتا ہچی نہ دساراں نی من ءَ ھبریگ منی باوری گپے نہ انت اے گرمپک ءِ شارگ منی اِش اِتاں سید ءِ اولی دستونک ءِ لہتیں بند کہ واجہ ءَ وتی دستونک ءِ تہا چونیں بلوچی لبزیاتے کارمرز کتگ ۔چہ ہمے دستونک ءَ پد واجہ بلوچی زبان ءُُ لبزانک ءِ پڑا وتی گام ایرکت انت ۔سید تہنا وتی پاد بلوچی لبزانک ءِ سرڈگار ءَ ایر نہ کنت بلکیں واجہ ءَ بلوچی ءَ را چہ بے رہبندی ءُُ رنگراہاں درکت ءُُ یک مادں ءُُ تچکیں راہے ءِ سر ءَ آورت ءُُ اوشتار ینت ءُُ چہ ہمد ءَ آئی ءَ وتی لبزانکی سپر بندات ءِ انت ۔ سید پرچا وتی شئیرانی تہا چہ آدگہ شائراں گیشں ذگریں بلوچی لبزیات کامرز کتگ ایشی ءِ سبب دو بوت کنت یکے ایش انت کہ سید ءِ کرا بلوچی لبز ذگریں باز بوتگ ۔دومی یاکہ سید ءِ شئیرانی لوٹ بوتگ انت ۔اے گپ وتی جاہ ءَ یک ءُُ ٹک انت کہ سید ہاشمی گورا گیش ءَ چہ گیش بلوچی ذگریں لبزیات بوتگ آئی ءِ ہر جاگہہ لوٹتگ وتی شئیرانی تہا کارمرز گشتگ داں مردم ءَ را انچو سما بیت کہ سید لبزاناں دست ءَ گپتگ ءُُ برتگ ءُُ ہما جاہ ءَ لوٹتگ کارمرز کتگ بیا ہمبل ءُُ بیا ہمدل ءُُ بیا ہمسر ءُُ ہمکار گالانی زریناں پتو گلکار ءُُ چکنکار اے شعر ءِ بند ءِ تہا سید انچیں زبیداریں بلوچی لبز کار مرز کتگ کہ ہمک مردم پہ دیم اے لبزاں پوہ بوت کت نہ کنت سید ہاشمی ءِ دگہ یک جوانیں شری یے اے بوتگ کہ واجہ ءَ وتی قومی بزاں دراجی شائری ءِ تہا ہم ذگریں بلوچی لبزیات کارمرز کتگ چوآ دگہ شائرانی وڑا سادہ بلوچی لبزکارمرز نہ کتگ راجے کہ بہ بیت گنگ نہ مانیت نہ مانیت مانیت پہ ادارکے بزاں زندگ ءُُ مہ دار اے شئیرءَ چہ ہمے پدر بیت کہ سیدگشگ لوٹگ ءَ انت کہ یک راجی ءَ را وتی زبان ءِ سنچ ءُُ سما مہ بیت آ راج ءِ زبان گار ءُُ بیگواہ بیت ۔بلئے سید ءَ ہمے لبزیات انچیں رنگی ءَ کماتگ انت ۔ کہ ہمک مردم اے شئیر ءِ اندرے حیال ءُُ مارشت ءَ سرپد بوت نہ کنت ۔اگاں سرپ مہ بیت گڑاں شریں وڑ یا شئیر ءِ مانا ءَ درگیتک کت نہ کنت پرچکہ اے شئیر ءِ اندر ءَ سادہ بلوچی لبزکارمرز نہ بوتگ۔ادا بچار کہ سید چتور لبز کارمرز کتگ کہ اے شئیر ءِ تہایک مزنیں راجی پگر ءُُ حیال ءِ پدرائی کنت زہتگ اِش چہ من گلباگ انگت ہم میاریگاں کہ دل ءَ جگرسمبین کنٹگاں اے داراں من سید ہاشمی ھانل ءِ لبز پہ چی ئے ! ہاترا کار مرز کتگ اے گپ ءَ ہرکس وتی وڑا گشتگ ءِ جہد ءَ کنت ۔وہدے مردم سید ءِ شائری ءِ تہا ھانل ءِ لبز ءَ گندیت الم آ جنکی ءَ ترانگ ءَ کپت ایت بلئے ۔۔۔۔باز جاہ ءَ ہمے ھانل ءِ لبز سید ءَ وتی زبان مراج ،سرڈگار ءِ ہاترا ہم کارمرز کتگ ،ادا بچار کہ سید ءَ چون وتی شئیرانی تہا ھانل لبزکار مرزکتگ سستگ اِش چہ من ھانل ،ھانلیں ڈگار مسکیں چو کپوت ءَ نالاناں چو دل ءَ بداراں من ایشر ءَ گشنت شائری ءِ تہا لبزانی کارمرز کنگ ءِ ہنر سیدءِ شائری ءِ تہا لبزانک کارمرز کنگ ءِ ہند ءُُ انچو سرپد بوتگ کہ واجہ ءَ گران ءَ چہ گران تریں لبز وتی شئیرانی براہ کتگ انت۔سید ہاشمی ءِ شئیرانی ہرکجام کتاب ءَ تو بچارے داں ترا انچو سما کپیت کہ سید اے شئیر چوں رد ءُُ بند داتگ انت پرچکہ انچیں گرانیں ءُُ ذگریں بلوچی لبز وتی شئیرانی براہ کتگ انت کہ مردم ھیداں ءُُ ہبکہ بیت۔ واجہ اولی شئیری کتاب انگر ءُُ ترونگل بہ بیت یا دومی شائری کتاب برتکگیں بیر بہ بیت یاکہ آ دگہ شائری کتاب ،تاپکنیں ترمپ،سچکانیں سسا،شکلیں شہجو،گسد گوار،واجہ ءَ وتی درستیں بزاں ششیں شئیری دپترانی تہا ہماذگریں بلوچی لبز کارمز کتگ انت کہ ہرکسی گورا مارا اے رنگیں لبزیات گندگ ءَ نیانیت ۔داں اے گپاں زانگ بیتکہ سید ءِ راجی شائری بہ بیت یا اے دگہ پڑءِ شئیر بہ بنت سید ءَ بس ذگریں بلوچی لبزاں گوں وتی شئیرسمبہیتگ انت ۔سید ءِ شئیر چہ لبزیات ءَ سرریچ انت مرچی کسے سید ءِ شئیراں وان ایت آسر پد بیت کہ سید ہاشمی ءَ گوں وتی لبزیاتاں بلوچی زبان ءَ را مدامی زندگ کنگ ءِ ناتوامیں جہد کتگ کہ آئی ءِ مرگ ءَ چہ پد ہم بلوچی زبان زندگ انت ءُُ واجہ ءِ لبزیات ہم بلوچی زبان ءَ زندگ داشتگ انت کہ جوانیں رنگے ءَ کارمرز بوتگ انت ۔