گوادر ءِ بندن بلوچستان ءُُ افغانستان ءِ مادناں کارمرز بیت ۔سی پیک ءِ بندری منگ نامہاں اے گپ پرشتگ ءُُ دیم ءَ آتکگ کہ گوادر بندن ایوک ءَ پہ بلوچستان ءُُ افغانستان ءِ مادناں درملک ءَ برگ ءُُ بہاکنگ ءَ کارمرز بیت سی پیک ءِ چیریں کاگداں اے گپ دیم ءَ آتکگ کہ چین وتی مزنیں بیپار ءِ ھاترا گوادر ءِ بندن ءَ ہچ پیم ءَ کارمرز نہ کنت۔ گوادر ءِ جاوراں گندگ ءَ گوں ہم ہمے گمان بیت کہ چین ءِ نیمگ ءَ گوادر بندن ءِ کامرزی ءِ ہچ وڑیں راہ ءُُ درے نگواہ ات ۔

اے درگت ءَ ڈان نیوز ءَ سی پیک ءِ اے کاگدانی چار ءُُ ٹپاس کتگ کہ آہانی ردءَ ماں سی پیکءَ گوادر بند نءَ چشیں گیشیں ارزشت ءُُ بستارے نیست پرچکہ چین گوادر ءِ بندن ءَ پہ وتی بیپار ءُُ ایندگہ سامانانی برگ ءُُ آرگ ءَ ہچ وڑءَ کارمرز نہ کنت۔ ڈان نیوز ءِ رد ءَ گوادر ءِ بندن ایوک ءَ پہ بلوچستان ءُُ افغانستان ءِ مادناں در ءَ برگ ءُُ دیم دئیگءَ کارمزر بیت پرچکہ چین ءِ ردا چین ءَ مزن ءُُ شاہیگانیں بیپار ءِ ھاترا گوادر ءِ ہچ وڑیں کارے نیست زانتکارانی گشگ ہمیش انت کہ چین پرے کار ءَ چاہ بہار ءِ بند ءَ کامرز کنت ۔

اے درگت ءَ پاکستان ءُُ چین ءِ میان ءَ اے نہ منی دیم ءَ آتکگ کہ چین پیسر ءَ ’’ایکسپریس وے‘‘ ءَ جوڑ کنگ لوٹ ات وھدیکہ پاکستان چہ چین ءَ اے لوٹ ءَ کنگان انت کہ آ گوادر بالی پٹ ءَ جوڑبکنت ۔ چہ ایکسپرس وےءِ جوڑ کنگءَ چین فن(fun) ٹورازم ءَ دیمروئی دئیگ لوٹ ات ءُُ اے درگت ءَ بلوچستان ءَ ویزا فری زون جوڑ کنگ لوٹ ات کہ ایشی ءِ ہچ وڑیں نپ ءُُ سیتے بلوچ مہلوک ءَ نہ رس ایت پرچکہ بلوچ مہلوک سیندک ءُُ حبءِ نگرہ ءُُ سہر ءِ پروجکٹاں چہ چین ءَ ناامیت ءُُ بے اوست انت ،سیندک ءُُ حب ءَ چین ءَ ہندی مہلوک ءَ ہچ وڑیں نپ ءُُ سیتے نداتگ بلکہ پہ کار ءُُ مزوری ءَ آئی ءَ چہ چین ءَ مردم آورتگ ۔وھدیکہ ہندی مردم بے روزگار بوتگ انت ۔

گوادر ءِ کش ءُُ گور ءِ کاراں ہم گشگ ہمیش انت کہ چین چہ وتی ملک ءَ مزور ءُُ ایندگہ کاری گراں آرگ ءَ دلمانگ انت کہ اے گپ ءَ اے وہد ءَ حاکم ءُُ حکمران چہ بلوچ مہلوک ءَ پہنیام کنگ ءُُ چیر دئیگ لوٹ انت ۔اے بابت ءَ بلوچ ءِ ترس ایش انت کہ اگاں بلوچستان ویزا فری زون کنگ بوت گڑا سک باز چینی مردم بلوچستان ءَ جاہ منند بیت کہ آئی ءَ را بلوچ ہچ وڑ امنگ ءَ تیار نہ بیت۔

اد اے گپ گیر آرگی انت کہ گوادر ءِ بالی پٹ ءِ کار جنرل مشرف ءِ دور ءَ بنا بوتگ ۔بلئے آ زمانگ ءَ فنڈ نہ بوہگ ءِ سوب ءَ اے کار سرجم کنگ نہ بوت ۔ بندر ءَ چین ءِ دلگوش گوادر ءُُ اورماڑہ ءِ بندن ءِ سیلانی کار انت ۔چین اورماڑہ ءِ سرا جوانی دلگوش کنگان انت تنکہ اے دمگ ءَ سیل ءُُ سوادی گشاد کاری بنا کنگ بہ بنت ۔اے درگت ءَ چین پاکستان ءَ زور دئیگان انت کہ بلوچستان ءَ چینی آں بے ویزاءَ بلوچستان ءَ آہگ ءُُ رؤگ ءِ اجازت دئیگ بہ بیت ءُُ اے دمگ کروز کلب ءُُ بندنی سیلی ءُُ سوادی ہندے جوڑ کنگ بہ بیت۔

چینءِ رد ءَ کیٹی بندن ءَ بگرداں جیونی ءَ کروز کلب ،آپی گراب دارف روم ،کروز ہوم پورٹس ءُُ ایندگہ آسراتی سیل ءُُ سوادی مردماں پجارینگ بہ بنت اے درچ ءَ سی پیک ءِ اے کاگد ءُُ منگ نامیاں بلوچستانءِ مالیاتی ءُُ چاگردی دیمروئی ءِ ہچ وڑیں گپ ءُُ حبر نیست۔

ادا اے گپ ہم گیر آگیرگی انت کہ ہمساہگیں اے بہتام ءَ جنگان انت کہ چین گوادر ءَ یک بیپاری ہندے ءَ گیش یک ’’ اردی جاہ ‘‘ یے ٹہینگ لوٹ ایت ءُُ فن ٹورازم ءِ مول ءُُ مراد ہمے اردی آفیسر ءُُ مردمانی دل وشی انت بلئے گپ ایش انت کہ اے درگت ءَ بلوچ ءَ چے ریست؟ اگاں بلوچ سی پیک ءِ بہر ءُُ ونڈاں بے بہر ءُُ زبہر بیت گڑا آ چون دری مردماں ایمنی ءَ وش اتک کنت اے بابت ءَ بائدیں واکدار مرچی ءَ سوڈگ بکن انت پرچکہ باندا بلکیں راجاں اے وڑیں موہ ءُُ نوبتے دست مکپ ایت۔