روتاکاں نوکیں حالے شنگ بوتگ کہ پاکستان ءِ حکومت ءِ نیمگ ءَ جار جنگ بوتگ کہ بلوچستان ءِ اشکر ءِ کہناں چین ءِ سپرد کنگ بیت کہ پہ بلوچ مہلوک ءَ نوکیں تکانسر یے حالانکہ چشیں نوبتے نہ یتکگ کہ بلوچستان ءِ ایندگہ کار ءُُ منصوبہاں چین ءِ سپرد ءَ دئیگ ءِ وہد ءَ بلوچستان ءِ مہلوک ءُُ جہگیر جست کنگ بوتگ انت البت پہ دست نالے ءَ بلوچستان ءِ سروزیر چین ءَ برگ ءُُ آرگ بوتگ انت ۔

بلئے گپ ءِ درچ ءَ آہاناں واک ءُُ اختیارے نہ بوتگ اے درگت ءَ دو در زنک پروجیکٹ بہ بیت یا سیندک پروجیکٹ ،گوادر پورٹ بہ بیت ،سی پیک ءِ راہ ءُُ دریا نوکیں ریکوڈک پروجیکٹ ءَ را چہ ٹیتیان کمپنی ءَ پچ گرگ ءُُ چین ءِ سپرد کنگ ءَ ،ہچ وہد ءَ بلوچ مہلوک ءَ را دپی جستے کنگ نہ بوتگ۔

لہتیں وہد ءَ ساری وہدے ریکوڈک پروجیکٹ چہ ٹیتیان کمپنی ءَ پُلگ بوت گڈا اے کمپنی اے ناروائی ءِ ھلاپ ءَ عالمی آمید گیس ءَ شت کہ اودا اے کمپنی نیمگ ءَ بلوچستان حکومت ءَ ۴۲ ارب ڈالر ملام کنگ بوت پدراانت کہ بلوچستان ءِ حکومت ءِ کر ءَ ہنچو زر نیست کہ اے کمپنی ءَ بدانت ا ے وہد ءَ سرپدیں مردمانی گشگ ءِ ردا چین ءَ حکومت ءَ کڈن کتگ کہ اگاں ریکوڈک چین ءَ پہ لیز ءَ دئیگ بہ بیت گڑا چینءِ حکومت بلوچستان ءِ ملاماں پہ ٹیتیان کمپنی ءَ پُر کنت ۔

بلئے اے درچ ءَ گپ ایش انت کہ اگاں ٹینتاں کمپنی ءَ ۴۲ ارب ڈالر پہ ملام رسیت ءُُ اے ملاماں بلوچستان ءِ حکومت ءِ نیمگ ءَ چین دنت ءُُ چین اے زرانی پشت ءَ ریکوڈک ءِ پروجیکٹ ءَ پہ لیز زور ایت گڑا اے درائیں کار رپک (Process) ءَ بلوچ ءَ چے رسیت ؟ پدرانت کہ بلوچستان ءِ بلوچ ءُُ میرٹ دوستیں حکومت ءِ برکت ءَ ٹیتیان کمپنی ۴۲ ارب ڈالر دست کپ ایت ءُُ چین ریکوڈک پہ لیز ءَ ہمے زرانی پشت ءَ پشت جنت گڑا بلوچ کجام باگ ءِ بٹاک بوت ؟

اے ہما کُڈگ ءُُ کارچ ءِ کسہ انت کہ کارچ کڈگ ءِ سرا کپیت یا کڈگ کارچ ءِ ،تل کڈگ ءَ بوہگی انت۔ ہمے وڑا بلوچستان ءِ نوکیں راج دوستیں ( پشتون،بلوچ) پارٹی گل ءُُ شادان انت کہ ٹیتیان کمپنی ءِ ملاماں چین پُر کنگان انت اشانی گل ءُُ شادانی وتی جاہ ءَ بجا انت بلئے بائدیں اے پارٹیانی ورکر وتی رہشوناں جست بکن انت کہ چین ءِ اے ملاماں دئیگ ءَ بلوچ ءَ چے رسیت ؟

بلوچ ایوک ءَ چوکڈگ ءَ کپ بوہگان انت ءُُ وروک دوئیں درآمدانت ۔اے درگت ءَ بائدیں بلوچ پارلیمانی جہگیر راجکاری ،کارکندہ ءُُ راجکاری گل پارلمنٹءُُ دمک ءُُ دگاں اے زہر شانی بکن انت کہ آیا بلوچستان چین ءِ آزاد کشمیر انت کہ ہرچی کہ چین ءِ دل لوٹ ات بکنت ؟

اے ویدکہ بلوچستان ءَ درائیں مادنی پروجیکٹ چین ءِ دست ءَ انت ءُ چین چہ اے منصوبہاں ارباں ذالر زرگرگان اِنت بلوچ ءَ چے نپ ءُُ سیت رسگان اِنت، اے درچ ءَ پدرانت کہ سی پیک ءِ سرجم بوہگ ءَ پد بلوچستان ءِ بستار چین ءِ دست ءَ چہ آزاد کشمیر ءَ گیشتر نہ بیت دومی نیمگ ءَ بلوچستان ءَ ایک اشکرانی کہن بوتگ انت کہ تنگا چین ءِ دست ءَ نہ بوتگ انت ۔

بلے روتاکانی حالانی رد ءُُ نوں بلوچستان ءَ ہستیں اے اشکرانی کہن ہم پہ لیز ءَ چین ءَ دئیگ بنت ءُُ چین بلوچستان ءِ چیز زمین ءِ بادشاہ بیت۔دومی چین سیندک ءُُ دو درزنک پروجیکٹ ءَ گندگ بوتگ کہ آئی ءَ بلوچستان ءُُ بلوچ ءَ بل ایوک ہمے تحصیل ءِ مردماں ہم جوانیں آسراتی یے نہ داتگ بلکہ ہمے دوئیں پروجکیٹاں آئی مزور ہم چہ چین ءَ آورتگ انت بلئے بقول عطاشاد

چمے بہ بیت پہ گندگ
گوشے بہ بیت پہ اشکنگ!