|

وقتِ اشاعت :   June 11 – 2017

بلوچی ءَ گشنت کہ گپ ءَ ہمود ءَ بجن کہ گپ گوشدارگ بیت ،بلئے اے کور ءُُ کریں ملک ءَ اگاں کسے وتی زارشانی ءَ درشان کنگ ءَ اِنت گڑاں چرائی ءَ مستریں جاہل نیست ۔۔۔۔۔۔دو سے ماہ اِنت دو نندانک پہ وتی ھق ءُُ مزانی ھاترا کوئٹہ پریس کلب ءِ دیم ءَ جنوک اِنت بلئے سوگند بدئے کوئٹہ ءِ وزیر ءُُ گزیراں کہ یک روچے بیا اَنت ءُُ ایشان جست بہ کن اَنت کہ شمئے جیڑگ ءُُ جنجال چے چے اَنت؟ شمئے پرچکہ دو ءُُ سے ماہ اِنت اے دگ ءَ گژن ءُُ تن ءَ نشتگ اِت ۔

اے سد ءُُ سما کسے سمائی ءَ نہ اِست اِنت ءُُ نیکہ واجہ حدا ءَ ایشاناں انچو بود ءُُ سما مان کرتگ۔جی ہو ۔۔۔۔۔یک ننداکیں وَ انچین اِت کہ آئیءِ نام گرگ بزاں ساہ ءِ برگ اِنت زانوک اِش زان اَنت کہ کجام بیگواہیں نندانک بلئے ہما دوئیں نندانک کہ چریشاں یکے پیرا میڈیکل اسٹاف ئیگ اِنت ءُُ دومی بلوچستان یونیورسٹی کوئٹہ ءِ ہما نودربرانی اِنت۔

کہ اے رمضان ءِ ماہ ءَ بے آپ ءُُ توشگ ءَ گرم ءِ سرا نشتگ اَنت آہانی حق ءُُ ہلاریں لوٹ ہمیش اِنت کہ آہاں مزن شاہ دربرجاہ ءِ کماش بزاں vcواجہ جاوید اقبال صاحب ءِ کتہ کاریانی پداں وتی زار شانی درشان اِنت کہ آئیءَ وانگ ءِ نام ءَ چون چونیں کار کتگ ۔آئیءِ کتہ کاری انگت ءَ بزگ ءُُ درتہ پچیں نودربرانی کوپگاں چو زمبل ءَ ایر اِنت کہ آہانی نزوریں کوپگ ایشی ءِ آٹیگ ندار اِنت ۔

یکے وَ فیسانی روچ پہ روچ گیش کنگ دومی نودربرانچوگشئے یک زندانے ءَ بندیگ اَنت درائیں نیمگ ءَ سپائیگ ءَ ابید دگہ ہچی نیست کس اے گمان نہ کنت کہ اے یک مزن شاہ دربر جاہے انچو سمابیت کہ یک آرمی کیمپے ہمے جیڑگانی گشواری ءَ نودربراں اے نندانک جتگ ءُُ وتی زارشانی ءَ اے کور ءُُ کریں حکومت ءَ کنگ ءَ اِنت کہ بلئے اے گپ ءَ آاوں جوانی ءَ سرپد اِنت کہ

سا ہ کندن ءِ چم پاچی ءُُ بے گوانکی ءَ است اِنت زبان
بلئے چمے بہ بیت پہ چارگ ءُُ
گوشے بہ بیت پہ اِشکُنگ

بلئے بیا کہ نوکیں زر گری ایشانی سند ءُُ کاگدانی وئیرافائی ءِ نام ءَ بندات کتگ وئیرافائی ءِ مانا ہمیش انت کہ فیس ءَ ایوک ءَ جم بہ کن پدا یکیں منٹ ءَ تئی سند ءُُ کاگد دستخط ءُُ مہر جنگ ءُُ دئیگ بنت بس بوت۔۔۔۔کجام دنیا ءَ وئیرافائی چش بنت ءُُ اے ہساب ءَ ہما دُز چتور شوہاز گ بیت باریں ؟ بلئے کئے ایشاں جست کنت کہ مزن شاہ دربر جاہ ءِ کماش ءَ اے فرمان جار ی کتگ ۔۔۔۔۔۔

انوگیں گپے کہ پہ ایم فل ءُُ پی ایچ ڈی ءِ نودربرانی سرا وبال کنگ ءُُ زر گرگ ءِ نوکیں بددتے ایشاں ٹہینتگ اِنت کہ سال ءِ نیم ءَ نوں ایشاں سد کتگ کہ نودربرانی چیزے ڈاکومنٹس کم اَنت میڈ ٹرم ہلاس بوہگ ءَ رند نوں ایشان سما کتگ کہ زرگرگ ءِ نوکیں راہ ئے چمداں شوہازگ بیت کنت ۔

نوں ایشاں چوش کتگ کہ ہما نودربر ءِ کہ سند است اِنت آہاناں گشگ بوتگ کہ ایشانی ڈی ایم سی آں جم بہ کن اِت ءُُ ہما آہانی کہ ڈی ایم سی جم بوتگ اَنت آ گشگ بوتگ اَنت کہ شما وتی سنداں جم بہ کن اِنت ۔

پرچکہ چیزے نودربر انچیں است کہ آہانی سند ی سال سرجم نہ اَنت پمشکا وتی سند کشگ ءِ ہاترا آ دوسری زر گرگ بنت پمشکا اے پندل سازگ بوتگ سرجمیں مزن شاہ دربرہ جاہ ءَ ہزارانی ھساب ءَ ایم فل ءُُ پی ایچ ڈی ءِ نودربر وانگ ءَ اَنت چریشی ءَ لکھانی زر ایشان دست کپ اَنت ۔پمشکا وی سی ءُُ کنڑولر ءَ یکجائیں پندل اِنت کہ ایشانی چوش زر بگر اِت ۔

ہمے بے حقیں کار ءِ ہلاپ ءَ مرچی سے ماہ ءَ برز اِنت کہ نودربراں نندانک جتگ بلئے ہرام بات کسے نئیت ایشانی عرض ءُُ پریات ءَ گوش ندارایت کہ اے پرچکہ انچو تکانسر اَنت۔۔۔۔۔

اتکگیں وی سی ءَ گوں وتی ہمشریکاں مزن شاہ دربر جاہ ءَ چیزے ماڑی وَ جوڑ کت پہ پیشدارگ ءِ ھاتر ءَ بلئے آئی ءَ جست بہ بیت کہ ایشانی ٹھیکدار کئے بوتگ اَنت۔۔۔۔۔؟

درست ہمائی ءِ جند ءِ سیاد ءُُ عزیز بلئے کئے ایشان جست کنت آ پمے ہاترا ءَ شیکل اَنت کہ کس ایشاں جست نہ کنت کس جست کنوک نیست پرچکہ ایشانی سرا نندوکیں مردم درست زروار اں کئے ایشاں جست کنت ۔

پمشکا ہرچی کہ آہانی رزا بیت آ ہمائی ءَ کن اَنت ءُُ جست کنوک نیست ۔من پمشکا ہمے گشگ اَنت کہ اے نندانک کہ جنگ بوتگ اَنت اے پہ مپت اَنت ایشانی اگدگان کس پلیت نہ کنت یک برے ساری اوں آمیدگس ءَ وی سی لوٹائینگ بوتگ بلئے آ نہ شتگ اَنت پرچکہ آئی ءَ زانتگ کہ آئیءِ دست سری مردم آئیءَ را ہروڑ رکین اَنت ۔۔۔۔۔

پمشکا وی سی گوں وتی کنٹرول ءُُ اے دگہ ہمپتیں مردماں ہما میر ءِ شنک ءِ پیم ءَ اِنت کہ ایشاں کِچ ءُُ تُت پر نیست ۔۔۔۔۔۔دگہ نندانکے پیرامیڈیکل ءِ ممبراں جتگ کہ آہانی حقیں مُز آہاں دئیگ بوہگ ءَ نہ اِنت نوں اگاں اے اسٹاف نادراہ جاہ ءَ مہ بنت گڈاں نادراہانی چارگ ءَ کئے کنت ؟

وزیر ءُُ گزیر وَ وتی علاج ءَ درملکاں رواَ نت گار اِنت سدو ءُُ گوں مرد ءَ آئی ءَ دووہد ءِ ورگ نیست آ کجا وتی علاج ءَ بروت ۔۔۔۔! بلئے جست کنوک نیست ۔اے جیڑگانی گشوار کنوک

نیست پمشکا شاعر ءَ وش گشتگ کہ
ہچ مہ گش گنگ بُہ بو زبان منی
اِش نہ کنت آ وَ مہربان منی