|

وقتِ اشاعت :   5 دِن پہلے

بلوچ پارلیمانی راجکاری ءَ راج ءَ را دو نیمگی تاوان داتگ یک نیمگے بلوچ کٹم ءُُ قبیلہاں وت ماں وت ءَ گرءُُ چل کتگ ءُُ دومی گوں بلوچ ہمساہگاں جنگ ءُُ جیڑہ چو کہ پشتون ،ہزارہ ،ءُُ سندھی۔ 

۱۹۳۲ ءَ بگرداں ۱۹۷۰ بلوچ راجکاری گلانی سیادی گوں ایندگہ راجءُُ قبہلیاں جوانءُُ وش بوتگ انت بلئے گچین کاریاں پد اے سیادی آوڑا برجاہ نہ منت انت ہمے وڑا ۱۹۸۸ ءَ پد بلوچ راجمانی سیادی گوں ایندگہ راجاں ہوار بلوچ ءِ جند ءِ کومءُُ قبیلہاں نہ وش بوت انت اے وہد ءَ بازیں کٹمءُُ قبیلہاں کہ جنگءُُ جیڑہ است انت اشانی بنجلءُُ بندات چہ ۱۹۸۸ گچین کاریاں بوت انت ۔

اگاں گچین کاریانی پش در ءَ بلوچ راج ءِ نپءُُ سیتاں چارگ بہ بیت تانیستی ءِ بروبر انت وہدیکہ تاوان ایوک ءَ وت ماں وتی گوں ایندگہ راجاں ناتپاکیءُُ کشت ءُُ ھون پجگ ءِ ھد ءَ در انت ۔دومی بد بحتی ایش انت کہ ملک ءِ راجکاری ءَ ہچبر تچک ءُُ راستیں مردماں راج ءِ رہشونی ءَ نیلگ بوتگ پمشکہ پارلیمانی راجکاری ءَ مدام ہما مردم دیم ءَ اتکگ انت کہ ملک ءِ نگاہ ءَ پہک تچک بوتگ انت البت پدا اے گپ پاد کیت کہ بلوچ راج ءِ ہستی ءُُ ابدمانی، زبانءُُ دودمانیءُُ ربیدگ ءِ پہازگءَ پارلیمانی راجکاری ہژدری انت کہ ناں ؟ 

بائدیں بلوچ زانتکار ءُُ راجکار اے بابت ءَ سسا ءُُ جیڑگ بکن انت پرچکہ اگاں بلوچ راجکاری گل وتی کارندہ ءُُ کار دارانی کرداری ءُُ ذہنی ھئیل کاری ءَ جوانیں وڑے ءَ بکن انت گڈا مئے حیال ءَ بلوچ راج ءُُ ورناہاں پارلیمانی راجکاری ءِ جوانیں زلورتے نہ بیت بلئے اے بابت ءَ ہژدری انت کہ بلوچ پارلیمانی گل وتی کارندہءُُ کارداراں انوگیں راجکاری جندی نپءُُ سیتی لیکہ ءُُ پگر ءُُ لالچ ءُُ وت ساچی ءِ میناں بکش انتءُُ آہاں سرپد بکن انت ۔

کہ راجکاری ایوک ءَ آسراتی گرگ ءِ نام نہ انت بلکیں دیم ہونی ءِ نام انت کہ مردم وتی وہد، سنچءُُ لائقی، جان ءُُ مال ءِ قربانی ءَ بدنت پریشی ءَ بان ءُُ بنگلہ ءُُ ٹیھکہ ءِ طلبگار مہ بیت ۔

اے درگت ءَ یک جوانیں بلوچ راجکاری گلے ءِ مستریں ذمہ واری ایش انت کہ ورناہانی وانگ ءُُ زانگی کرداریءُُ ذہنی ھئل کاریءَ بکنت کہ آوکیں جاوراں آ وتارا داشت بکنت ءُُ وہد ءِ وشیں آسراتی آئی ءِ رو ءُُ دم ءُُ واہگ ءُُ تماہانی سرا سان ءُُ ناسے دور دات مکنت اے وہد ءَ بلوچ راجکاری گل ءِ ذمہ واری اے مہ بیت کہ آ پارلیمنٹ ءَ بروت ءُُ مہلوک ءَ آسراتی، نوکریءُُ ٹھکہ بدنت بلکیں ایش بہ بیت کہ آہانی ذہنی ءُُ کرداری ھئیل کاریءُُ انچو بکنت کہ آہانی تہا جندی نپءُُ سیت آسراتی ءُُ جندی وشحالی ءِ لیکہ ہلاس بہ بنت ءُُ آ یک وشیں بانداتے ءِ ھاترا وتی مرچگیں وشیاں قربان کت بکنت ۔

اے چشیں گرانیں کارے نہ انت بلئے ایشی ءِ ھاترا زلوری انت کہ پیسرا لیڈر وت ءَ را چہ اے وڑیں واہگ ءُُ تماہ ، وت گلائی ، نامءُُ وشنامی ءِ سبکیں لیب ءَ رکینت بکن انت ۔ دومی ہما لیڈر ءُُ رہشون چہ اے گلاں جتا ءُُ یک کرکنگ بہ بنت کہ آ بلوچ ءِ دشمنی ءُُ ایر مادی ءُُ مزنیں واکدارانی دست ءَ سبک کنگان انت ۔

اے درگت ءَ اگاں بلوچ گل پارلیمنٹ ءُُ ووٹاں نہ رؤگ ءِ جاراں بر پرین انت گڈا وت گرزیں بازیں مردمے وت چہ اے گلاں جتاءُُ گستا بیت ایندگراں وہد ءِ نشتکیں پہرگ وت پشت گیج ایت۔