| صد یق بلوچ

وقتِ اشاعت :   July 30 – 2017

مزن وزیر نوازشریف سپریم کورٹ ءِ سوڈگ ءَ داں عمر نااہل کرار دئیگ بوتگ ،چد ءُُ دیم آ ہچبر مزن وزیری ءِ اگدگ ءَ نامینگ نہ بیت ۔سپریم ءِ پنچ رکنی باسکاں یکجائیں فیصلہ کتگ کہ مزن وزیر ءِ سرا بستگیں درائیں بہتام راست بوتگ اَنت ءُُ آ چہ وزیری ءَ درکنگ ءُُ نااہل کرار دئیگ بوتگ۔

آئی ءِ کیس گیش پٹ ءُُ پولکاری ءَ عدالت ءَ روان دئیگ بوتگ ۔اے درگت ءَ سپریم کورٹ ءَ عدالت کنڈن کتگ کہ آ شش ہپتگاں داں مزن وزیر ءِ فیصلہ ءَ بہ کن اَنتءُُ اے ہم گشگ بوتگ کہ مزن وزیر ءِ ھلاپ ءَ شش ہپتگ ءَ پد ریفرنس درج کنگ بہ بیت ۔ابید چہ ایشیءَ سرجمیں کہول کہ ایشیءِ تہا حسن نواز،حسین نواز ،مریم نواز ءُُ آئی ءِ لوگواجہ کیپٹن صفدر ءِ ھلاپ ءَ ہم مقدمہ درج کنگ ءِ سوڈگ کنگ بوتگ۔

پاکستان ءِ سیاسی دپتر ءِ اے کلاں مستریں فیصلہ اَنت ءُُ ایشی ءِ آسرداں دیراں برجم مانیت۔اولی رند ءَ یک پرزوریں مزن وزیرے کہ راجی اسمبلی ءَ مزنیں کچے آئی ءِ منوگرانی است انتءُُ پنجاب ءُُ بلوچستان ءَ آئی ءِ پارٹی حکومتی است انت ،آئیءِ ھلاپ ءَ بدکردی ءِ بہتام پدر بوہگ ءُُ آئی ءَ را نااہل کرار دئیگ بوتگ ۔نواز شریف ملک ءِ مزن وزیری ءِ اگدگ ءَ ابید ہم مسلم لیگ (ن) ءِ صدر ہم بوتگ۔

اے سوڈگ ءِ سکیں اثر مسلم لیگ ن ءِ پارٹی ءَ ہم اوپارکنگی اَنت ءُُ ایشیءَ ابید پنجاب ءُُ بلوچستان ءَ ہم جیڑگ بوت کنت ۔سپریم کورٹ ءِ مزن وزیر ءِ داں عمر نااہل کنگ ءُُ الیکشن کمیشن ءَ را کڈن کنگ کہ آ مزن وزیر ءِ بدکردی ءُُ نااہلی ءِ رپورٹ ءَ زوت جاری بہ کن اَنت ،نوازشریف نہ ایوک ءَ ملک ءِ وزیری بلکیں ہچ وڑیں سرکاری اگدگانی لاحق نہ اِنت ۔

آئیءِ ہمرائی ءَ وزیر خزانہ اسحاق ڈار کہ مزن وزیر ءِ نزیکیں سیاد ءُُ مشیر ہم بوتگ آئیءِ ھلاپ ءَ ہم مقدمہ درج کنگ بہ بیت ابیش ایشی ءَ کیپٹن صفدر کہ مزن وزیر ءِ زامات اِنت آئی ءِ ھلاپ ءَ ہم مقدمہ درج کنگ بہ بیت ۔ نوازشریف ءِ عرب امارات ءَ یک مزنین کمپنی یے ءِ گوما سیادی اوں پدر بوتگ ۔چد ءُُ پد مسلم لیگ ءِ پارٹی ءَ را فیصلہ کنگی اِنت نوکیں وزیر کئے بیت ءُُ مسلم لیگ ءِ رہشونی ءَ کئے کنت۔

نیب حسن نواز،حسین نواز،مریم نواز ءِ ھلاپ ءَ ہم مقدمہ درج بہ کنت ءُُ ایشانی ھلاپ ءَ بدکردی ءُُ ناحقیں مال ءُُ مڈیانی چیر دئیگ ءِ بہتامانی راستی ءَ ایشاں زندان ءَ بندی ہم بہ کنت ۔
اے وڑ ءَ نوازشریف ءِ سیاسی آکبت سرجم ءَ ھلاس کنگ بوتگءُُ نوں آئیءَ سیاسی شرپ وتی ببا داتگ چد ءُُ پد آہچ وڑیں سیاسی چست ءُُ ایراں بہر زرت نہ کنت ۔زانتکارانی گشگ اِنت کہ نواز شریف ءَ پد دگہ چشیں مردم نگواہیت کہ آ مسلم لیگ ءَ یک مشت ءُُ یکجاہ بہ کنت ۔
اے وڑ ءَ پاکستان ءِ سیاسی جاوراں یک مزنیں بدلی یے پدر بوہگ ءَ اِنت ءُُ مسلم لیگ ءِ حکومت مداں مدان ءَ بیگواہ بوہان اِنت ۔ پمشکا چوہدری نثار ءَ دور چاری کتگ ءُُ وتارا چہ دومی مزن وزیر ءِ نامینگ ءَ دور داشتگ آئیءَ راجی اسمبلی ءَ چہ استعفیٰ ءُُ سیاست ءِ یلہ کنگ ءِ جارجتگ۔ 

پنجاب ءَ مسلم لیگ ءَ را یکجا ہ کنگ سک گران اِنت ءُُ مسلم لیگ ءِ پنجاب ءَ حکومت وتی ھلاسی ءِ سیمسراں سربوہان اِنت آں۔۔۔۔ نوں اے چارگی اِنت کہ نوازشریف ءِ نزیکیں سیادءِ بھارت ءِ اے بابت ءَ ردِعمل چے بیت۔