انچوکہ شاعراں کیگدیں ءُُ ماہلیں وتی دوستدارانی توسیپ کنان ءَ آھانی لڈگ ءَ رواجانان گوں کبگ ءَ شبین داتگ ۔بزان بلوچ زالبول ءِ لڈگ ءُُ رواج چو کبگ ءَ وش اَنت ۔

ادا اے گپ زاہر بیت کہ بلوچی شاعرانی کرا ھر وھد ءَ کہ وتی دوسردار ءِ رواجانی تعریف ءُُ توسیپ بوتگ گڈا آ گوں کبگ ءُُ سید ءِ کرام ءُُ تردھگاں ھمدیم کنگ بوتگ بزاں بلوچ زالبول وش رواج انت ءُُ آئی ءِ لڈگ ءُُ ملگ مردم ءَ را دوست بنت ۔ 

ھمے وڑا اگاں ما بلوچ زالبول ءِ بالاد ءُُ ڈیل ءِ گوناپ کشی ءَ بکناں گڈا شاعرانی شئیرانی تہا آئی ءِ بارگیں سیرین ءِ تعریگ ءُُ توسیپ ھم گندگ ءَ کیت چوشکہ نامداریں شاعر مست توکلی وتی شئیر ءِ تہا گوشیت۔

پَنّ ءِ شرنت چھو تھنگویں دیماں 
دار ہما رنت چھو بارغین سریناں 
ترنداں چھو آ منٹر داتغیں تیغاں 

بارگیں سیرین زالبول ءِ جلواہ ناکی ءَ پدّر کنت ءُُ بلوچ زالبو ل ءِ تعریف ءُُ توسیپ کہ شئیرانی تہا گندگ بنت آھانی ھم ھمے پدر بیت کہ بلوچ زالبول ءِ ڈیل ءُُ آئی ءِ بارگیں سیرین آئی ءِ بالادی دروشم ءِ وش رنگی ءِ نشان انت بارگیں سیرین ءَ ابید بلوچ زالبول ءِ دگہ یک براھدرین چیدگے آئی ءِ چم انت کہ شائراں وتی شئیرانی تہا بلوچ زالبول ءِ چمانی تعریف گوں قدح کیف ءُُ خمار ءَ کرتگ چوشکہ عطا شاد وتی لچہ ءِ تہا گوشیت کہ 

منی بانک اے تئی قدحیں چمانی خمار
تئی حون رنگیں ’’ منابس‘‘ 
اے انارکانی انار
چون من ءَ داغ دئینت !! گار کن انت
چومہ ساڑائیں وت ءَ ‘‘ 

اے شئیر ءِ تہا عطا شاد یک انچیں بانکے ءِ تعریف ءُُ توسیپ ءَ کنگ ءَ انت کہ آئیءِ چم چو شراب ءَ سرور بکش اَنت ءُُ خمار انت ءُُ آئی ءِ سہریں انارکانی رنگ چو ھون ءُُ وانار ءَ شہر انت آگوشیت کہ تئی چارگ من ءَ داغ دنت پرچاکہ تو انچو شررنگ ئے ۔

بلوچی شاعری ءِ تہا بلوچ زالبول ءِشررنگی ءُُ ڈولداری ءِ تعریف ءُُ توسیپانی تہا آئی ءِ بالاد ءُُ لقاہ ءِ رنگ ءُُ دروشم شریں وڑے ءَ ودی کنگ بوتگ ۔بلوچ زالبول ءِ رنگ ءُُ دروشم ءِ ستاہ نہ ایوک ءَ آئی ءِ خماریں چم کبگی لڈگانی ءُُ بارگیں سیرین چیدگ ءَ زاہر کنگ بوتگ بلکیں آئی ءِ ہر کہیب ءُُ داب ءُُ آئی ءِ ہرعضا ءِ توسیپ ءُُ ستاہ آئی ءِ رنگ ءُُ دروشم ءِ گوناپ کشی ءَ کنت ۔

زالبول وت دنیا ءِ شررنگ تریں زات انت آ چہ ہر زات ءُُ راج ءَ بہ بیت آئی ءِ براھداریں لقاہ ءُُ بالاد ستاہ لائق اِنت ھمے رنگ بلوچ زالبول ھم یلیں ءُُ دیوانگیں مئے مرید وتی وابانی بانک حانی ءِ توسیپ چے وڑا کنت دلگوش کن ات

مسک شنزیں چہ بمبویں بیکاں 
سنبل ءُُ نوک رودیں گوئراں وشبو
کنت کہیبے پہ ریدگیں چماں 
ہردم ءَ رسینت گور ءِ درئمان

شے مرید پہ حانی ءَ اے شئیر گشتگ کہ آئی ءِ تہا حانی ءِ شررنگی ءُُ براھداری ءِ توسیپ ءَ کنان ءَ گوشیت کہ حانی ءِ لنٹ بے مسواک ءُُ پن ءَ شہر انت ءُُ آئی ءِ بمبویں بیکاں چہ مسک ءِ وشبو کیت ،آئی ءِ چم بے کنجل ءَ سیاہ ءُُ خمار انت اصل ءَ ھانی ایوک ءَ شے مرید ءِ دوستدار ءُُ وابانی بانک نہ اِنت بلکیں یک بلوچ زالبولے ءُُ حانی گوں وتی براھداریں رنگ ءُُ دروشم ءَ ہر بلوچی زالبول ءِ نمائندگی ءَ کنت ۔ 

ہر چون کہ بلوچ زالبول ءِ رنگ ءُُ دروشم ءِ توسیپ ءُُ ستاہ شئیرانی اندر ءَ کنگ بوتگ کہ بلوچ زالبول وتی وش رنگی ءُُ براھداری ءَ ستاہ کرزیت بلئے بلوچ زالبول ءِ اصل رنگ ءُُ دروشم آئی ءِ غیرت ءُُ ننگ اِنت ،آئی ءِ پردہ داری انت ۔آئی ءِ شاھدکاری انت آئی ءِ مہمان داری انت آئیءِ شیرزالی ءُُ مزن جگری انت ۔بلوچ زالبول ءِ لج ءُُ میار ءِ ملاقاسم وتی شیرانی تہا گوشیت۔

جن مزن لجین ہمائینت ہنچیں کردار نہ کنت
برادب نشتگ بہ لوگ ءَ سیل بازار نہ کنت

اے شئیر ءِ تہا یک مزن لجیں بلوچ زالبولے ءِ کرد ءِ بابت ءَ گوشگ بوتگ کہ ملاقاسم وتی شئیر ءِ اندر ءَ گوشیت کہ ادب داریں جنین وتی لوگ ءَ نندیت ءُُ بازار ءَ تروگرد نہ کنت آئی ءِ توار مزن نہ بیت آ غیر محرمیں مردین ءِ دیما سینگار نہ کنت آوتی برات ءُُ پت ءَ غم زدگ ءُُ وتی وجود ءَ شرمسار نہ کنت ءُُ وتی لج ءُُ ننگ ءِ پاسداری ءَ کنت ایش انت بلوچ زالبول کہ آئیءِ توسیپ ءُُ ستاہ ءُُ آئی ءِ رنگ ءُُ دروشم ھم ھمیش انت بلوچ زالبول وتی لج ءُُ ننگ ءِ پاسپانی مشہور انت۔

اے بابت ءَ بی بی مہناز وتی بے گناھی ءُُ وتی لج ءُُ ننگ ءِ ھاترا گہگیری کنت ءُُ اے گوشیت کہ من بے میار اون ءُُ منی سرا بے بُنیں بہتام جنگ بوتگ ءُُ دروگ بندگ بوتگ۔اے بابت ءَ مہنا وتی بے گناھی ءَ زاہر کنگءِ ھاتر ءَ گہگیری کنت ءُُ گوشیت۔

من ھما انجیراں پتن تاکیں
برز ما کوھانی سرا رستاں 

پتن تاکیں انجیر انچو کہ محکم انت ءُُ زیبدار انت ءُُ گوات آئیءَ نہ چنڈ ینت ھمے وڑا بلوچ زالبول وتی لج ءُُ میار ءِ بابت ءَ نامدار انت ھمے وڑا نامداریں شاعر مست توکلی ھم وتی وابانی بانک سمو ءِ بابت ءَ گوشیت

سمو یہ سہر پھل ئے انارانی
سمو یہ ڈیو وے تہارانی

ایش انت یک بلوچ زالبولے کہ آئی حسن ءُُ لقا ہ ءِ توسیپ ھم بوھگا انت ءُُ آئی ءِ لج ءُُ میار ءِ بابت ءَ ھم گوشگ بوھگ انت ھمے لچ ءُُ میار بلوچ زالبول ءِ اصل رنگ ءُُ دروشم انت ءُُ انجیر ءِ مزن تاکی آئیءِ ننگ ءُُ غیرت لج ءُُ میار ءِ شبین انت ءُُ ھمے آئی ءِ رنگ ءُُ دروشم انت ھم بلوچ زالبول ءِ دروشم ماس ءِ بہ بیت کہ گہار ءِ یاجن ءِ بہ بیت کہ جنین چک ءِ ہر وڑا براھدار ءُُ لج ءِ ساٹوک انت ’’ یہ ماسے ءِ دنیا ءِ جوانیں چیز آئی بچ انت ۔

آ دنیا شریں چیز ءَ پہ وتی بچ ءَ گچین کنت یک بلوچ ماسے پہ وتی زہگ ءَ مال ءُُ زر نہ لوٹیت بادشاہی اوبان وبادگیر نہ لوٹیت آ گوشی کہ آئی بچ زحم جنے بہ بیت گڈا آئی مراد حاصل بنت آ وتی گوازگی زہگ ءَ چولولی دنت کہ 

قرباناں ہما روچانی 
منی بچی بوردبورسوار بیت
گوں پنجاہ نر مزاریں بیلاں 

ایش انت یک بلوچ ماسے کہ وتی بچ ءَ را لولی دیان ءَ ھمے پنت ءَ دنت کہ تو مزن بئے یک بور سوار ے بئے ءُُ گوں وتی بدواھاں چو مزار ءَ مڑئے ءُُ جنگ کنئے گڈا من ھماروچ گوں وتی ہمساھگ سیالاں پہ فکر تئی توسیپ ءَ کناں ۔ھمے وڑا یک گہارے پہ وتی گنگلیں برات ءَ اے وڑیں واھگ ءُُ ارمان داریت۔

بلوچ زالبول ءِ کرد آئی ءِ واھگ ءُُ واہشت آئی ءِ رنگ ءُُ دروشم ءَ پدر ءُُ زاہر کنت رنگ ءُُ گوناپ ءَ ابید بلوچ زالبول ءِ واھگ ءُُ واہشتانی تہا ھم شررنگی ءُُ براھداری گندگ ءَ کیت ءُُ آئی ءِ اے چیدگ آئی ءَ را چہ دنیا ءِ درائیں زلبولاں پرارزشت ءُُ جتا کنت۔
(گڈ ی بہر )