|

وقتِ اشاعت :   September 24 – 2017

پاکستانءِ کوہن تریں ءُُ نامدارتریں ٹی وی چینلے ءَ حال داتگ کہ پاکستان ءَ گوں بھارت ءَ بیپار ءِ چک ءَ 2013 ءَ بگرداں مروچی 7ارب کلدار ءِ تاوان بوتگ ۔اے حال ہمے ہپتگ ءَ دئیگ بوتگ وہدے بلوچستان اسمبلی ءَ بلوچستان ءِ پیسریگیں مالیات ءِ مشیر خالدلانگو بلوچستان ءِ زمیندارانی حکومت ءِ نیمگ ءَ پیمازاں نہ زورگءِ سرا چہ بلوچستان اسمبلی ءَ پہ زرشانی درکپتگ ۔

چد ءُُ ساری بلوچستان ءِ زمینداراں قلات ،مستونگ،نصیر آباد،سبی ءُُ بیلہ ءَ زرشانی کتگ کہ بنجاہی سرکار بلوچستان ءَ پیداک بوتگیں نیوگءُُ سبزیاں زورگ ءِ بدل ءَ چہ بھارت ءَ ہمے نیوگ ءُُ سبزیاں لوٹائین ایت کہ بلوچستان ءِ زمیندار کمتریں نرک ءَ اشاں بنجاہی حکومت ءَ بہا کنگ ءَ ساڑی انت۔ بلئے بنجاہی حکومت ءَ ہواریں بازیں مردم وتی جندی کمیشن ءِ ھاترا بلوچستان ءِ زمینداراں چہ اے چیزاں زورگ ءِ بدل ءَ چہ بھارت ءَ لوٹائین انت ۔

ا ے درچ ءَ نوک تریں حال ٹی ویاں شنگ بوہگان انت کہ گپ ایوک ءَ کمیشن ءِ نہ انت بلکیں 2013 ءَ بگر بھارت ءِ دوستی ءَ ملک ءَ را 7ارب کلدار ءِ تاوان دئیگ بوتگ ۔

بلئے اے ہما تاوان انت کہ گوں بھارت ءَ بیپار درچ ءَ کنگ بوتگ انت وہدیکہ دومی دست ءَ 2013 ءَ داں روچ ء مرچی بلوچستان ءِ زمینداراں کہ ہرچ تاوانے رستگ آہانی حساب جنگ بوہگان نہ انت پمشکہ چاگردی رسانک در ءُُ یک جنزے دیم اتک کہ بنجاہی حکومت بائدیں’’ بلوچستان ءِ مسلمانانی ہم نیوگ ءُُ سبزیاں بہا بزور ایت ‘‘۔

اسل ءَ ادا اے گپ دیما آرگ بوتگ کہ وتی جند ءِ ملک ءَ زمیندارانی محنت ءُُ حذمت ءِ قدر بوہگان نہ انت ءُُ دومی دست ءَ پاکستان ءِ ازلی دشمن ءُُ درمسلمانین ملک بھارت ءَ گوں بیپار بوہگان انت پمشکہ خالدلانگو ءَ چہ بلوچستان اسمبلی ءَ زرشانی کتگ ءُُ چہ اسمبلی ءِ دیوان ءَ درشتگ پرچکہ اے اولی رند نہ انت کہ بلوچستان ءِ زمیندار اں گوں نارواہی بوہگان انت ۔

اے درچ ءَ پیسریگیں سالاں ہم مستونگ ،قلات،سوراب ،نال ، وڈھ،لسبیلہ ،مکران ،نصیر آباد ،سبی،آوران ،مشکے ءُُ جھاؤ ءِ زمینداراں بنجاہی حکومت ءِ اے کار پدانی سرا زرشانی درشان کتگ بلئے روچ ء مرچی بنجاہی حکومت ءِ گوش ءَ مورے نہ وارت چریشی ءَ بلوچستان ءِ زمیندارانی تہا یک مارشتے ودی بوتگ کہ بلوچستان ءِ مردماں بنجاہی حکومت پاکستان ءِ مردم سرپد نہ بیت ننکہ اے مردمانی تاوان ءَ وتی جند ءِ تاوان سرپد بیت ۔

ہمے حال مکران ءَ ارماگ ءُُ ناہ ءِ زمیندارانی ئیگ انت آہانی گلہ گوں ہندی ءُُ بنجاہی حکومت ءَ ہمیش انت کہ حکومت چہ سعودی ءُُ عراق ءَ ناہ ءُُ ارماگ لوٹائین ایت بلئے مکران ءِ زمیندارانی ارماگاں بہا نہ زورایت ءُُ ننکہ آہان چشیں آسراتی دنت کہ آ وتی ناہ ءُُ ارماگان داں مارکیٹ ءَ جوانیں وڑے سرکت بکن انت حالانکہ اگاں بنجاہی حکومت بلوچستان ءِ زمینداراں جوانیں آسراتی بد گڈا حکومت ءَ چہ درملک ءَ نیوگ ءُُ سبزی آرگ ءِ زلورت نہ بیت


بلوچستان ءِ نیوگ ءُُ سبزی نہ ایوک ءَ پاکستان ءِ چاریں دمگانی زلورتان پورا کن انت بلکیں پاکستان اشاں درملک ءَ دیم دات ءُُ مزنیں حدے ءَ زرمبادلہ کٹ ات کنت ۔
بژنی گپ ایش انت کہ بلوچستان ءِ اسمبلی ءَ اے وہد ءَ 65 باسک ساڑی ءُُ نندوک انت بلئے بلوچستان ءِ زمیندارانی حق ءُُ انصاف ءِ حاترا بید ء خالد لانگو ءَ یک راج ءُُ وتن دوستے ءَ اے توپیک نہ بوت کہ خالدلانگو ءِ ہمراہ داری بکن انت ۔

حالانکہ اسمبلی ءَ نشتگیں گیشتریں باسک وتارا راج دوست ءُُ قوم دوست گش انت بلئے اے وڑیں راجی جیڑہانی سرا وتارا گنگ ءُُ کور کن انت ۔نوں وہدے ھال درائیں ملک ءَ شنگ انت کہ پاکستان ءَ گوں بکالیں بھارت ءَ بیپار ءِ چک ءَ 7ارب کلدار تاوان بوتگ گڈا بائدیں بلوچستان ءِ راج دوست اے گپ ءَ دیم ءَ بیار انت کہ ملک ءَ چدو گیش نقصان ءُُ تاوان دئیگ مہ بیت ءُُ پہ نپ ءُُ سیتءِ حاترا بائدیں بلوچستان ءِ زمیندارانی گوانک ءُُ توار گوشدارگ بہ بنت ءُُ آہاناں آپ کاری ءِ جوان تریں آسراتی پجارینگ بہ بنت تنکہ دیمتری سالاں پاکستان ءِ بیپاری تاوان چہ 7ارب ءَ کمتر بہ بیت۔