| صد یق بلوچ

وقتِ اشاعت :   October 15 – 2017

آرمی چیف جنرل قمر باجوہ ءَ اے گپ ءِ سرا زور پر داتگ کہ اردی ءُُ مالی دیمروئی ءِ درمیان ءَ بائدیں یکوئی ءُُ یک درچی بہ بیت۔آئی ءَ پہ گچینی بلوچستان ،میانی سندھ،زرباری پنجاب ءُُ گلگت بلستان ءِ گپ دیم ءَ آؤرتگ کہ اے ملک ءِ پدمنتگیں تریں دمگ انت ،اے دمگان دیمروئی ءِ اتگ ڈلگچار کنگ بوتگ بلکیں گوریشاں روءُُ ریائی ہم کنگ بوتگ۔

۷۰ سال گوزگ ءَ پد ہم اے دمگان آئندگ ءِ دیمروئی ءِ حاترا ہچ وڑیں بنکی ءُُ بندری دیمروئی کار کنگ نہ بوتگ انت ءُُ اگاں نوں اے بنکی کار بنا کنگ بہ بنت گڈا پریشی ءَ دگہ پنجاہ سال درکار بیت ۔اے پد منتگی ءِ مستریں درور بلوچستان انت کہ ایشی دور ءُُ دراجیں دمگاں ہچ وڑیں کارجاہ نیست ءُُ بلوچستان ءَ ہرچ کار جاہ یے کہ ہست انت آ چہ بلوچستان ءَ گیش سندھ ءَ نپ پائدگ دئیگان انت ۔پرچکہ اے درائیں کار جاہ و ندر ءُُ حب ءَ جنگ بوتگ انت ۔

اے کارجاہ ہما وہد ءَ جنگ بوتگ ات انت کہ وہدے حکومت ءَ ٹیکس یلہ دات ءُُ ایندگہ آسراتی دات انت پدا وہدے پاکستان ءِ حکومتءَ اے آسراتی پچ گپت انت ،گڈ ا یکپارگی ءَ ۳۰۰ کارجاہ چہ حب ءُُ وندر ءَ پد اپنجاب ءَ شت انت کہ اودا حکومت ءَ ٹیکس یلہ کنگ ءَ ابید دگہ بازیں آسراتی دئیگ ءِ جار پرینت ۔ اے درگت ءَ بلوچستان ءَ ہرچ کارجاہ یے کہ جنگ بوت آ دراہ کراچی ءِ نزیک ءَ جنگ بوتگ انت ۔

پرچکہ اودا چہ ساری ءَ بنکی ءُُ بندری آسراتی است انت پمیشکہ یک حسابے ءَ اے درائیں کارجاہ کراچی ءِ بہرے بوتگ انت کہ اشانی تہ ءَ بازیں کار جاہانی ٹیلی فون ءُُ ایندگہ آسراتی بلوچستان ءِ بدل ءَ کراچی ءُُ سندھ ءِ بوتگ انت ۔اے درچ ءَ چہ بندات ءَ دور ءُُ دراجیں دمگاں مدام پدمنتگ دارگ بوتگ ،اے دمگاں چہ بندات ءَ بنکی ءُُ بندری آسراتی جوڑ کنگ یا دئیگ نہ بوتگ انت گڈا دیمروئی چہ کجا کیت ؟

بلوچستان ءِ بازیں دمگے پہ دیمروئی ءَ مزنیں بستار ءُُ ارزشتے دارایت ۔اشانی تہ ءَ لسبیلہ ،نصیر آباد ،مکران ءِ ہنداں ہوار درائیں تیاب دپی ہند ہور انت کہ اے دمگاں مزنیں مزکاری یے بوت کنت ۔ایرانی بندن چاہ بہار کہ چہ گوادر ایوک ءَ ۷۲ کلومیڑ دور انت ۔اودا جاپان ،کوریا ءُُ ایندگہ یورپی ملک ۵۰ ارب ڈالر ءَ گیش ءِ مزکاری کنگان انت ۔اگاں اے درائین ملک پیسرا گوادر ءَ مزکاری ءَ دل مانگ ات انت ۔

بلئے دیمروئی کارانی گشاد نہ بوہگ ءِ سوب ءَ درائیں ملکاں چاہ بہار ءَ کارکنگ ءِ سوڈگ کت ۔اے گپ چو چارگی انت کہ جاپان چاہ بہارءَ یک اسٹیل ءِ کارجاہ یے جنگان انت کہ آئی ءِ اسٹیل ودی کنگءِ کساس ۲۰ لکھ ٹن بیت وہدیکہ زرباری کوریا ءِ اسٹیل کارجاہ ءِ کساس ۱۵ لکھ ٹن بیت ۔بلئے ایشانی دیم ءَ دیمیءَ کراچیءِ اسٹیل کارجاہ ءِ کساس ایوک ءَ یک لکھ ٹن انت ۔

مکران ءِ تیاب آوکیں سالاں اے دمگ ءِ مستریں مالی ءُُ کارجاہی بنجاہ بیت پمشکہ زلوری انت کہ حکومت مکران ،لسبیلہ ،نصیر آباد ءِ دمگان گیشتر دلگوش گور بکنت ہمے وڑ ءَ گلگت بلتسان میانی سندھ ءُُ زرباری پنجاب ہم دیمروئی ءِ پشت ءَ کپتگ انت ایشیءِ سوب ایش انت کہ بنجاہی حکومت ءَ اے پدمنتگیں دمگاں باز کم دلگوش گور کتگ ءُُ پہ اے دمگاں ریاکاری کتگ، بنجاہی حکومت ءِ گیشتریں دلگوش میانی پنجاب ءُُ کراچی ءِ نیمگ ءَ بوتگ ۔

ایشیءِ سوب ءَ مہلوک بددل ءُُ ناامیت بوتگ انت ۔ آرمی چیف ءَ اشارہ ہمیش انت کہ پدمنتگیں دمگانی نیمگ ءَ بائدیں دلگوش گیشتر گورکنگ بہ بیت کہ آئی ءِ سوب ءَ اردی ءُُ مالی کارانی تہا ءَ یکوئی ءُُ یکدرچی کیت ۔پدرا نت کہ انوگیں جاوراں پہ گچینی رودارکی ءُُ روکپتی سیمسراں مزنیں ترسے دیم ءَ اتکگ کہ اے سیمسر مزنیں دلگوشے لو ٹ انت پمشکہ ملک رکینگ پیسر ءَ ءُُ دیمروئی کار پدا ملک پرچی رکینگ ءِ سرا لاپروائی بوت نہ کنت ۔

اے حاترا کہ ملک رکینگ چہ درستاں سرانت بلئے گوستگیں ۷۰ سالانی ردیانی راست کنگ ہم زلوری انت۔ اگاں مئے دری کارانی شہ زانتاں بندات ءَ اے ردی مکتین انت ءُُ گلگت بلتسان ءَ را پاکستان ءِ یک دمگے ( صوبہ) یے بکت انت گڈا امریکہ ہچبر سی پیک دگ ءِ سرا اتراز نہ کتگ ات ءُُ نہ گشتگ ات اے دمگ اڑوکی دمگے۔ بلئے بندرا اے جیڑہ ریاست ئیگ انت۔ریاست ہرچ سوڈگ کہ کنت مہلوک زلور آئی ءِ پلہ مرزی ءَ کنت پرچکہ ریاست سوڈگ پہ مہلوک ءِ نپ ءُُ سیت ءَ بیت ۔