چہ ۲۴ اکتوبر ءَ بلوچستان ءِ سر شہر کوئٹہ ءَ در ہچ وڑیں حالتاک ءُُ روتاک، ماہتاک ءُُ تاکبند بہر ءُُ شنگ نہ بوہگ ءَ انت ۔ایوک ءَ مردم الیکٹرونک رسانک در ءِ باپشت ءَ وتارا دنیا ءِ ھال ءُُ جاوراں سہی ءُُ سرپدی ءِ جہد ءَ انت ۔

بلئے ادا یک دگہ جیڑہ یے ہست کہ بلوچستان ءَ چوکہ گیشتریں جاہاں گروک (بجلی) نیست پمشکہ مہلوک چہ لیکٹرونک رسانک در ہم محروم انت ءُُ دومی گپ ایش انت کہ الیکٹرونک رسانک در ءَ بلوچستان ناں پیسر ءَ گندگ بوتگ ءُُ ننکہ نوں گندگ بیت البت دور ءُُ دراجیں دمگانی مردم درملکی ریڈیائی رسانک در ءِ بھروسہ نشتگ انت بزاں یکبرے پدا چو ۱۹۸۰ ءِ دھک ءَ بلوچستان ءِ مہلوک ءِ دنیا ءَ سیادی گوں ریڈویو ءَ بندوک انت ۔اے وہد ءَ بلوچستانءِ کوچگ ءُُ دمگاں پہ سرپدی ءِ ھاترا مستریں آسراتی بی بی سی ،وائس آف امریکہ ءُُ آ ل انڈیا ریڈیو انت ۔

اگاں کہ بلوچستان ءِ مہلوک پرے رسانک دری آسراتیاں گیشیں ہب ءُُ واہگے نیست بلئے گروک ( بجلی) نہ بوہگ ءِ سوب ءَ مردم مجبور ءُُ لاچار انت کہ اے شنگکاری ریڈویواں گوش بدارنت پرچکہ بلوچستان ءِ چاگردی ءُُ راجکاری دودمان دگرے ۔بلوچستان ءَ ہرگاڑی والا بہ بیت یا بان بندوکیں مستری ادا کس وتارا چہ ملک ءُُ درملکی بووکیں جاورحالاں گستا ءُُ دور کت نہ کنت ۔

بلوچستان ءَ مہلوک ءِ چاگردی ھیل کاری انچو بوتگ کہ ادا لس مردم ہم راجکاری،چاگردی ءُُ ایندگہ کاراں سہی ءُُ سرپد بوہگ ءِ جہد ءَ کنت پمشکہ بلوچستان ءَ مردم بید حال ءُُ احوالانی سرپدی ءَ نہ بنت اگاں ادا یک درے بند کنگ بہ بیت تا آ دومی در ءِ شوہاز ءَ درکپ انت اے وہد ءَ درائیں بلوچستان چوکہ روتاک ءُُ ایندگہ حالتاک بند انت دومی گروک نہ بوہگ ءِ سوب ءَ الیکٹرونک رسانک در ءَ مہلوک ءِ رسائی نیست انت ۔

اے درچ ءَ مہلوک بی بی سی ،وائس آف امریکہ ،ءُُ آل انڈیا ریڈیو ءِ گوشدارگ ءَ مجبور انت اے درگت ءَ بژنی گپ ایش انت کہ نہ دمگی ( صوبائی) حکومت ءَ مورے گوش ءَ وارت ءُُ ننکہ بنجاہی حکومت ءَ دانکے پر بلوچستان ءَ حالتاک ءُُ روتاک بندانت ءُُ مردم چہ ھال رسائی ءِ آسراتی ءَ محروم انت وھدیکہ اسلامی جہوریہ پاکستان ءِ آئینءِ آرٹیکل 19A ءِ ردا پاکستان ءِ درائیں جاہ مندانی اے بنکی انسانی حق انت کہ ملک ،دمگ ءُُ وتی کش ءُُ کر ءِ جاوراں سہی ءُُ سرپد بہ بنت ءُُ اے دمگی ءُُ بنجاہی حکومت ءِ ذمہ واری انت کہ وتی جاہ مننداں آہانی جند ءِ ملک ءِ ءُُ درملکی جاورانی سرپدیءَ پہ وہد ءُُ موسم ءُُ تچک ءُُ پکا بدنت ۔

اگاں حکومت اے کار ءَ بے سوب انت بزاں حکومت وتی جاہ منندانی یک بنکی حقے کہ آہاں ملک ءِ آئین ءَ داتگ چرائی ءَ زبہر کنگان انت ۔ گڈااے درگت ءَ بلوچستان ءِ لس مہلوک اے حق ءُُ اختیار ءِ واہند انت کہ چہ دمگی یا بنجاہی حکومت ءَ اے لوٹ ءُُ طلب ءَ بکن انت کہ آیانی اے بنکی حق پرچہ پلگ بوتگ؟ یا آ پرے حق ءِ گر ءَ چو عمران خان ءَ نندانک ہم جت کن انت ۔بلوچستان ءَ مہلوک ءَ را 20روچ ءَ گیش بیت کہ حالتاک ءُُ روتاکاں محروم انت بلئے نہ بنجاہی حکومت ءِ نیمگ ءَ چشیں دلگوشے گور کنگ بوتگ ءُُ ننکہ دمگی حکومت ءِ نیمگ ءَ ’’جہندم چہ گوْسک ۔۔۔

بلوچستان ءِ راجکاری پارٹی بی این پی ،نیشنل پارٹی ،بی این پی ( عوامی) ءُُ ایندگہ پارٹی ہم اے بابت ءَ بے ترک ءُُ توار انت کہ حکومت ءَ زور بدی انت کہ مہلوک ءِ حال رسانی ءِ آسراتی ءِ راہ ءُ در ے پچ بہ بیت ۔

پرچکہ بنی آدم بے نا ن ءُُ آپ ءَبلکیں بوت بکنت بلئے چہ وتی چاگرد ءَ سست ءُُ گستا بوت نہ کنت ۔بائدیں بلوچ راج دوست اے انسانی بنکی حق ءِ بابت ءَ چست ءُُ ایرے بکن انت یا حکومت ءُُ ایندگہ فریقانی میان ءَ سلاہ یے ءِ کار ءَ بکن انت پرچکہ بنی آدم بید چہ رسانک ءَ نہ بیت؟ ءُُ پدا راجکاری بید ء رسانک در ءَ چون بیت؟