بلوچستان ءِ بازیں دمگاں گوستگیں روچاں جاور سک باز ناگیگ بوتگ اَنت ۔وتکشیں تراک ،ٹارگٹ کلنگ ،آوار جنگ ءُُ لاشانی دور دئیگ اے درائیں وئیل ءُُ واکیا نوں بلوچستان ءِ لس روچی گپے جوڑ بوتگ ۔
یمنی ءِ جاور ایش اِنت کہ مردم چہ وتی ہلک ءُُ دمگاں چہ لڈ ءُُ بار کنگ ءَ اَنت ءُُ دگہ دمگاں روگ ءَ اَنت ۔ہزاراہ برادری ءِ مردم گیشتر ناشرکاری ارشانی آماچ اَنت ۔اے بزگ باریں سالے چنت براں جنگ ءُُ کشگ بنت ۔اگاں چہ پولیس ءُُ لیویز ءِ کارندہاں بازیں کاروائیاں بازیں ناشری جتگ ءُُ کشتگ اَنت ۔پمشکا ناشرکاراں نوں ایشاں سرا ہم ارشکاری بوہگان اِنت۔
گوستگیں روچ ءَ شہید حامدشکیل ءُُ آئیءِ ہمراہ شہید رمضان بلوچ ہمے وتکشیں تراک ءِ آماچی ءَ بیران بوتگ اَنت ءُُ زیکیں گپے کہ سرجمیں کہولے ٹارگٹ کنگ ءُُ کشگ بوتگ اَنت ۔چشکہ ناشرکارانی بلوچستان ءَ کاروائی دارگ ءِ ھاترا پولیس ءِ جواناں کار کتگ پمشکا نوں ایشاں آوتی ارشکاری ءِ آماچ کنگ ءَ اَنت ۔اے بنی آدمی پجار نہ اِنت کہ زالبول ءُُ کسان سالیں زہگ جنگ ءُُ کشگ بہ بنت ۔
ایشانی تہا انسانیت نامیں ہچی نیست اِنت ۔بلوچستان ءَ اگاں چشیں ناشرکاری بوہگ ءَ اِنت ایشیءِ یک بلائیں سوبے دری مردمانی بلوچستان ءَ جاہ کنگ اَِنت اگاں اے دری مردم آ تُری کجام ہم ہندے ءِ بہ بنت چہ بلوچستان ءَ درکنگ بہ بنت داں بلکیں بلوچستان ءَ ایمنی ءِ جاور گہتر بہ بنت بلئے گوں کئے اے حبر کنگ بیت پرچکہ اے دری مردمانی آورک ءُُ بلوچستان ءَ جاہ دئیوک وت راجی اسمبلیاں نشتگ انت۔
نوں میر ءِ شنک ءَ کچ ءُُ تتک پِر نیست کئے ایشاں جست بہ کنت کہ چش پرچہ کنگان اَنت ۔دانکہ ناشرکاری ءِ جیڑگ بلوچستان ءَ است انت ادا ہچ وڑیں دیمروئی بوت نہ کنت ،نا ادا وانگ ءُُ زانگ ءِ جوانیں جاور ودی بوت کن اَنت ،نیکہ ادا دگہ صعنت کارخانہ جوڑ کنگ بوت کنت ۔
بے روزگاری روچ پہ روچ گیش بوہان اِنت ءُُ ایشی ءِ گر ءُُ دار کنگ ءِ ھاترا حکومتی درائیں سوڈگ بے سوب بوتگ اَنت ۔
ایوک ءَ مجلساں اوشتگ ءُُ اولس ءَ را بڈگ کہ جاور گیگ انت ،ناشرکاری ہلاس کنگ بوتگ ،وانگ ءُُ زانگ ءِ پڑاں گیش دیمروئی کرتگ ۔اے درائیں ہشکیں گپ اَنت کہ ایشانی تہا ہچی راستی نیست اِنت۔
ساری ءَ ایوک ءَ سیمسری سیکیورٹی جنگ ءُُ ارشکاری کنگ بوتگ اَنت بلئے نوں پولیس ءِ افسرانی سرا ہم ارش بوہگ ءَ اِنت ۔چریشی ءَ یک حبرے پدر بیت کہ نوں ناشرکار ترس آماچی ءَ چشیں کاروائی کنگان اَنت ۔
حکومت ءُُ راجکاراگاں نوں سرئے بود مہ بنت ءُُ انچیں سوڈگے مہ کن اَنت کہ چریشی ءَ نہ ایوک ءَ ناشرکاری ہلاس بہ بیت بلکیں بلوچستان چہ وتی ناگیگیں جاوراں در بئیت ءُُ دیمروئی ءِ تہا بئیت اِنت۔انچو کہ ساری ءَ گشگ بوتگ اَنت کہ دانکہ ناشرکاری ہلاس مہ بیت بلوچستان ءَ ہچ ھساب ءَ دیمروئی بوت نہ کنت ۔پرچکہ بلوچستان ءَ ایوک ءَ ایمنی نہ لوٹیت بلکیں وشحالی ہم لوٹیت ۔
ایوک ءَ ایمنی بوہگ ءَ ہچ نہ بیت دانکہ وشحالی مہ بیت ءُُ وشحالی ہما وہد ءَ بیت کہ ایمنی بہ بیتءُُ ایمنی ہما وہد ءَ بیت کہ ناشرکاری چہ بن ءُُ بہہ ءَ ہلاس کنگ بہ بیت۔ بلوچستان ءِ ایمنی جاورانی ذمہ واری ایوک ءَ حکومت نہ اِنت ہمک بلوچستان ءَ نندوکیں مردم ئیگ اِنت پرچکہ در ءَ چہ اتکگیں مردمے اے بلوچستان ءَ ہچبر وتی نہ کنت بلئے ہما کہ وت بلوچستان ءِ اصل نندوک اِنت۔
آ بائد بلوچستان ءِ دیمروئی ءَ وتی کرد ءَ پیلو بہ کنت ایوک ءَ دومی ،سیمی مردم ءِ بہتام بندگ ءَ کار نہ بیت بلکیں وت ءَ را ہم چیزے گام دیم ءَ آئگی اِنت۔ دنیا ءِ درائیں دیمروئی کتگیں ملک اگاں چارگ بہ بیت داں اے حبر جوانی ءَ گیشوار بوت کنت کہ آہاں وتی ملک ءِ دیمروئی ءَ وتی جند ءِ کرد ہم پیلو کتگ ۔بلئے مئے کرد بلوچستان ءَ ہوار نہ اِنت؟