بلوچ زانتکار، شہ زانت،گل ءُُ رہشون گل ءُُ شادان انت کہ بلوچستان ءَ آہانی حساب ( مردمانی) چہ اوگاناں کم ترکنگ نہ بوتگ اگاں کہ اے شہمیں گپے نہ انت پرچکہ 4ہند ءِ حساب ءَ چہ30ہند ءِ حساب ءِ چے وڑا گیش کنگ بوت کنت؟ بلئے زور ءَ سرا راہ اِنت ،اے گپ ءَ بلوچ گل ءُُ رہشون زان انت پمشکا اے ترس ءِ آماچ بوتگ انت۔

کہ چو مہ بیت کہ ریاست آہاناں مان میار ایت ءُُ آہانی حساب ءَ چہ اوگاناں کمتر بکنت بلئے اے گپ ءَ کس دلگوش نہ کنت کہ اگاں آپ ءَ دزئے گڈا نمبگ ئے کجا کنئے؟ ریاست ءُُ سیاست ءَ دلگوش نہ کنگ ءَ راج ءُُ قوم باز تاوان بار بنت۔ ہمے وڑ اے مردم شماری ءَ گوں بلوچ ءَ کنگ بوتگ پرچکہ اگاں مردم بلوچستان ءِ ہند ءُُ دمگانی 1998 ءِ مردم شماری ءِ حساباں بچار ایت گڈا ہنچو گمان بیت کہ گوستگیں 19 سالاں بلوچ دمگاں چک ودی نہ بوتگ ۔

اگاں بوتگ گڈا حکومت ءِ فیملی پلاننگ ءِ رہبند ءِ سرا ،بلئے اگاں حکومت ءِ فیملی پلاننگ ایوک ءَ بلوچستان ءَ ہنچو سوب مند بوتگ گڈا بائدیں فیملی پلاننگ بلوچستانءَ بند کنگ بہ بیت پرچکہ فیملی پلاننگ ءَ بلوچستان ءَ وتی ٹارگٹ (Target) گپتگ(Acheiveکتگ) بلئے اگاں فیملی پلاننگ ءِ کار ءُُ کرد بلوچستان ءَ چو پاکستان ءِ ایندگہ دمگاں بوتگ گڈا بائدیں بلوچ رہشون بگش انت کہ اشتر ءِ دزی پہ ۔۔۔

نہ بیت ۔پرچکہ 19 سال مزنیں مدتے کہ آئی ءِ حساب ءَ بائدیں بلوچ ہندءِ مردمانی حساب انچو کم کنگ مہ بوت انت اگاں حکومت ءِ نیمگ ءَ مردمانی حساب چوکم کنگ بوتگ گڈا بائدیں بلوچ گل ءُُ رہشوناں اے بابت ءَ زہر شانی یے درشان بکت انت پرچکہ اے درچ ءَ اوگان ءُُ پٹھان رہشون ءُُ گلاں وتی زہرشانی درشان کتگ ہمے وڑا سندھ ءَ ایم کیو ایم ءَ مزنیں زہرشانی یے کتگ ءُُ کراچی ءَ جلسہ ءُُ جلوس ءُُ نشتانک جتگ کہ سندھ ءُُ کراچی ءِ مردمانی حساب چہ حق ءَ باز کمتر کنگ ءُُ پیش دارگ بوتگ۔

اگاں کہ کراچی بندر ءَ بلوچانی شہر انت بائد انت کہ بلوچ راج دوستاں اے بابت ءَ اگاں جتائیں زہرشانی یے نہ کتگ ات گڈا سندھ ءِ راج دوستاں گوں تپاکی الم ءَ درشان بہ کتیں ءُُ دومی دست ءَ بلوچستان ءَ ہم بلوچ دمگانی مردمانی حساب ءَ چہ حد ءُُ کم کنگ ءِ سرا زہرشانی درشان کتیں ۔بژنی گپ ایش انت کہ مردم شماری ءِ حساب ءِ درآہگ ءَ پد انگت بلوچ رہشون اے جیڑھ ءِ بابت ءَ بے ترک ءُُ توار انت ۔

ہمے درچ ءَ 30 نومبر ءَ پی پی ءِ سالروچ ءِ درگت ءَ پی پی ءِ ہواریں کماش بلاول بھٹو زرداری ءَ گوں بنجاہی حکومت ءَ اے گلگ ءُُ زہر شانی کتگ کہ سندھ ءِ مردمانی حساب پہ کہذن کم کنگ بوتگ وتی تران ءَ بلاول ءَ سندھ ءِ مردمانی حساب ءَ را کم کنگ ءَ پہ وت ءَ پہ سندھ ءِ مہلو ک ءَ پندلے گشتگ، گپ ایش انت کہ وہدے پٹھان ،سندھی ءُُ مہاجر اے گپ ءَ جنگان انت کہ بنجاہی حکومت ءِ نیمگ ءَ کہذن دمگانی مردمانی حساب کم کنگ بوتگ انت ءُُ بلوچ ہم زان انت ءُُ سرپد انت کہ آہانی حساب ہم چہ حد ءَ گیش کم کنگ بوتگ گڈا پرچہ اے بابت ءَ گپ ءُُ ترانے نہ کن انت۔

ءُُ ننکہ زہر شانی درشان کن انت ؟اے بابت ءَ بلوچ رہشون بائدیں ترسے ءِ آماچ مہ بنت پرچکہ اے ایوک ءَ بلوچ ءِ جیڑہ نہ انت کہ ترس انت کہ ریاست آہانی پدا کپ ایت بلکیں جیڑہ درائیں ملک ئیگ انت ءُُ بلوچ ئیگ انت گڈا بلوچ گل ءُُ رہشون بائدیں ایشی ءَ ملکی تک ءَ بزورانت ءُُ وتی جیڑہ ءَ دیم ءَ بیار انت ۔

ایوک ءَ پہ اے گپ ءُُ حال ءَ وش مہ بنت کہ آہانی حساب چہ اوگاناں کمتر کنگ نہ بوتگ اے گپ ءَ سرے پِر نہ بیت کہ ریاست گوں وتی زور ءَ 4ہند ءِ آبادی ءَ چہ 30ہند ءِ آبادی ءَ گیشتر بکنت ءُُ پیش بداریت پرچکہ روگن رچ ایت بلئے ننکہ نوہ من ! پمشکہ بلو چ زانتکار ،گل ءُُ رہشونانی ذمہ واری انت کہ اے جیڑہ ءِ سرا وتی لیکہ ءُُ دلگرانی ءُُ زہرشانی ءُُ درشان ءَ بکن انت تنکہ بن دپتر ءِ بہرے بہ بیت۔