چہ ہما وہ دءَ کہ اے زمین ءِ سر ءَ بنی آدم ءَ وتی زند بنگیج کتگ ۔آئی ءَ ہر وڑیں ہنر سازتگ ییکے دومی ءَ گوں وتی گپانی سر کنگ ءِ ھاترا آھاں وتی نمدی مرگانی سرا دومی جاگہ دیم داتگ انت ۔ہمے نمدی بازیں روچاں پد دومی مردم ءِ کرا سر بوتگ انت ۔

ادا نوں ماچاریں کہ درستاں چہ ساری نمدی نبیسی ءِ بندات کجا چہ بوتگ ؟ اولی نمدی نبیس کئے بوتگ ءُُپدا بلوچی زبان ءَ نمدی نبیسی کدیبندات بوتگ ؟ دگنیا درستاں چہ ساری نمدی نبیسی ءِ بندات چہ روم ءَ بوتگ کہ درستاں چہ پیسر بادشاہ سسرو ءِ نمدی مارا دست کپتگ انت اے واجہ اولی مردم بوتگ کہ آئی ءَ نمدی نبیسی بندات کتگ ۔ایشی ءَ پد روم ءِ بازیں بادشاہانی نمدی ہم دیم ءَ اتکگ انت پدا ہمے نمدی بازیں وہد گوازگ ءَ پدا دگہ بازیں زبان ءَ رجانک کنگ بوتگ ۔

ایشانی رجانک کنگ ءِ مستریں سبب اے بوتگ کہ اے نمدیانی دومی زبان ءِ مردم ہم سرپد بہ بنت ۔ درستاں چہ پیسر اے نمدی انگریزی زبان ءِ تہا ہبدہمی کرن ءَ رجانک کنگ بوتگ انت پدا انگریزی زبان ءَ پد دگہ زباناں رجانک کنگ بوتگ اَنت ۔ روم ءِ بادشاہاں رند پدا نمدی نبیسی ءِ بندات مارا انگریزی ءِ تہا ہم گندگ ءَ کیت پرچکہ انگریزی زبان دگنیا ءِ تہا یک مزنیں زبان ءِ زانگ بیت ۔

اے گپ مارا درستاں سرپدی بوہگ انت کہ دگنیا ءِ تہا ہر زبان ءَ کہ چیزے نبیسگ بوتگ پدا لمی ءَ ہمے مواد انگریزی زبان ءَ ہم رجانک کنگ بوتگ ہمے وڑا انگریزی زبان ءَنمندی نبیسی ءِبدات ہم ہبدھمی کرن ءَ درستاں چہ ساری جمیز ہال ءِ نمدی دیم ءَ کاینت بزاں انگریزی زبان ءِ تہا جمیز ہال اولی مردم انت کہ آئی ءَ نمدی نبیسی بندات کتگ ۔

اے واجہ ءَ رند دگہ بازیں انگریز نبشتہ کاراں ہم نمدی نبیسی کتگ ایشانی تہا پال گرے ،شیلے،کیش،لارڈ بائرن،برینڈل رسل ہوار اَنت ۔ اے ہما مزنیں نام انت کہ انگریزی زبان ءِ تہا ایشاں باز ساڑاہگ ءَ منگ بیت ایشاں وتی نمدی نبیسی ءِ بندات پانزدھمی کرن ءَ جوانیں دروشم ءَ کتگ ءُُ انگریزی زبان ءَ نمدی نبیسی ءَ سک باز دیمروئی داتگ مرچی بلئے ہمے واجہانی برکت ءَ انگریزی ءَ نمدی نویسگ بوہگءَ اِنت ۔

انگریزی زبان ءَ پد اردو زبان ءَ ہم نمدی نویسی ءِ بندات جوانیں دروشم ءَ اولی مردم خدحت اللہ بیگ ءُُ مرزا اس اللہ کان غالب ءِ نمدی دیم ءَ کاینت ۔ایشاں اردو زبان ءِ تہا درساں چہ ساری نمدی نبیسی بندات کتگ ۔بلوچی زبان ءَ نمدی نویسی ءِ بندات کدی بوتگ اے بابت ءَ ہمے گشگ بیت کہ بلوچی زبان ءَ نمدی نویس ءِ بندات مارا نوکیں دور بزاں ۱۹۴۹ ء زمانگ ءَ گندگ ءَ کیت ۔

اولی مردم سید ہاشمی بوتگ کہ واجہ ءَ نمدی نبیسی بندات کتگ ۔۱۹۴۹ ریڈیو کراچی ءَ سید ہاشمی بلوچی زبان ءِ نبشتہ کار ءُُ شائراں نمدی نبشتہ کنت ءُُ آہاں شعر ءُُ نبشتانک لوٹیت کہ شما شعر ءُُ نبشتانک بیارنت من ایشاں چاپ کناں ۔

دیمترا مارا نمدی نبیسی روایت ۱۹۵۱ ءَ ماہتاک اومان چہ گندگ ءَ کیت کہ ہمے ماہتاک تہا ہم نمدی چاپ ءُُ شنگ بوتگ ۔تنی وہدی بلوچی زبان ءَ نمدی نبیسی ءِ سے کتاب چاپ بوتگ ۔اولی سید نمدی ،دومی نمدیانی دروت،سیمی مکتوبات گل خان نصیر ۔سید نمدی ۱۹۹۳ سید ہاشمی اکیڈمی کراچی ءَ چاپ ءُُ شنگ بوتگ اے کتاب ءَ تہا سید ہاشمی ءَ بلوچی زبان ءِ نبشتہ کاران ءَ نمدی نبشتگ چوکہ کریم دشتی ،مراد ساحر ہوار انت ۔

اے کتاب ءِ تہا واجہ ءِ سرجمیں نمدی ہوار نہ اَنت ۔سید ءَ وتی نمدی ذگریں بولچی لبزاں گوں نبشتہ کتگ وہدے مردم سید ءِ نمدیاں وانیت آئی ءَ را سما کپیت کہ سید ءَ چونیں ذگریں لبز کارمرد کتگ ۔اے کتاب ءِ اندر ءَ سید دو رنگیں گپ کنت یکے وتی کسہاں کاریت دومی ہما ردم ءَ کہ نمدی نبیسی گوں ہمایاں گپ جنت۔دومی نمدیانی کتاب واجہ صبا دشیتاری ءِ نمدیانی دروت انت کہ ۲۰۰۵ ءَ سید ہاشمی ریفرنس لائیبریری ءَ شنگ کتگ ۔

اے کتا ءِ تہا صبا ءِ وتی جندے نمدی مان نہ اَنت بلکیں اندگہ شاعرءُُ ندکارانی نمدی اَنت کہ صبا ءَ نبشتہ کنگ بوتگ اَنت ۔ ہما ایشی ءِ زرتگ ءُُ کتاب رد ءُُ بند داتگ ۔اے کتاب ءِ تہا مراد ساحر ،بانل دشیتاری ،ءُُ دگہ مردمانی نمدی ہوار انت ۔ایشانی تہا ذاتی نمدی ءُُ لبزانک ءِ سرا گپ مان انت ۔

مکتوبات گل خان نصیر ءِ نمدیانیکتاب ۲۰۱۵ ءَ چاپ بوتگ شعبہ بلوچی ءِ نیمگ ءَ اے چاپ کنگ بوتگ ۔ایشیءِ تہا اردو بلوچی نمدی ہوار انت ہمے دور ءِ نمدی اَنت کہ گل خان نصیر سیاسی دور ءَ جیل ءُُ زندانی بوتگ ۔گیشتر نمدی آئی ءَ وتی لوگ ءِ مردم ءُُ چکاں نبشتہ کتگ انت ۔آہاناں امیت داتگ کہ وشیانی روچ الم کیت ھدا ھیر کنت ۔ اے سے ایں کتاباں ابید تنی وہدی بلوچی زبان ءَ نمدیانی سرا دگہ کتاب دیم ءَ نہ اتکگ ۔داں اے گپاں زانگ کہ بلوچی ءَ نمدی نبیسی سرا سک باز کم کار بوتگ ۔