|

وقتِ اشاعت :   December 10 – 2017

گواستگیں چندیں سال اِنت کہ بلوچستان ءِ جاورال روچ پہ روچ ہراب بوہان اَنت ۔بازیں مردماں وتی لوگ ءُُ جاہ یلہ داتگ ءُُ دگہ جاہاں شتگ اَنت ۔بلئے اے درائیں جاورالاں یک چیزے الم بوتگ بلوچستان ءِ ورناہانی تہا وانگ ءِ یک انچیں شلے دیم ءَ اتکگ کہ نوں ایشیءِ دارگ نہ بوتگیں ہبرے زانتگ بیت ۔

گیشتر کوچگی مردم پہ وانگ ءُُ وانگ ءِ ھاترا ءَ بلوچستان ءِ بنجاہی شہر کوئٹہ ءَ کائینت بلئے اِدا جاور ایش اِنت کہ وانوکاں وانگی بنجاہ نیست اِنت۔بزاں وانگ ءِ واست ءَ لائبریری نیست اِنت ۔چشکہ نہ اِنت کوئٹہ ءَ لائبریری جوڑ کنگ نہ بوتگ اَنت بازیں لائبریری جوڑ اَنت ایشانی کارکنوک ءُُ اگدہ دار ایوک ءَ وتی مُز ءَ چہ سرکار ءَ گرگان اَنت بلئے اے درائیں لائبریری بند اَنت ۔

گواستگیں روچاں بی ایس او پجار ءِ چئیرمین ءَ ہمے جیڑگ ءِ بابت ءَ تران کتگ اَت ءُُ آئیءَ ہمے گشتگ اَت کہ جناح لائبریری ءَ انوں ہپت ہزار نودربر انگیج اَنت بلئے اے لائبریر ی ایوکءَ سے سد نودربر ءِ ھاترا ٹہینگ بوتگ ۔پمشکا ہمک روچ نودربرانی گوں کارداراں جنگ ءُُ صلوات اِنت بازیں نودربرے جہل ءَ زمین ءَ نشتگ ءُُ چو کوئٹہ ءِ سریاب بس ءَ مانچتگ ۔

دانکہ وانگ ءَ آرامیں جاہے مہ ریست آھودا وانگ چون بیت بلئے اے درائیں دور ءَ چہ اتکگیں نودربر مجبور کہ دگہ لائبریر ی نیست اِنت ۔کالج ءُُ یونیورسٹیانی لائبریریانی جاور ہم انچو اَنت ایشانی تہا نوکیں کتاب اوں نسیت اَنت ہما انگریزیانی زمانگ ءِ کتاب اَنت کہ ایشاں چہ کس ءَ ہچی زانت رست نہ کنت بلئے سرکار اے بابت ءَ ہچی گامگیج دیم ءَ نیاریت بائد اِنت سرکاری جہگیر وہد پہ وہد اے لائبریریانی تروتاب ءَ بہ کنت ءُُ ایشانی مالی ءُُ کتابی جاورالاں چہ سہی ءُُ سرپد بہ بنت ۔

دنیا ءُُ جہان مرچی ماہ ءُُ استالاں سر انت ہمے کتابانی سوب ءَ بلئے بلوچستان ءِ بنجاہی شہر ءِ جاور ایش اِنت کہ آئیءِ اول وَ لائبریری نیست اِنت اگاں یک ءُُ دو است داں آہود ءَ پہ وانگ کتاب نیست انت ۔اسپینی روڑ ءَ یک مزنیں سرکاری لائبریری یے است انت بلئے بند انت ایکٹیو نہ اِنت بائد آ اوں پچ کنگ بہ بیت داں گیش چہ گیش نودربر وانت بہ کن اَنت ۔

پرچکہ بے وانگ ءَ ہچ قوم دیمروئی کت نہ کنت ءُُ بلئے بلوچستان ءِ حکومت وانگ ءُُ وانینگ ءِ گپ ءَ وَ ہمک جلسہ ءَ کنت بلئے آئیءِ وانگ ءِ جاور ایش کہ پہ نودربرانی وانگ ءَ لائبریری نیست اِنت ۔لائبریریانی نہ ایوک ءَ نوکیں کتاب ایر کنگ بہ بیت بلکیں آہود ءَ انٹرنیٹ ءِ ہم آسراتی بہ بیت دانکہ نودربر پہ وت ءَ نوک نوکیں کتاب چارت بہ کن اَنت ءُُ نوکیں جہان ءَ گوں ہمگام بوت بہ کن اَنت ۔ 

کوئٹہ ءِ بنجاہی شہر ءَ گیشترکہ لائبریریاں نودربر است اَنت آ پہ جنرل وانگ ءَ کم ءُُ وتی چکاس ءِ تیاری ءَ گیشترکائینت ،وانگ ہما جاہ ءَ بیت کہ آہود ءَ نوک نوکیں کتاب ایر بیت ۔انوں چین ءَ یک نوکیں لائبریری یے پچ بوتگ اَنت آہود ءَ گمان ۱۰ لکھ ءَ برز کتاب است اَنت پدا دومی ایش انت کہ ہمامردم کہ آئیءَ گورا کتابے است انت ءُُ آئی ءَ وانتگ آ وتی ہما کتابءَ بیار ایت لائبریری ءَ جم بہ کنت ءُُ لائبریری ءِ کارمستر آئیءَ نوکیں کتاب دنت۔


اے یک نوکیں دودے کہ چین ءَ دیم ءَ آورتگ چریشی ءَ وانگ ءِ یک نوکیں وڑ ءُُ پیمے دیم ءَ اتکگ ۔بلوچستان ءَ چشیں مردم باز انت کہ آہانی پت ءُُ پیرکی کتاب آہانی لوگ ءَ مپت حدا ایر انت بائد آ مردماں سرکار دلبڈی دادءُُ مُزے بدنت ءُُ آہانی کتاباں بہا بزوریت ءُُ ہمے لائبریری کہ بند اَنت آہودا ایراِش بہ کنت دانکہ وانوکاں ہر وڑیں کتاب ،ہروڑیں بنگپ ءِ بابت ءَ کتاب دست بہ کپ ایت ۔

بلئے مئے راجی سروک ایوک ءَ درملکی تروتاب یاکہ مجلس ءُُ دیواناں ایوک ءَ دیمروئی ءِ گپ ءَ جت کن اَنت بلئے ایشیءِ جاورال ءِ گہتری ءِ باری ءَ گون نہ اَنت ۔بلوچستان ءِ سروزیر ثنا اللہ زہری ءَ گشتگ کہ ہمے سالءَ آ کوئٹہ ءَ گرین ٹرین ءِ نظام ءَ بحال کنت ۔بلئے آسرپد نہ اِنت کہ 

راجے کہ گنگ نہ مانیت نہ مانیت 
مانیت پہ ادارکے بزاں زندگ ءُُ مردار