امریکی فوجی حکام نے کہا ہے کہ افغانستان میں امریکی قیادت والے اتحاد نے صوبہٴہلمند میں منشیات تیار کرنے والی 25 لیباریٹریاں تباہ کردی ہیں، جس کے نتیجے میں آٹھ کروڑ ڈالر مالیت کی منشیات تلف ہوگئی ہیں۔

یہ کارروائی تین ہفتے تک جاری رہنے والے فضائی حملوں کے دوران کی گئی، جس کا مقصد طالبان کو حاصل ہونے والی آمدن کو تباہ کرنا تھا۔

ٹیلی کانفرنس کے ذریعے کابل سے بات کرتے ہوئے، امریکی فضائیہ کے برگیڈیئر جنرل، لانس بنچ نے اخباری نمائندوں کو بتایا کہ اِن آٹھ کروڑ ڈالروں میں سے ایک کروڑ 60 لاکھ ڈالر براہِ راست طالبان کے ساتھی منشیات سے وابستہ سرداروں کی جیبوں میں جاتے۔

سولہ سالوں میں طالبان کے انسداد کے لیے پہلی بار فضائی کارروائی کی گئی، جس کا ہدف منشیات کی آمدنی کو نشانہ بنانا تھا۔

بنچ نے کہا ہے کہ ’’یہ نئی لڑائی ہے۔ ہم تیار بیٹھے ہیں‘‘۔

اُنھوں نے ٹرمپ انتظامیہ کے تحت ملنے والے نئے اختیارات کی تعریف کی، جن میں امریکی قیادت والے اتحاد کو یہ اجازت دی گئی ہے کہ وہ افغان طالبان کی حامی تنصیبات پر حملہ کر سکتے ہیں، جن میں ہتھیاروں کے ذخیرے سے لے کر آمدن پیدا کرنے والے ذرائع شامل ہیں۔