| صد یق بلوچ

وقتِ اشاعت :   December 24 – 2017

پارلیمانی ایواناں مدام سیاسی جیڑگاں گپ ءُُ تران بیت ۔باز براں سیاسی جیڑگاں حکومت ءُُ اپوزیشن ءِ یکوڑیں حیال دیم ءَ کائینت ۔حکومتی مردم ءُُ اپوزیشن ءِ مردم چنائی ءَ پہ زاہر ہردو مذہبی جنون ءِ ہلاپ انت۔

بلئے اے حبر ءَ کس انکار ی انت کہ چیزے مذہبی گلاں وتی منگانی پیلوئی ءَ مدام حکومت جہلاد کتگ ءُُ وتی گپ ءَ منارینتگ ۔اے بابت ءَ پاکستان ءِ سینٹرانی گشگ ہمیش انت کہ پاکستان ءِ دشمناں پہ وت ءَ چیزے مذہبی گل جوڑ کتگ ءُُ ہروہد ءَ کہ آہانی دل بلوٹیت آ حکومت ءِ پروشگ یاکہ ہڑتال ءُُ جاک ءُُ سلواتے ءَ ایشاں کارگپت کن اَنت ءُُ ایشیءِ دارگ ہچ حساب ءَ بوت نہ کنت ۔

نوں اے حبر پہ سیاسی حساب ءَ وَ شر انت بلئے اگاں اے حبرراست انت کہ گڈا اے یک بلائیں جیڑگے کہ کجام ہم یک وہدےءَ اے مذہبی جنون اے ملک ءَ سرجم ءَ وتی دستاں زرت کنت ءُُ یک وہدے انچیں اوں اتکگ اَنت کہ ہمے مذہبی مردم ہرچی کہ ایشانی دل بلوٹ ایت کت بہ کن اَنت ۔

پاکستان ءِ حکومت ءِ وہد پہ وہد ہمے مذہبی مردمانی جلسہ ءُُ زارشانی دیستگ اَنت ساری ءءَ فیص آباد ءِ جلسہ ءُُ نوں اسلام آباد ءِ انچو روچ ءَ کیپچر کنگ ایشانی زور ءُُ تاکت ءَ زاہر کنت ۔لس مردم مدام ہمے جست ءَ کنت کہ اے مذہبی مردم پرچہ دارگ نہ بنت ؟ بلئے اے ایشیءِ درائیں ذمہ واری ایوک ءَ پولیس ءُُ قانود ءِ پاسداری کنوکانی نہ اِنت بلئے حکومت ءَ نشتگیں مردمانی ہم است انت ۔

پرچکہ حکومت اگاں شر بہ بیت داں چشیں جاور ہچبر ودی بوت نہ کنت بلئے ااگں حکومت ءِ جند سست بہ بیت ءُُ آ انچیں جاورانی پاسداری ءَ بہ کنت داں چے کنگ بوت کنت ؟حکومت مدام ہمے داوا کنت کہ ملک ءَ کانود ءِ پاسداری ہشتاد درسد کار بندگ بوہگ ءَ اِنت بلئے وہدے چشیں مذہبی جیڑگ دیم ءَ کائینت داں حکومت اے درائیں داوا دروگ ءُُ بے بن زانگ بنت ۔

مذہب حراب نہ انت ءُُ دنیا ءِ درائیں مذہب وتی وتی جاہ ءَ شر اَنت آ دگہ حبرے کہ ہرکس وتی مذہب ءَ درستاں شرتر ءُُ گہتر سرپد بیت ۔بلئے وتی مذہب ءِ شرترکنگ ءِ نئیت ءَ دومی ءِ مذہب ایر جنگ یاکہ آیانی جنگ ءُُ کشگ یاکہ تاوان دئیگ مذہبی عملے نہ انت کہ بلکیں سیاسی جیڑگے ءُُ سیاسی جیڑگ یک بے باوریں جیڑگے کہ ہچبر ،ہچ وہد ءَ ،ہچ جاہ ءَ گیشوار بوت نہ کنت ۔