اسلام آباد میں فاٹا کے انضمام کے خلاف مظاہرے کے دوران پاکستان تحریک انصاف (پی ٹی آئی) کی سابق رہنما اور رکن قومی اسمبلی عائشہ گلالئی کو اسٹیج پر آنے سے روک دیا گیا۔
عائشہ گلالئی فاٹا کے خیبر پختونخوا میں انضمام کے خلاف احتجاجی مظاہرے میں شرکت کے لیے پہنچی تھیں اور اسٹیج پر بیٹھنے کی خواہشمند تھیں۔
تاہم انتظامیہ کی جانب سے انہیں اسٹیج کے پیچھے کرسی دی گئی جس پر عائشہ گلالئی ناراض ہوکر واپس چلی گئیں۔
انتظامیہ کا کہنا تھا کہ قبائلی رسم و رواج کی وجہ سے خاتون کو اسٹیج پر نہیں بٹھا سکتے۔
عائشہ گلالئی کو، جو پی ٹی آئی چھوڑنے کے بعد اپنی الگ جماعت بنانے کا منصوبہ رکھتی ہیں، انتظامیہ سے تقریباً نصف گھنٹے تک بحث کرتے ہوئے بھی دیکھا گیا، تاہم اس کے باوجود انہیں اسٹیج پر بیٹھنے کی اجازت نہیں دی گئی۔