|

وقتِ اشاعت :   4 days پہلے

جیڑہ اِیش اِنت کہ مہلوک اے بین موضوعی سیاست ءِ تہا یکرَنگی یے گندیت۔ نی سیاست ءِ اے زاہریں گواچن مہلوک ءِ سرا منحصر بیت۔ چہ اے وڑی ءَ اِستاناں اے فائدہ رسیت کہ اگاں ایشانی سیاست ءِ تہا جنجالے بہ بیت، آ ایشی ءَ وتی بیسوبی نہ گْشاں بلکیں ایشی ءَ مہلوک ءِ فیصلہ ءِ نام ءَ دینت۔چہ ایشی ءَ اے جنگ ءِ نوعیت ءَ بدل کن اَنت۔ چہ اے مْچی اِیں ناچاکی توجیل ءِ راہ قومی آزاتی ءِ نام ءَ دست جَنَگ بیت۔

پرچا کہ آفاقی سیاست(World / Universal Politics) قوم ءَ مزنیں کینوسے ءِ سرا آزات کَنَگ یا پہ قوم ءِ آزاتی ءَ بے سوب بوتگ۔ اگاں ازاتی ءِ قلیل ءُُ قال پدا قوم ءِ نام ءَ جہہ بجنت، گڑا چہ ایشی ءَ اے معنا در کیت کہ پہ دْرستانی تپاکی ءَ ہما سیاست ءَ رْدوم زْرتگ اَت آ بْن اصل سیاست نہ اَت۔ بلکیں ایشی ءِ تہا چاک ءُُ خلفشار ہست اَت، پرچا کہ لیکہ بندی ءِ عمل چہ ڈن(External)ءَ جابندار نہ بیت۔

البتہ ڈن ءَ چہ دائما ایشی ءِ سرا اْرش بیت۔ بلے ایشی ءِ تہا محکم بوہگ ءِ رِد ءَ اے ڈن ءِ اْرشاں چہ گپچال ءَ نہ کپیت۔بلے جانبدار نہ بوہگ ءِ سبب تہ ءِ سْر ءُُ پْر ءَ چہ اے دائما پروش وران بیت۔ پہ جیڑہ ءِ توجیل ءَ یک اَنچیں سیاستے درکار بیت کہ مہلوک ءِ سما ءُْ عقل ءِ رِد ءَ بہ بیت۔ ءُُ آ مہلوک ءِ میان ءَ اَنچیں وڑے ءَ گندگ ءُْ پہمگ بہ بیت ، اَنچو کہ آ مہلوک ءِ تہا ہما وڑا ہست اِنت۔ اے سیاست فالکِش کائٹ(Folkishkeit) گْشگ بیت۔

راجمان بْن اصل ءَ ہر وڑا یک مَنّگ نامہ یےءِ رِد ءَ شَبند بیت۔ چہ ایشی ءَ ہما راجمان ءِ فکری راہ زانگ بیت کہ چی ءُْ پہ کْجام نیمگ ءِ بابت ءَ جیڑگ ءَ اِنت۔ بزاں کْجام مقام ءَ وتی منزل حیال کنت ءُُ پہ اْود ءَ سر بوہگ ءَ چی جیڑیت۔ اے رِد ءَ یک نگدی سمایے درکار بیت کہ مہلوک ءَ بین موضوعی سمایے ءِ نیمگا رہادگ بکنت۔ پہ اے کار ءَ یک نگدی تفسیرے درکار بیت۔

نی مہلوک ءِ میان ءَ داں حدے ءَ شورے ودی بیت کہ شِر ءِ خلاف ءَ جنگ کنگی اِنت، بلے اے شِر بیرگ ءَ شبند ءُْ متعین نہ بیت۔ بلے پہ اے سما ءِ نگدی سما ءَ گوں پوہ بوہگ ءَ داں حدے ءَ مہلوک ءِ سرا بین موضوعی سما ءِ پیامد محکمیں پلہ مرزی ءَ گوں بیت۔ پرچا کہ چہ ایشاں یکے وَ رْدوم دئیگ بوتگ، ءُْ ہمیشی ءِ نِزّ ءَ مفاہمت ءِ برجاہ بوہگ ممکن بوتگ۔ بلے اے نگدی سما ءِ سرا ہما وہد ءَ نگد بیت وہدے پہ ٹکنالوجی ءِ پجار ءَ جنگ ءِ تب بدل کنگ بیت۔

اے دَرگت ءَ فلسفہ ءَ اے ہم گِشینتگ کہ وہدے آزاتی ءِ آفاقی بوہگ ءِ سرا کہر کپیت گڑا آزاتی گنجیں بیان ءِ تہا زندگ بوت نہ کنت۔ پدا پہ آزاتی ءَ وتی زندگ بوہگ ءَ قوم ءِ نام ءَ سرزمین ءِ رِد ءَ کسانیں بیانانی تہا جنگ کنگی اِنت۔

جیڑہ اِیش کہ کسانیں بیان ءِ سرا آفاقی پلہ مرزی ءِ چم نہ کپ اَنت۔ چہ اے وڑی ءَ ایشی ءِ آزاتی سرزمین ءِ سیمسراں اِڈَہ(limit) بنت ءُُ ایشی ءِ آزاتی پہ ایدگراں بے معنا بیت۔ دنیا گنجیں بیان ءِ رِد ءَ گلوبل ولیج ءِ رنگ ءَ اِنت۔

اگاں آزاتی پہ ہستیں وہد ءِ تہا الکاپ ءَ زندگ کنگی اِنت گڑا پہ اے کار ءَ تہنا گنجیں بیان کمک کنت، کہ دنیا آزاتی ءَ وتی تہ ءِ جیڑہ یے سرپد بہ بیت۔ اے اندر ءِ اصل بوہگ ءِ واہش ءَ آزاتی یک ’نجات‘ یے ءِ تہا بدل کْتگ۔ وہدے سما ءِ مہلوک ءِ سرا پیوست کنگ ءِ حْب جیڑہ یے جوڑ بہ بیت ءُْ اندری سیاست ءِ آماچ بہ بیت۔

اے درگت ءَ ’نجات‘ ہم یک ذاتی جیڑہ یےءِ رِد ءَ پہمگ بیت ءُْ مْچی چہ ایشی ءَ دست ءَ کشان کنت۔چہ ایشی ءَ ماڈرنزم ءِ ہما صورت دَرا بیت کہ ایشی ءِ تہا آزاتی، منزل ءُْ راجدپتر دْراہ جانبدار اَنت۔