|

وقتِ اشاعت :   4 days پہلے

اے پُرّیں دہ (۱۰) سال انت کہ مکران ءَ ہوراں ترمپے نہ گورتگ ۔مکران ءِ بابت ءَ پیش ءَ عالمی ادارگاں اے پیش گشی کتگ کہ اے دمگاں مزن سندیں ڈکال کیت کہ اے دمگ ءِ مردماں پہ لڈ ءُُ بار ءَ مجبور کنت بلئے اے پیش گشی انچو زوت ءِ نہ بوتگ انت اے وہدءَ اگاں مکران ءِ موسمی جاور چارگ بہ بنت گڈا گمان بیت کہ اگاں اے دمگ ءَ موسماں8 وت ءَ انچو داشت گڈا آوکیں دہ سالاں مکران ءُُ اے دمگ ءَ مردم نگواہ ایت۔

اے گپ وتی جاگہ ءَ راست ءُُ تچک انت بلئے بیست ءُُ یکمی کرن ءَ بائدیں بنی آدم ابرم ءُُ موسمانی دست ءَ انچو مجبور مہ بیت کہ یک مزنیں دمگے پہ ہور نہ بوہگءَ اے وڑیں ڈکالے ءِ آماچ بہ بیت پرچکہ نوں سائنس ءِ رد ءَ وت جمبر آرگ بوت کن انت ءُُ ہور گوارینگ ہم بوت کنت ءُُ پہ ریاست ءُُ حکومت ءَ سکیں گرانیں سودایے ہم نہ انت ۔

اے وہد ءَ کہ گوادر چہ ٹیکراں آپجارینگ بوہگا انت اے ٹینکرانیءَ نود(۹۰) روچ ءِ آپ ہرچ ءِ زراں ماہے دو رنداں مکران ءِ درائیں دمگ ءَ ہور گوارینگ بوت کنت بلئے بدبحتی ایش انت کہ مکران ءِ مہلوک راجی جہگیر انچو بے ترک ءُُ توار انت کہ گشے چہ مکران ءِ ڈکال ءَ ناسہی ءُُ سرپد انت ۔گوادرچہ رئیسانی دور حکومت ءَ بے آپی ءِ زنگ جنگ بوہگ ءَ انت۔

بلئے گوستگیں ہپت سالاں گوادر ءَ آپ ءِ جیڑہ ءَ را گشءُُ گیوار کنگ ءِ ہچ وڑیں گامگیج زورگ نہ بوتگ۔ اے وہد ءَ گوادر ءِ کش ءُُ کر ءِ درائیں ڈیم ہشک بوتگ انت ءُ گوادر ءِ آپ ءِ آسراتی چہ میرانی ڈیم ءَ پورا بوہگ ءَ انت ءُُ اگاں دومی دست ءَ میرانی ڈیم ہشگ بوت گڈا دشت ءُُ گوادر ءِ مردماں تنے کشیت ایش ءَ ہوار پنجگور ءُُ تربت ءَ ہم ہور نہ بوہگ ءِ سوب ءَ مچکدگ ءُُ بست ہشک بوتگ انت ۔

کیچ ءُُ پنجگور ءِ دمگ ءَ کشت ءُُ کشاری پشت نہ کپتگ آپ نہ بوہگ ءُُ جنگل ءُُ درچک ءُُ دارانی مرگ ءَ پد جنگلی دلوت ءُُ ساہ داری ہم مرتگ ءُُ ہلاس بوتگ انت ۔اے گپ گیر آرگ بہ بیت کہ پاکستان گیشتر ناہ ءُُ ارماگ کیچ ءُُ پنجگور پیداک بیت بلئے ہور نہ بوہگ ءِ سوب ءَ کیچ ءُُ پنجگور ءِ درائیں مچکدگ ہشک بوتگ انت ۔اشی ءَ ہور مکران ءُُ بانکلینک گلہ ،امب،ٹماٹر ءُُ زیتون ءُُ دگہ بازیں سبزی پیداک بوتگ کہ ڈکال ءِ سوب ءَ نوں دانگے نگواہ ایت ۔

اشی ءَ ہوار موسم سک ہشک بوتگ انت کہ آئی ءِ سوب ءَ سردی ءَ سک سردی ءُُ گرماگ ءَ سک گرم بیت گوستیگں گرماگ ءَ تربت ءَ گرمی پنجاہ ءُُ چار ڈگریءَ اتکگ کہ پہ بنی آدم ءِ برداشت درانت اگاں ہمے وڑا موسماں داشت گڈا آوکیں سالاں تربت گرمی چہ مہلوک ءِ برداشتءَ در بیت ءُُ کیچ ءِ مہلوک ءِ ھاترا دوراہ بنت، آ چہ وتی دمگاں لڈ ءُُ بار بکن انت ءُُ دربیا انت یا ہمودا پہ مرگ ءُُ بیران ءَ ساڑی بہ بیت ۔

سیمی راہ ءُُ در بیت کنت کہ مکران ءِ جہگیر حکومت ءَ مجبور بکن انت کہ آ مکران ءِ موسمی مٹ ءُُ بدلیانی آسر ءَ پیداک بوکیں جنجالانی گر ءُُ دار ءَ بکن انت ۔ اگاں اے وڑ کنگ نہ بوت گڈا آوکیں دوسالاں پد مکران نندگ ءِ قابل نہ بیت رہشون درمکے ءَ شت کن انت بلئے مہلوک کجا بروت ؟