|

وقتِ اشاعت :   April 16 – 2016

پیش ءَ تو ھچ لیب نزانتگ ! مرچی شر لیب ءَ ئے! ( بلقیس ءَ وتی لُنٹ گَٹّ پاتک اَنت ءُ گُشت ) تو بس بچار ! لیب من پیسرا ہم زانتگ بلے وت کتگ ۔۔۔ ترا موہ داتگ ءُ تئی لیب کنگ ءِ درہوشم چارگ لوٹیتگ! ( مُروارد ءَ بچکند اِت ءُ بلقیس ءِ نیمگ ءَ نیم چمی چار اِت ءُ گُشت ) ھیر چاراں ۔۔۔ اے جتائیں گپے کہ تئی ہروچیگیں لیب ءَ چہ مرچیگیں لیب ھمینچو جوان تر اِنت سد ھمینچو تُرسناک اِنت ہم بلے اے ھبرا گیرام مکن کہ ہروچیگیں پیم ءَ باج منیگ اِنت ۔۔۔ تو من ءَ کٹ اِت نکن ئے ! ( بلقیس ءَ چَپّیں دست ءِ لنکک زرتاں وتی راستیں دلبند ءِ بَز گوشت کچینت ءُ پدا ناخنانی شَما اتکگیں کَرچ لتارت اَنت ءُ ہما کَرچاناں بو چِت ءُ گُشت) ھؤ ہاں ؟ ھنچو پہر اِنت ترا وتی سرا؟ شر گڑا مرچی ترا تئی پہر چو ورکیں کُچّک ءَ گیپت! تو بس بچار بلے ۔۔۔ بلے من بغیر شرط ءَ لیب نکناں ! شرط بند! اگاں من ترا مرچی باج بُرت گڑا ؟ ( مُروارد ءَ اسٹرائیکر بورڈ ءِ سرا دور دات ءُ گُشت) پتّائی یے بوتیں من انگت بلکیں گُشت کہ تو من ءَ کَٹّ اِت کت کنے بلے کیرم ؟ کیرم بورڈ ءِ سرا من بازیں برے ءَ بازیں جنکے ھمے ہاسٹل ءِ توک ءَ توبہ پرماتگ تو زھگے ءِ مروارد !ھؤ اگاں تو بچکے بوتین ءِ بلکیں آپے ءَ مِڑ اِت کت بکوتین بلے افسوس ۔۔۔ شرط مہ بند گوں من ۔۔۔ ہار ورئے ۔۔۔ سک ہار ورئے تو! شَرّیں اگاں لیب تو کَٹّ اِت ہپتگ ئے ءَ ہاسٹل ءَ کمرہ ءِ دُرسیں کاراں من کناں اگاں من کٹ اِت گڑا تو؟ منظور اِنت ؟ (بلقیس ءَ یک رند ے پدا وتی لُنٹ گَٹّ پاتک اَنت ءُ گُشت ) شَرّ ! منظور اِنت بلے اے شرط ءِ تہا ہم یک دگہ شرط ئے است بلقیس !آ ایش کہ اگاں تو کَٹّ اِت من ہاسٹل ءِ کمرہ ءِ دُرسیں کاراں کناں بلے تئی سہریں جالاری ایں پُچّاں نہ شوداں ءُ تو ہم منی شپ ءِ پُچّاں مہ شود ! ( مروارد ءَ وتی گشان ءِ بندیک ژپ اِت ءُ گُشت ) منظور اِنت! بورڈ ءِ کیمیکل پاؤڈر اں بیار جنان ءِ کن ! من گیٹیاں پِر چِناں ایرکناں ۔۔۔ اسڑائیکر ءَ بزور بندات ءِ شارٹ ءَ تو بجن ! ( بلقیس ءَ گُشت ) ھؤ ۔۔۔ بلے ۔۔۔! (مروارد ءَ گُشت ) ءُ مروارد ءَ وتی چَپّیں چم بند کت ۔۔۔۔۔۔ دپ چوٹ کت ۔۔۔۔۔۔ توکی لنکُک ماتی لنکُک ءَ ہمگرنچ کت ءُ لِلکّ ماں دتّتانانی شم ءَ نِجینت ءُ اسٹرائیکر نَزّارتگیں گیٹیاناں پِرداشت ءُ جت ۔۔۔۔۔۔ سُہریں گیٹیاں چہ یکے تچک ءَ بلقیس ءِ راستیں نیمگ ءِ پاکٹ ءَ کپت ءُ کوئین بلقیس ءِ دیم ءَ ایر بوت۔۔۔ بلقیس جینڈر ڈیپارٹمنٹ ءَ وانگ ءَ اَت ۔۔۔ آ چہ مکران ءِ یک کسانیں کَلگ ئے ءَ پہ وانگ ءُ زانگ ءِ حاترا ماں شال ءَ اتکگ اَت ۔۔۔آئی ءِ سئے برات اَت اَنت ۔۔۔مستریں برات سرکاری اسکولے ءَ جے ۔ وی ٹیچر اَت ءُ توکی برات ءُ کستریں برات دبئی ءَ یک عربے ءِ باگ ءِ دہقان اَت ۔۔۔بلقیس ءَ را گوْ ہار نیست اَت یک گوْ ہارئے است اَتے بلے ملکمیت ءَ کسان سالی ءَ وتی ہرجاں جت ۔۔۔ مروارد ہم مکران ءِ مزنیں شَہر گوادر ءِ کِرّ ءُ گوْ را یک کسانیں میتگ ئے ءَ پہ وانگ ءَ ماں شال ءَ اتکگ اَت ۔۔۔ آئی ءِ یک براتے اَت ءُ چار گوْ ہار اَتاں۔۔۔ چاریں گوْ ہار سُور کُتگین اَتاں ءُ وتی وتی لوگ واجہانی لوگ ءَ اَتاں ۔۔۔ برات کمپاؤڈر ے اَت ماں میتگءَ کمّے دُور ءِ ہسپتال ءَ ۔۔۔ مروارد سوشل لوجی ءَ ایم ۔ اے کنگ ءَ اَت ۔۔۔ بلے اَنچش کہ مروارد ءِ حال اَت ھمے پیم ءَ بلقیس ءِ ۔۔۔اے دوھینانی دَزگوْ ہاری ایوک ءَ ہاسٹل ءَ ناں بلکیں سرجمیں یونیورسٹی ءَ مشہور اَت ۔۔۔ہاسٹل ءِ جنکاں اے دوھینانی یک نام ے پِر کتگ اَت ۔۔۔ بِلّوُ موریا۔۔۔ بِلّوُبزاں بلقیس ءُ موریا بزاں مروارد۔۔۔ ایشانی دَزگوْ ہاری ءِ کِسّہ اے رنگ ءَ اِنت کہ وھدے اولی سال ءِ اسٹوڈنٹاناں کمرہ دئیگ بوت ھما وہد ءَ اے دوھیں جنکانی گون ءَ یک وڑیں جیڑھ یے چست بوت ۔۔۔۔۔۔ انچُش کہ بلقیس ءَ را کَسّ ءَ وتی کمرہ ءَ جاہ ندات ھمے پیم ءَ مروارد ہر کسی رُوم میٹ بوت آ وتی رُوم میٹ ءِ کمرہ ءَ چار روچ ءَ زیات نہ جَلّ اِت ۔۔۔۔۔۔ بازیں جنک ءُ وارڈن ءِ اے ھیال اَت کہ اے جیڑھ ءِ بُنکی وجہ مروارد یا بلقیسءِ جند اِنت ءُ بازین ءِ گُشگ ایش اَت کہ ملامت ہما جنک اَنت کہ آ اے دوھیناں وتی کمرہ ءَ برداشت کت نکن اَنت ۔۔۔ اصل ءُ توکی کِسّہ چی یے ؟ حُدا شَر تِر زانت ۔۔۔ وارڈن بی بی کُلثوم ءِ جہد ءُ کوشست ءَ پد بلقیس ءُ مروارد ءَ را یک جتائیں کمرہ دئیگ بوت ءُ آکمرہِ تہا دگہ کَسّ ءَ را جاہ دئیگ نہ بوت۔۔۔۔۔۔ شش ماہ اِنت کہ نوں آ دوھین پہ آسودگی ءَ وتی کمرہ ءَ نشتگ اَنت ۔۔۔ ایشی ءِ وجہ اے ہم بوت کنت کہ آ ہردو ہر رنگ ءُ ہر پیم ءَ یکے دومی ءَ چہ جتا نہ اَنت ۔۔۔ ھمگرنچ اَنت ۔۔۔ شپ لیٹ اِتگ اَت۔۔۔ یک شمبئے ءِ رُژنائیں شپے اَت ۔۔۔ ہاسٹل گیشتریں جنک’’ سن ڈے نائٹ ‘‘ ءَ چو عید ءَ گوْ ازینگ ءَ اَتاں ۔۔۔ ہر نیمگ ءَ سوت، چاپ ، کوکار ءُ جاک ءُ کندگانی توار جِسکگ ءَ اَت اَنت ۔۔۔شپے کساس سئے ءُ نیم بج اَت۔۔۔ یک لیبے مروارد ءَ ءُ یکے بلقیس ءَ کَٹّ اِتگ اَت ۔۔۔ نوں گُڈّی لیب نوک بنا بوتگ اَت ۔۔۔ گیس ھیٹر ءِ سرءَ ایریں سلیمانی چاہ ءِ کیتلی لَہڈ اَت ۔۔۔کیتلی ءِ دَپی چہ لَہڈ ءُ تَپسگ ءِ وجگءَ اَنچُش لَرزگ ءَ اَت اَنچُش کہ زمستانیں برپیں شپاں بے پُچ ءُ نپاداں سارت ءُ برْ ھنگیں بدن لَرزاِیت۔۔۔ مروارد ءَ وتی گیشتریں گیٹی ماں پاکٹ ءَ دور داتگ اَتاں نوں آ ایوک ءَ وتی گُڈّی گیٹی ءِ رَند ءَ کپتگ اَت ۔۔۔ءُ بلقیس ءِ سئے گیٹی انگت کیرم بورڈ ءِ سر ءَ ایر اِتاں ۔۔۔ آئی ءِ دُرسیں گیٹی مروارد ءِ نیمگ ءِ پاکٹ ءِ دپ ءَ ایر اَتاں ۔۔۔اسٹرائیکر نوں بلقیس ءِ دست ءَ اَت ۔۔۔ ’’تو چے گُشے موریا ؟ من گوں اسٹرائیکر ءِ یکیں شارٹ ءَ سئیں گیٹیاں پاکٹ ءَ دور دات کت کناں کہ ناں؟ من ٹرپل شارٹءِ جت کت کناں کہ ناں ؟‘‘ ( بلقیس ءَ کنداِت ءُ گُشت ) ’’ لیب زانگ نہ بیت بلقیس ! جوانیں لیبی لیب گیش ءُ گپ کم کن اَنت ! لیب کن ۔۔۔ بازیں ھبر ءَ لیب ءِ مزہ رؤت !ھاموشی ءِ سر ءَ لیب کن ! ( مروارد ءَ وتی راستیں پاد ءِ پُٹ ژپ اِت اَنت ءُ گُشت ) ہمے پُٹانی ژپّگ ءَ گوں گُشے آئی ءِ چم وت سرءَ بند بوہان بوتاں ۔۔۔ بلے ذھوت آئی ءِ چم ھما وہد ءَ یکپارگی پچ بوتاں وہدے بلقیس ءَ گوں یکیں شارٹ ءَ وتی دو گیٹی پَجّی ءَ پاکٹ ءَ دور دات ۔۔۔ ’’ بُزور پندول ءِ کن موریا !ہاہاہا۔۔۔ انگت تو من ءَ نہ مَنّ ءِ ۔۔۔ من چے گُشت ترا پیسرءَ ؟ ہاں نوں دپ تئی پچ اِنت !؟‘‘ (بلقیس ءَ ٹَہک دات ءُ گُشت ) ’’ اصلی لیب کوئین ءِ بَرگ اِنت بِلّوُ ! دوھیں کوئین من بُرتاں ناں؟ ڈبل شارٹ وا ہرکس جت کت کنت بِلّوُ!‘‘ ( مروارد ءَ نوں گاس اِت ءُ گُشے پہ نادلکَشّی گُشت ) نوں ہردکانی یک یک گیٹی یے سر اتکگ اَت ۔۔۔ کساس داں پازندہ مِنٹ ءَ دوھیناں وتی وتی یکیں گیٹی پاکٹ ءَ بَرگ ءُ دور دئیگ ءِ جُہد کت بلے دوھینانی گیٹی ہمُک رَند ءَ پاکٹ ءِ بدل ءَ چہ کیرم بورڈ ءَ چہ سِٹّ اِت ءُ ڈَنّ ءَ کپت اَنت ۔۔۔ وہدے آدوھیناں چار اِت کہ آہانی لنکُک پہ اسٹرائیکر ءِ تیلانک دئیگ ءَ سُکّ اِتگ ءُ دَم بُرتگ اَنت گڈا بے تِرْ ک ءُ توار ءَ مروارد واش رُوم ءَ شُت ءُ بلقیس ءَ گیس ھیٹر بند کُت ۔۔۔ چاہ ئے نہ وارت ءُ وتی نپادانی سر ءَ تچک بوت ۔۔۔ مروارد چہ واش روم ءَ واتر بوت ءُ چار اِت ئے کہ گیس ھیٹر ءِ سر ءِ ایریں سلیمانی چاہ ءِ کیتلی ءِ دَپی انگت ءَ لَرزگ ءَ اَت ۔۔۔ آھبر نہ حال تچک ءَ بلقیس ءِ کمبل ءِ تہا پُترت ۔۔۔