|

وقتِ اشاعت :   September 4 – 2016

متحدہ ءِ بازیں رہشوناں گوں الطاف حسین ءُُ برطانیہ ءِ برجائیں گل ءَ وتی سیادی پروشگ ءِ جارجتگ ءُُ اشانی کماش فاروق ستار ءَ گشتگ کہ نوں متحدہ ءِ درائیں سوڈگ پاکستان ءَ بنت ۔بزاں نوں پاکستانی متحدہ ءِ سوڈگ الطاف حسین ءِ نہ بنت ننکہ الطاف حسین پہ زور وتی سوڈگاں پاکستانی متحدہ ءِ سرا مشت کنت۔ اگاں اے گپ تچک ءُُ راست انت گڈا بزاں متحدہ ءِ سی سالی بن دپتر ءَ سنگے لیٹینگ بوتگ بلئے ٹپاس کارو دور چاریں مردم ایشی ءَ را ادارکی سوڈگے گش انت بازیں مردمانی لیکہ ایش انت کہ غداری ءِ کیس ءِ جوڑ بوہگ ءَ پد چوکہ درائیں رہشون لوپ ءَ اتک کن انت پمشکا اے درائیں رہشونانی ہواریں سوڈگ انت کہ متحدہ ءَ را یک راجکاری گلے ءِ دروشم ءَ چہ آئینی ارشاں دارگ بہ بیت ءُُ درائیں بہتام ءُُ ملام یک مردمے ءِ سرا مشگ بہ بنت تنکہ سنیٹ ،ءُُ بنجاہی ءُُ دمگی باسک وتی نندانکاں (سیٹاں) داشت بکن انت ءُُ آیانی سان ءُُ ناس مدام ریاست ءِ سرا برجاہ بہ بیت ۔پرچکہ اے گپ ءَ باز کم مردم من اَنت کہ الطاف حسین وڑیں مردمے وتی واک ءُُ زور ءَ وتی نوکرءُُ چاکراں بدنت ءُُ پرچکہ آزان اَنت اے مردمانی ھچبر الطاف حسین ءِ کر ءَ بستار ءُُ ارزشتے نہ بوتگ ۔اے ہما مردم انت کہ الطاف حسین ءَ باز براں اے رہشوناں روچ ءُُ رحمانی مان جلسہاں کارندہانی دست ءَ لٹ وارینتگ ۔اے بوتنی گپے نہ انت کہ متحدہ ءِ کارند الطاف حسین ءِ گپاں دلگوش بکن انت مرچی ہم الطاف حسین گوں وتی درائیں نزوریاں متحدہ ءِ کارندہاں نامداریں تریں مردم انت متحدہ ءَ دگہ چشیں رہشونے نیست کہ الطاف حسین ءِ ہمسری ءَ بکنت ءُُ ننکہ دگہ چشیں رہشونے ہست کہ آ متحدہ ءِ کارندہاں داشت بکنت ۔پمشکا گوں الطاف حسین ءُُ برطانیہ ءِ کارگس ءَ وتی سیادی ءِ پروشگ دگہ راجکاری لیبے ! تنکہ متحدہ انوگیں نگیگیں جاوراں کشگ بہ بیت ۔ہمے حاتر ءَ رینجرز ءُُ ایندگہ مزنیں واکداراں ڈاکٹر فاروق ستار ءُُ خواجہ اظہار الحسن ءَ را یکیں شپ ءَ یلہ دات وہدیکہ ایندگہ درائیں رہشون بندیگ انت ڈاکٹر فاروق ستار ءُُ خواجہ اظہاز الحسن ءَ را پمشکہ یلہ کنگ بوتگ کہ آ دوئیں الطاف حسین ءَ وتی سیادی ءَ پروشگ ءِ جار ءَ بہ پرین انت ۔ انوگیں حکومت ءُُ زوراورانی بلکیں گمان ہمیش بہ بیت کہ اے وڑا الطاف حسین گیشتر ایوکی ءِ آماچ بیت یا آئی ءِ ہمراہ گوں آئی ءَ سست ءُُ سید بہ بنت یا آئی ءِ دست نزور تربنت اے وہد ءَ زانگ نہ بیت کہ متحدہ اے ویل ءِ دیم ءَ دارگ لوٹ ایت یا چہ ویل ءَ درآھگ۔ اے راجکاری رپک ءُُ ھنر انت نوں چارگی انت کہ الطاف حسین فاروق ستار ءَ را چنچو واک ءُُ ذکت دنت ۔مزنیں واکدار زلور اے دلمانگ انت کہ متحدہ ءِ سرا الطاف حسین ءِ زور ہلاس کنگ بہ بیت ءُُ آئیءِ جاہ ءَ فاروق ستار آرگ بہ بیت اے وہد ءَ الطاف حسین ءُُ آئیءِ لندن ءِ کارگس بلکیں پہ ادارکی لہتیں واک ءُُ زور فاروق ستار ءَ دئیگ بلوٹ انت بلئے اے واک ءُُ زور ءَ آ پہ دائمی آئیءَ را دئیگ ءَ رازی ہچبر نہ بنت ۔کماشی ءُُ حاکمی مدام الطاف حسین ءِ بیت البت فاروق ستار ءُُ اظہار الحسن ایوک پارلیمانی راجکاری ءِ کار ءَ کن انت تنکہ وتی کارنداہاں گیش ءَ چہ گیش آسراتی دات بکن انت اگاں متحدہ ءَ اے کار مکتیں انت گڈا متحدہ ءِ درائیں رہشون دزگیر بوتگ ات انت عدالت ءَ متحدہ ءِ سرا بندش جتگ ات متحدہ ءِ رجسٹریشن مہتل کنگ بوتگ ات واکدارانی نیمگ ءَ اے درائیں کار ساڑی بوتگ انت ءُُ متحدہ ءِ رہشون ہم چہ ایشیءَ سہی ءُُ سوگہ ات انت چریشی ءَ رکگ ءِ ایوکیں راہ ءُُ در ہمیش ات کہ درائیں بہتام ءُُ ملام الطاف حسین ءِ سرا مشگ بہ بنت پرچکہ آ چہ پاکستا ن ءَ ڈن انت اے وڑا متحدہ چہ بندش ءَ دارگ بوت نوں ہرکس زانت کہ عسکری ونگ ءِ کماشی فاروق ستار ءَ دئیگ بوت نہ کنت۔ایندگہ کاراں الطاف حسین بید ء فاروق ستار ءِ جست ءَ وت کنت ءُُ پاکستانی متحدہ ءَ گوں الطاف حسین ءِ اے کارندہاں ہچ وڑیں کار ءُُ کردے نہ بیت ۔ہما درائیں کارندہ کہ آہاں چہ کورٹ ءَ سزا رستگ، آ وت ءَ را پاک سرزمین پارٹی ءُُ متحدہ پاکستان ءِ چتر ءِ چیر ءَ دار انت اے وڑا اے درائیں کارندہ چہ سزا ءَ رک اَنت۔