|

وقتِ اشاعت :   October 23 – 2016

زیکیں حال تاک ءَ ھالے اتکگ اَت کہ کوئٹہ پشین اسٹاپ ءَ ایف آئی اے ءَ چاپہ جتگ ءُُ یک کمپنی یے کارگس ءَ بازیں نقلی دوایے گپتگ دوائیانی واھنداں اے گشتگ کہ اے کار گوستگیں دہ سالاں چہ کنگ بوھگ ءَ اِنت اے نقلی دوائی چہ ملک ءَ دگہ یک دمگے ءَ چہ کوئٹہ آرگ بوتگ اَنت ( پدر انت کہ آ جاگہ ءِ نبشتہ کنگ ءَ رپورٹر ءِ قلم سوچ ایت ) بلئے وشیں گپ ایش انت کہ چہ کوئٹہ ءَ اے نقلی دوا ہما ہنداں دیم دئیگ بنت آ دراہیں بلوچ ہند اَنت چوکہ تربت ،پنجگور ،گوادر ،نصیر آباد ،قلات ءُُ ایندگہ لتہیں سندھ ءِ بلوچ ہنداں پرچکہ’’ ہرکس بجنتُ ملو ءَ کہُ ملو مال ءِ حدا اِنت‘‘ ۔نوں اے زانگ اِنت کہ ایف آئی اے کجام گوش ءَ مور ءَ وارتگ کہ اے چاپہ جتگ حالانکہ دوا ءِ واہندگش اَنت کہ کار ءَ آ دہ سال اِنت کہ کنگان اِنت ۔ ۱۹۹۷ ءَ حالتاکے ءَ حالے شنگ بوتگ ات کہ پاکستان ءِ ۷۵ درسد نقلی دوائی بلوچستان ءَ بہا بنت ءُُ ایندگہ ۲۵ درسد ملک ءِ ایندگہ شہر ءُُ میتگاں بہر کنگ بنت بلوچستان ءَ اے نقلی دوائیانی ۹۰ درسد مکران ءَ دیم دئیگ بیت ۔اے حال ۱۹۹۷ ءِ بوتگ نوں ھال چی اِنت اے گپ ءَ بلوچستان ءِ جان سلامتی ءِ وزیر زانت دوائی جوڑ کنوکیں کمپنی ءُُ ڈاکٹر زانت کہ گپ راست اِنت کہ ۱۹۹۷ دوائیانی بلکیں دو بہر بوتگ اَنت یکے اسلی ءُُ دومی نقلی گشگ بوتگ اَنت بلئے نوں بقول ڈاکٹرانی جندئیگ ءَ اسلی دوائیانی چار ءُُ پنچ تہر اَنت ءُُ ہمے وڑا نوکیں حال ایش انت کہ روتاک جنگ ءِ یک شونگالے ءِ رد ءَ پنجاب ءِ گوستگیں گورنر ناراہی ءَ دراہ نہ بوھگ ءِ سوب ءَ وھدے ڈاکٹر ءَ را گشگ بوت کہ نادراہی شر بچار ، گڈا آئی ءَ گورنرکھڈن کتگ کہ اگاں آئی ءَ نادراہی اے نہ بوت گڈا آ ہرچ وڑیں سزا ءِ ھاترا ساڑی اِنت بلئے دوائی ذمہ وار نہ اِنت روتاک ءِ ردا وھدے ہمے دوا ٹیسٹ کنگ ءَ پہ امریکہ ءَ روان دئیگ بوتگ اَنت گڈا آھانی تہا نادراہی ءِ ہلاس کنگ ءِ ہچ وڑیں عنصرے ہوار نہ بوتگ ۔ گپ ایش انت کہ یک ملکے ءَ وھدے گورنر ءَ را اسلی دوائی نہ رس ایت گڈا ایندگہ مہلوک ءِ حال چے بیت یک گپے اے پاد کیت کہ ملک ءَ دوائی سازوکیں کمپنی ہنچو بے مہار ءُُ آھاں کچ ءُُ تُت پر نیست ؟ دنیا ءِ درائیں ریاستانی گوں وتی جاہ مننداں اے کول ءُُ کرار کہ وتی جہمندانی جان سلامتی ءُُ وانگ ءُُ زانگ ءِ آجوئیں دروشمے ءَ بچار اِت اے درچ ءَ چارگ بہ بیت کہ حکومت ءُُ ریاست دوائیانی بابت ءَ چے گامگیج زورگ ءَ اِنت آیا ریاست ٗ۔ اے پیسلہ کتگ کہ دوائی ساز ہرچی کنگ لوٹ اَنت بہ کن اَنت۔ لس مہلوک حکومت ءَ اے ھاترا ءَ ووٹ دنت کہ آئیءَ را گوں نقلی دوائیاں بہ کش ایت ۔گوں دوائی سازیں کمپنیاں ہم پندل بہ بیت یا آھاں جان سلامتی ءِ حاترا کمپنی آں ساد پونز ءَ دئیگ بہ بیت پرچہ چہ نشہ فروشی ءَ ہم گنتر ءُُ رسوا تریں کارے ۔البت ءَ عالمی براہندگاں ازل ءَ پریشی ءَ لانت رست ءُُ منشیات فروشی ءِ لائسنس تنگہ نہ رس ریت منشیات ءِ بیپار چہ اے کاروبار ءَ اے وڑ ءَ گہتر اِنت کہ بیپار ءَ بہ اکنوک زانگ کہ من چے بہا کنگ ءَ اوں بہا زورک ہم زانت کہ آ چے بہا زورگان انت بلئے دوائیانی بیپار ءَ بہا زورک سرپد نہ اِنت کہ آ چے بہا زورگان اِنت بزاں اے بیپار ءَ پاکستان ءِ آئین ءِ ردا ’’ صارف‘‘ ءِ حقانی ہم حق جنی بوھگان اِنت کہ منشیات ءِ کاروبار ’’ صارف‘‘ ءِ اے ھق آئی ءَ رسگان اِنت ۔ اے رد ءَ گوں ایندگہ مردماں گلہ نہ بیت بلئے اگاں راج دوستیں حاکماں گشگ بہ بنت گڈا آھاں گپ ہمیش بیت کہ اے ایوک بلوچستان ءِ جیڑہ نہ اِنت ءُُ دومی اے گپ ءَ جن اَنت کہ مئے گپ گوشدارگ نہ بیت نوں مردم بگشیت کہ کہ اے گوں ایران ءِ گروک ( بجلی) ءِ گپ نہ اِنت گوں پاکستان ءَ امریکہ ناراض بیت ایٹمی تراک ءُُ سازو سامان گپ نہ اِنت کہ فرشتہ دلگران بنت سیندک ،سی پیک ءِ گپ نہ اِنت کہ چین دلگران بیت پنجاب موٹروے ءُُ گرین سروسز بند نہ بیت اگاں پارلیمنٹ ءَ نشتگیں راج دوست اے جست ءَ کت نہ کن اَنت کہ پہ زہر پرچہ مئے مہلوک کشگ بوھگان اِں ت گڈا پارلیمنٹ ءَ نندگ ءَ جواز چے اِنت ؟ اگاں ناں بائدیں پارلیمنٹ ءَ نشتگیں راج دوست چہ دوائی ساز کمپنیاں گوں وتی ورکر ءُُ ووٹراں ہم بدئیت ہما دوائی آں پرچکہ علاج ءِ دست ءَ ہماھانی برات ءُُ بے برات چک چورہ ،گہوار ،جنوزام بوھگان اَنت اولی حق ہماھانی ئیگ اِنت پدا اے گپ گوں ڈھل ءَ وش انت کہ ’’ مئے گپ ءَ کس نزور اِیت‘‘