|

وقتِ اشاعت :  

بنجاہی حکومت ءَ وہدے جار پرینتگ اَت کہ آ ۱۵ مارچ ءَ درائیں ملک ءَ مردم شماری کنت گڈا بلوچستان ءِ مہلوک ءَ اے گپ سک ایر جتگ اَت کہ بلوچستان ءَ جاور چو گیگ نہ اَنت کہ اِدا مردم شماری کنگ بہ بیت۔ مردمانی گمان اَت کہ بلوچستان ءَ بازیں زہرشانی ءَ پد بلکیں بنجاہی حکومت وتی سوڈگ ءَ دوار بچارایت بلئے ہنچو کہ جہانزیب جمالدینی ءِ گشگ اِنت کہ ادا وھدے بلوچستان اسمبلی ءِ منگ نامہ ءُُ بلّاں کس ماں نیاریت گڈا راج دوستیں پارٹیانی تران ءُُ کمیٹیانی منگ نامہ کجام باگ ءِ بٹاگ اَنت ؟ دو روچ ساری بلوچستان ءِ ناوشی ءُُ زہر شانیاں پد ا دارگ شماریات ءِ کما ش آصف باجوہ ءِ نیمگ ءَ جار پرّینگ بوت کہ مردم شماری ۱۵ مارچ ءَ بنا بیت ءُُ بلکیں پہ ’’ کُنّتی‘‘ گشتگ ئےِ کہ مردم شماری چہ بلوچستان ءَ بندات کنگ بیت۔ چریشی پدّر اِنت کہ’’ آپ ءِ منتگ ءَ نیمگ درنئیت‘‘ بلئے حدا ءِ شکر اِنت کہ اے وھد ءَ بلوچستان ءَ دمگی حکومت ءِ کماش راج دوستے نہ اِنت اگاں ناں دومی روچ ءَ جار ے پرینت ئےِ( چو دمگی (بلدیاتی) گچین کاریاں ) کہ’’ بلوچستان ءِ جاور پہ مردم شماری ءَ سک وش ءُُ جوان اَنت ‘‘پہ پارلیمنٹ ءِ باندات ءَ بلوچ اے وھد ءَ پہک چورہ ءُُ مسکین انت بلئے بلوچستان ایکسپریس ءِ یک حالے ءِ ردا اے نیکیں حالے آتک کہ مردم شماری ءَ دارگ ءِ حاترا بی این پی سپریم کورٹ ءَ شتگ ءُُ پٹشینے داخل ئےِ کتگ کہ چوکہ بلوچستان ءِ جاور پہ مردم شماری ءَ گیگ ءُُ گوم نہ انت ءُُ دومی داں وہدے ’’ افغان مہاجر‘‘ بلوچستان ہست ءُُ موجود انت بلوچستان ءَ ساپ ءُُ پلگاریں مردم شماری بوت نہ کنت پرچکہ بلوچستان ءَ بازیں پختون ءُُ افغان ہواریں پارٹی افغان مہاجراں مردم شماری ءَ ہوار کنگ لوٹ انت اے درگت ءَ نادر ا ءِ ڈائریکٹر ءِ پیسریگیں تران مستریں گواہ ءُُ ثبوت انت کہ آئی ءَ سپریم کورٹ ءَ گشتگ ءُُ حال تاکاں تران کتگ کہ بلوچستان ءَ یک زات ءُُ زریات دوست داروکیں پارٹی یے نادرا ءَ بیہار ءُُ بیم ءِ سرا افغان مہاجرانی شناختی کارڑ ءُُ پاسپورٹ جوڑ کنگ ءَ مجبور کنگان انت نوں اے گپ ایوک ءَ نادرا بلوچستان ءِ ڈائریکٹر ئیگ نہ انت اے پارٹی ءِ کماش ہرروچ حال تران ءُُ جلسہ آں اے گپ ءَ زور پردنت ءُُ گشیت کہ ’’ مہاجرانی حاترا صوبہ جوڑ کنگ بہ بیت مہاجراں شناس نامہ جوڑ کنگ ءُُ دئیگ بہ بیت۔‘‘ہمے پارٹی ءِ زور ءِ سرا بنجاہی حکومت مہاجراں افغانستان ءَ دیم دئیگ ءِ وتی سوڈگ ءَ بج اِت تنکہ اے پارٹی ءَ را ماں ۲۰۱۸ ءِ گچین کاریاں پدا ہمے مہاجرانی پشت ءَ بلوچستان اسمبلی ءَ بازیں سیٹے دئیگ بہ بیت۔
بی این پی پٹیشن دومی اے گپ جنگ بوتگ( ایشی ءِ سرا پارلیمنٹ ءَ نشتگیں ایندگہ راج دوستیں پارٹی بے ترک ءُُ توار اَنت) بلوچستان ءَ جاورانی نگیگی ءَ بلوچ دمگاں لکھانی حساب ءَ بلوچاں لڈ ءُُ بار کتگ ءُُ وتی میتگ یلہ کتگ اَنت کہ اشانی مستریں درور مند،گومازی ،دشت ،مشکے،آواران ،پنجگور ،گوادر،تربت ،تمپ، شاپک ،ڈیرہ مراد جمالی ،ڈیرہ بگٹی ،سوئی ،پیرکوہ،مستونگ، قلات،خضدار،مچھ،ءُُ دگہ بازین ضلع ءُُ دمگ ھوار اَنت ۔نوں اے مردمانی مردم شماری چون بوت کنت ؟مردم شماری ءِ حلاپ ءَ ہماوڑیں توارے کہ راج دوستانی نیمگ ءَ آھگی اَت آ وَ نیست انت بلئے چوکہ نیستی ءَ شمبو گہہ اِنت پمیشکہ بائدیں بی این پی ءِ اے گامیگج ساڑا ھگ بہ بیت کہ اے درچ ءَ آئی ءَ جوانیں گامگیجے ذرتگ ۔اے درگت ءَ بائدیں پارلیمنٹ ءَ ہستیں وزیر ءُُ گزیر چو موبائل فون ءِ بل ءِ وڑا مردم شماری ءِ حلاپ ءَ ہم یک بلے دیم ءَ بیار اَنت اگاں بلوچ وزیر ءُُ گزیراں چہ افغاناں بلوچستان اسمبلی ءَ سک بیم کیت ءُُ ترس ایت گڈا بائدیں آ چہ وتی پارٹیانی نیمگ ءَ وتی وڑ ءَ یک پٹیشنے ماں سپریم کورٹ ءَ داخل بکن انت ۔ اے راج دوستیں پارٹیاں وکیلءِ کمی ہم نہ انت ءُُ پہ وکیلانی فیساں بلوچ مہلوک ءِ کرّ ءَ چندہ یے ہم بوت کنت۔