|

وقتِ اشاعت :   January 15 – 2017

حاکمانی گیشیں دلگوش وتی راجکاری ءِ سرا انت ءُُ کمے باز ہما سرکاری کارانی سرا کہ آہاں زرمان پمشکہ اشاں بلوچستان ءِ ایندگہ جیڑھ پہ گچینی ڈکال ءِ ہچ سد ءُُ سما نیست ۔ایشی ءِ شاہدی ایش انت کہ جہل ءَ بگرداں برزا درائیں حاکم ءُُ واکدار چہ بلوچستان ءِ ڈکال ءُُ ہشک سالی ءَ بے سد ءُُ بے پگر انت وہدیکہ بلوچستان ءِ حال ایش انت کہ اے بائدیں تنیگا آفت زدگ‘‘ بوت انت۔ اے دگہ گپے کہ حاکم ءُُ واکدار اے گپ ءَ بے نہ کن انت کہ بلوچستان ءَ ہرچی بیت بلئے بیت سرکار ءَ بس وتی روچ ءُُ روزگار تیلینگی انت حاکم ءُُ واکدار اے گپ ءِ منگ ءَ ہچ وڑا ساڑی نہ اَنت کہ بلوچستان اے وھد ءَ ڈکال ءِ آماچ انت ۔چد ءُُ پیسر اے ڈکال بیست سال ساری آتکگ اَت کہ آوھد ءِ فوجی حاکم ءُُ واکداراں پہ بلوچستان ءِ ڈکال ءَ عالمی مدد ءُُ کمک ءِ زورگ ءَ مکن کتگ اَت ۔ بلوچستان ءِ مہلوک ءَ باز پریات ءُُ زاری کت کہ آہاں ہم مدد ءُُ کمک بہ بیت بلئے آ وھد ءِ فوجی حاکماں بلوچستان ءِ ڈکال مان نیاؤرت کہ پہ بلوچستان ءِ مہلوک ءَ مزنیں وشنیاتکی یے ات ءُُ اے وشنیاتکی روچ ء مرچی برجاہ اِنت ءُُ کسی گوش ءَ مورے نہ وارت ۔امبراں جاور حال چد وگنتر انت ۔درائیں دمگ ،افغانستان ،ایران ءُُ میان ایشیائی ملکاں ہور ءُُ باران ءِ نام ءَ نشان نگواہ ایت ۔اے وھد ءَ درائیں بلوچستان ڈکال ءِ آماچ انت ،ڈیم ،کور ءُُ کانیگ دراہ ہشک انت ۔اے وھد ءَ چہ کوئٹہ ءَ دور ءُُ دراجیں درائیں دمگ سبی،مری بگٹی قبائلی دمگ ،خاران ،رخشان ،سراوان ،مکران ،تیابی دمگ کچھی بیلہ ،آواران لورلائی ءُُ ژوب سکیں ہشک سالی ءِ آماچ انت ۔مزنیں سالے کہ اے دمگاں ہور ءُُ باران نہ بوتگ اے درچ ءَ مستریں نکس ءُُ تاوان مالدارانی ئیگ انت آپ ءُُ چمگ ءُُ کہن ءُُ کاریزانی ہشک بوھگ ءَ مالدار چہ وتی دمگاں لڈگ ءُُ در ءَ روگان انت ۔ گمان ہمیش انت کہ اگاں آوکیں لہتیں ہپتگاں ہور نہ بو ت گڈا بلوچستان ءِ بازیں دمگاں لڈگ ءُُ در یں دمگاں روگ بنا بیت ءُُ اے مردم ہما دمگاں رونت کہ اودا کور ءُُ شت تچگان انت ۔ ہنچو کہ ۲۰ سال پیسر ءَ بوتگ ۔اے ڈکال ءُُ ہشک سالی ءِ شاہدی ایش انت کہ کوئٹہءَ زمین ءِ چیر ءِ آپ کہ ۱۲۰۰ فٹ بوتگ نوں ۱۵۰۰ فٹ ءَ داں سر بوتگ ۔ھور ءِ نہ بوھگ ءِ سوب ءَ اے آپ گیشتر جہل روان انت ءُُ اگاں حاکم ءُُ واکداراں اے بابت ءَ گامگیجے نہ زرت گڈا آ روچ دور نہ انت کہ کوئٹہ شہر یک ریگستانے بیت ءُُ آپ ءِ نہ بوھگ ءَ سوب ءَ دیر نہ بیت کہ کوئٹہ ءِ جاہ منندیں مردم ہم پہ لڈگ ءَ لاچار بنت ۔گوستگین ۷۰ سالاں واکدار کوئٹہ ءُُ گچینی بلوچستان ءِ جیڑھاں ڈالچار کنگان انت ۔پدا وھدے چہ افغانستان ءَ لکھانی حساب ءَ مہاجر بلوچستان ءَ آتک انت گڈا گوستگیں فوجی حاکماں گوں بلوچاں یک سکیں ناروائی یے کت کہ اے لڈوکی ئیں مردماں ماں بلوچستان ءِ شہر ءُُ میتگاں آباد ءُُ جاہ منند کت ۔لڈٖوکیں مردم بائدیں کیمپاں دارگ بوتین انت پدا ایشانی ریکارڈ ءُُ حساب ہم دارگ نہ بوت کہ چنچو افغان آتک ءُُ کجا جاہ منند بوت انت؟ البت ایوک ءَ عالمی ادارگاں فنڈگرگ ءِ حاترا ۵ در سد افغانیانی حساب دارگ بوت بلئے ۹۵ درسد بلوچستان ءِ شہر ءُُ میتگاں گوں ہندی مردماں ہوار ءُُ توار بوت انت ءُ پدا اے افغاناں پاکستانی شناس نامہ ءُُ پاسپورٹ جوڑ کت ءُُ پہ دائمی پاکستانی بوت انت ءُُ اے وھد ءَ چہ ہرچ پاکستانی ءُُ گیشتر پاکستانی آسرایتانی حق دار انت ۔مردمانی لکھانی حساب ءَ پاکستانی شناس نامہ جوڑ کنگ ءَ ہندی مردمانی جیڑھ سک باز گیش بوت انت ۔وہدیکہ ایران ءَ چہ اولی روچ ءَ مہاجر کیمپاں داشت انت ءُُ آہاناں گوں ہندی مردماں ہوار بوھگ ءَ نیشت آ روچ ء مرچی چہ’’ مہاجر جیڑھ‘‘ ءَ بے سما ءُُ بے پگر انت ۔ایران ءَ مہاجر انگت ماں کیمپاں انت ءُُ ھودا آہانی سرکاری سندءَ چار ءُُ گدار بیت ۔بلئے مئے کرا مہاجر اے وھد ءَ پہ ملک ءَ مزنین سردردے انت ۔پہ حکومت ءَ اشانی گر ءُُ دار مزنین جیڑہ یے۔ اے وھد ءَ کوئٹہ ءِ لکھاں مردماں آپ مزنیں جیڑہ یے حکومت مزنیں زرے ہرچ کنگ ءُُ چہ پٹ فیڈ ءَ کوئٹہ ءَ آپ پجارینگ ءَ دلمانگ انت ۔نوں چارگی انت کہ اے کار ءِ سرا چنچو ہرچ کیت ءُُ آیا پہ یک شہرے ءَ ہنچو زر ہرچ کنگ جائز اِنت ؟ بزاں اے پہ افغان مہاجر یناں بلوچستان ءِ بجٹ ءِ سرا مزنیں زورے۔ بلوچستان ءِ سے یک بجٹ ءَ را کوئٹہ ءِ سرا ہرچ کنگ ءِ بدل ءَ شرتر انت کہ بلوچستان ءِ حاترا یک نوکیں’’ سر شہرے ‘‘شوہاز کنگ بہ بیت ءُُ آئی ءِ تہا بنکی آسراتی ءَ پجارینگ بہ بنت ءُُ اگاں نوکیں سر شہر گوادر بندن ءِ نزیک بہ بیت ۔گڈا ’’ گیم چینجر سی پیک‘‘ ءِ حاترا سک جوان ءُُ شر بیت ۔کسانیں ءُُ پچیں شہرے ءِ ہنچو جیڑہ ( کہ کوئٹہ ئیگ انت ) نہ بنت ۔ مئے پنت ءُُ سوج ہمیش انت ایوک ءَ کوئٹہ ءِ آپ سرا ۱۳۰رب کلدار ہرچ کنگ ءِ بدل ءَ اے زرنوکیں سر شہر ءِ سرا اگاں ہرچ بہ بنت گڈایک نوکین ءُُ جوانیں شہرے جوڑ بوت کنت ۔نوکیں سر شہر ءِ جوڑ کنگ ءَ کوئٹہ ءِ جیڑہ آبادی کم بوھگ ءِ سوب ءَ وت ہلاس بنت ۔ مردم لکھانی حساب پہ گچینی سرکاری کاردار ءُُ وزیر ءُُ گزیرانی کہول ءُُ کٹم نوکیں شہر ءَ جاہ منند بنت ۔اے وڑا کوئٹہ آپ ءَ ھوار بازیں جیڑھ وت گشوار بنت بلئے اگاں اے کنگ نہ بوت گڈابلوچستان ءِ درائیں بجٹ کوئٹہ ءِ سرا جنگ بہ بیت پدا اوں کوئٹہ ءِ جیڑہ ہلاس بوھگی نہ اَنت۔