بلوچ داں ۱۹۳۹ ءَ بگرداں روچ مرچی حاکمانی زیردست انت سرد جنگ ءِ زمانگ ءَ بلوچ ءَ نا پہ وت ءَ واک ءُُ اختیارے ہست ات ءُُ ننکہ نوکیں جاورحالاں بلوچ ءَ حالے ہست ۔

۱۹۸۹ ءِ پدء یک تکی (Unipolor) دنیا ءَ بلوچ سوڈگ ءُُ سلاہے بوتگ ءُُ ننکہ نوکتریں تک ماں تکی (Multipolar) دنیا ءَ بلوچ ءَ گپ ءُُ حبری جاہ ءُُ ہندے ہست بلئے اے درائیں راستیاں ہوار اے گپ تچک ءُُ پہک انت کہ بلوچ ہما جاہ ءُُ دمگ ءَ کہ جاہ منند انت آ نوکتریں تک ماں تکی دنیا ءَ مزن ءُُ بلندیں ارزشتے ءِ واہند انت کہ نوکتریں دنیا ءِ سازوک ایشی ءَ را ہچ وڑا ڈلگچار کت نہ کناں ۔

لہتیں روچاں ساری پاکستان ءَ روتاکاں اے حال دیم ءَ آورتگ ات کہ امریکہ ءِ گشگ انت کہ چین پاکستان ءَ اردی /لشکری(آپی) بنجل اڈ کنگ ءَ دلمانگ انت چد ءُُ پیسر بھارت ءِ نیمگ ءَ چین ءِ سرا اے بھتام جنگ بوتگ کہ چین برما ءُُ بنگلہ دیش ءَ پد ماں پاکستان ءِ صوبہ بلوچستان ءِ تیاب دپی دمگ گوادر ءَ لشکری بنجلے شرکنگ لوٹ ایت کہ چرائی ءَ پد زرباری ایشیا ،میانی رودرتک ءُُ فارس ءِ آپی رہ گوزاں چین ءِ لشکری گٹ(Triangle) سرجم بیت ۔

اے درچ ءَ گوستگیں سالاں پاکستان ءِ مزن وزیر نواز شریف ءَ ماں بلوچستان ءِ بازیں ہنداں تروتاباں اے گپ گشتگ کہ بلوچستان ءَ سی پیک ءِ رہ گوزءَ کم چہ کم ۱۰ ہزار دری لشکری نپر آرگ ءُُ دارگ بیت ۔

اے درچ ءَ بلوچ وتی ڈیہہ ءَ مزنیں ترس ءُُ بیمے ءِ آماچ بوتگ بلئے چرے سی پیک ءَ ساری وہدے امریکہءَ اولی رند ءَ ۱۹۹۱ ءَ عراق ءِ سرا ارش کت گڑا راجکاری زانتکاراں اے گپ دیم ءَ آورت کہ روس ءِ پروشگ ءَ پدامریکہ اسرائیل ءِ پشت درءَ میانی رودراتک ءَ مزنیں بدلی ءُُ سدلی آرگ ءَ دلمانگ انت ۔

پرچکہ دنیا سہی ءُُ سرپد انت کہ اسرائیل ءِ سیم ءُُ لٹ انگت نہ گش اتگ انت ءُُ اے درگت ءَ اسرائیل ۲۱ کرن ءَ پدودار کت نہ کنت پمشکہ میانی ایشیا ءَ نوکیں ملک ءُُ سیمسرانی جوڑ بوہگ ءَ پداے دمگ ءَ عرب ملک ءُُ ایران ءِ پرشت ءُُ پروش پہ اسرائیل ءِ سلامتی ءَ المی کنگ بوتگ انت۔

دومی دست ءَ وہدے اول سرا سعودی عرب ءَ ۳۵ سنی ملکانی ہم سنتی کت گڑا بازیں راجمانی ءُُ چاگردی زانتکارانی کنٹ ءَ یکبرے پدا جت کہ امریکہ ءِ’’ نوکیں میان استمانی رہبند‘‘ دیمروئی ءَ انت کہ پہ بازیں ہستیں ملکانی آکبت ءَ نیکیں پالے نہ انت پرچکہ شام ءُُ مصر ءَ پد اسلامی ءَ دنیا ءَ ایوک ءَ سعودی عرب ءُُ ایران دو سلامتیں ملک گشگ بوت کن انت ءُُ ادا دوشش (۶) نہ انت کہ مرداں سعودی عرب ءُُ ایران دیم پہ دیم کتگ انت ؟اے وہد ءَ کہ سعودی اسلامی امریکہ ہم سنتی ءَ ۴۱ یک ملک ہوار بوتگ انت ۔

ہمے وہداں قطر ءِ درکنگ ءِ جار جنگ بوتگ بزاں ہما گمان کہ امریکہ ءِ گوریچانی کوریا ءِ نیمگ ءَ کنگ بوتگ ات، یکپارگی میان روکپت ءِ نیمگ ءَ تاب گپتگ۔ بد بحتی ایش انت کہ جنگ ایران ءِ گوں سعودی عرب ءَ انت بلئے ۴۱ ملکی عرب اسلامی امریکہ لشکر ءِ کماش پاکستان ءِ ارد ءِ پیسریگیں کماش واجہ راحیل شریف انت ۔

پمشکہ اگاں اے جنگ آس گپت گڑا یکیں وہد ءَ ایران ،پاکستان ءُُ افغانستان ہور بنت ،افغانستان اے حاتر ا کہ پاکستان ءَ را وتی گوستگیں بیران گرگ لوٹ ایت ءُُ اے بابت ءَ بھارت ءِ گوات ئے چیر انت ایشی ءَ چے مستریں بدبحتی ایش انت کہ پاکستان افغانستان ءُُ ایران ءِ ہما سیمسر ءُُ لٹ کہ اے ملکاں ہوار گیج انت آ دراہ بلوچ دمگ انت بلئے چریشی ءَ مستریں بدبحتی ایشی انت کہ اے درچ ءَ بلوچ راجمانی گل راجمانی سروک ،راجمانی زانتکار، شہ زانت ءُُ پوہ ءُُ سرپدیں مردمانی ءَ گوش ءَ مورے نہ وارت!