|

وقتِ اشاعت :   October 8 – 2017

اے وہد ءَ مکران مزنیں ڈکالے ءِ آماچ انت ۔ مکران ءَ پہ گچینی تربت ءُُ پنجگور ءَ مچکدگ مرگان انت۔ دھل ءُُ درچک ہشک بوتگ اَنت کہن ءُُ کاریز ہم ہشک تراِتگ انت ۔بالگتر ،پروم ءُُ دشت ءِ دمگاں کور ءُُ گوْرمانی آپ ہُش اتگ انت ۔

ڈکال ءُُ چمگانی ہشک بوہگ ءَ پد دلوت ءُُ گنگدام مرگان انت ۔بلئے اے درائیں جاور حال ءَ نہ حکومت ءِ گوش ءَ مورے وارت ننکہ بلوچ رہشون دلگوشے گور کنگان انت ۔اے وہد ءَ کیچ ءِ دمگ ءَ مچ ءُُ مچکدگ آپ ءِ ہلاسی ءَ ہشک بوتگ ءُُ مرتگ انت ۔گوستگیں شش سالاں ہور نہ بوہگ ءِ سوب ءَ کنڈ ءُُ کابیل بے آپ انت۔کیچ کور ءَ نہنگ ءَ پہ ور گ ءَ ترمپے آپ نگواہ ایت ۔دومی دست ءَ تحصیل دشت ءُُ تحصیل تربت ءِ میان ءَ بستگیں میرانی ڈیم ہم ہشک بوتگ۔ 

ہور ءُُ نوک آپ نہ بوہگ ءِ سوب ءَ ڈیم ءِ آپ چٹ زہر گشتگ ۔ڈیم ءَ بوتگیں ماہیگ ءُُ ساہ دار دراہ مرتگ ءُ بیران بوتگ انت ہمے درچ ءَ آپ ءَ در بازیں مرگ ءُُ ساہ دار ہم آپ نہ بوہگ ءِ سوب ءَ چہ اے دمگ ءَ شتگ انت یا مرتگ انت بلئے ناں وائلڈ لائف ءِ جہگرے گپے جنت ءُُ ننکہ انوائر نمنٹ ءِ بہرگ ءِ آفیسرے اے بابت ترانے کنت ۔

کہ مکران ءِ گنگدامی ءُُ کشت ءُُ کشاری زند ءَ مزنیں تاوان ءُُ نکسانے رستگ بژنی گپ ایش انت کہ اے بابت ءَ ناں رسانک در ءَ گپے ءُُ ترانے بیت ءُُ ننکہ چاگردی رسانک در ءَ ۔مکران ءِ ندکار ءُُ نبشتہ کار ءُُ زانتکار ہم اے بابت ءَ بے ترک ءُُ توار انت اے درچ ءَ دگہ جیڑہ یے ہم است کہ اے وہد ءَ میرانی ڈیم ءِ آپ ورگ ءِ لائق نہ انت بلئے اشکنگ ءَ پہ گوادر ءِ مہلوک ءَ ٹیکرانی سر ابرگ بوہگ ءَ انت ءُُ گوادر ءِ مہلوک ہمے آپ ءِ ورگ ءَ لاچار انت۔

اگاں اے آپ ٹیسٹ کنگ بہ بیت گڈا بوت کنت میڈیکلی پہ دلوتان ہم شر مہ بیت دومی میرانی ڈیم ءِ آپ ہشگ ءَ پد ’’کورء ہوار‘‘ ءِ کش ءُُ گورا نہنگ ءُُ کیچ کور ءِ کور ءُُ بُگ چہ ہاک ءَ سر بار انت پیش ءَ اے کورانی ہما جہلانکی کہ بوتگ نوںآ بار گپتگ انت ءُُ کور ءِ بار گپتگیں جاھاں زہر کہور ءُُ گزسک باز رستگ کہ اگاں اے جاورھال ءَ مہلوک ڈکال ءَ نہ کشت بلئے اگاں باندا ہور ءُُ ہارے بوت گڈا چوکہ میرانی ڈیم ءِ کابیل چہ حاک ءَ پر انت ءُُ کور ءِ آپ راہ ءُ بُگ چہ درچک ءَ ۔

گڈا آؤکیں نوک آپ کجا تان گپت کنت؟ ایشیءِ آسر ایش بیت کہ اے آپ پد کنزی ءَ روت ءُُ یکبرے پدا نہنگ ءُُ کیچ کور ءِ کش ءُُ کری میتگاں آپان کنت کہ اے رندی مہلوک ءَ موہ نہ دنت کہ آ وتی سرا بگپت ۔

پرچکہ کور ءِ بُگ ءَ سک باز زہر کہور ءُُ گز رستگ کہ اے نوک آپ ءَ داں ڈیم سر بوہگ ءَ نیل انت ۔اے درچ ءَ مستریں ترس ایش انت کہ کیچ ءِ ہیڈکوارٹر تربت شہر ہم آپ ءَ بیت بلئے اے بابت ءَ حکومت ہچ وڑیں گامگیج زورگان نہ انت ۔

ءُُ ننکہ اے دمگ ءِ زانتکار ،ندکار،راجکار ءُُ ایندگہ سرپدی ئیں مردم حبر ءُُ حالے کنگان انت کہ اگاں باندا ہور ءُُ ہیروپے بوت گڈا اے آپ کجا رؤت یا دومی اے کہ اے وہدءَ مکران سکیں مزنیں ڈکالے ءِ آماچ انت گڈا حکومت پرچہ توجیلے نہ کنت تنکہ مردم تن ءُُ شد ءَ مہ مرانت بائدیں اے گپ ہم دیم ء آرگ بہ بیت کہ چدو پیسر کہ ہور ءُُ ہارے بہ بیت وزیر ءُُ گزیر، پارٹی ءُُ راجکار حکومت ءَ کھڈن بکن انت۔

اواکہ ڈیم ءَ چہ حد ءَ گیشیں رستگیں زہر کہور ،گز ءُُ ایندگہ درچک ءُُ دار درکنگ بہ بنت ءُُ بگ ءُُ کور ءِ آپ راہ ساپ ءُُ پلگار کنگ بہ بیت تنکہ مزنیں ہور ءُُ ھارے ءِ وہد ءَ کیچ ءِ ہیڈ کوارٹر تربت ،کیچ ءُُ نہنگ کور ءِ کش ءُُ گورے میتگ مہ بک انت ۔

بائدیں اے چیزانی سرا روتاک ،حالتاک ءُُ چاگردی رسانک در ءَ گپ ءُُ تران بنا کنگ بہ بیت تنکہ حکومت پہ مہلوک ءِ رکینگ ءَ گامگیجے ءِ زورگ ءَ مجبور بہ بیت اے وہد ءَ ضلع کیچ ءَ ءُُ بلوچستان حکومت ءَ راج دوستانی حکومت انت اے درائیں راجکار وتارا چہ پراسس ءَ آوکیں مردم گش انت بائدیں پراسس ءَ آوکیں اے راجکار وہد ءُُ موسم ءِ اے پراسس ءَ بے ترانگ مہ بنت ۔