|

وقتِ اشاعت :   October 15 – 2017

ماہتاک بلوچی زند ءِ نیمگ ءَ نوشکی ءَ واجہ عبداللہ جان جمالدینی ءِ اولی سالروچ دارگ بوت ،دیوان ءَ تران کنان ءَ نوائے وطن بلوچی ءِ شونکار واجہ منیر عیسیٰ بلوچ ءَ تران کناں ءَ گُشت کہ عبداللہ جان جمالدینی ہما مردم ات کہ آ ہر ھند ءُُ جاہ ءَ علم ءُُ زانت ءِ روژنائی ودی کرت ۔ 

آئی بیرانی بلوچی زبان ءُُ لبزانک ءِ حاترا مزنیں تاوانے انت ۔ پدا ہم زند اکیڈیمی ءُُ یار جان بادینی ءِ وڑیں مردم لکھ ستاءِ لائق انت کہ آھاں نہ ایوک ءَ عبداللہ جان جمالدینی ءِ مرک ءِ اولی سالروچ ءِ درگت ءَ نوشکی ءَ مزنیں دیوانے برجم داشت بلکں آئی سرا یک مزنیں کتاب ءِ ھم رد ءُُ بند دات ۔ اے کتاب ءَ واجہ عبداللہ جان جمالدینی ءُُ آئی کار ءُُ ھذمتانی باروا باز معلومداری رسیت ۔ 

بلوچی زبان ءِ آزمانکار مبار ک علی بلوچ ءَ ھستیں دور ءِ دز ءُُ ڈنگیں سیاست ءَ رد کناں ءَ گُشت کہ عبداللہ جان جمالدینی ہمامردم ات کہ وھدے زمیندار ءُُ جاگیردار آنی زُلم ءُُ نا انصافی دیست تو آئی ءَ وتی نائب تحصیلدار ءِ پوسٹ یل دات ۔ چیاکہ مردمانی استحصال بوھگ ءَ ات ۔ آئی ءَ گشت کہ عبداللہ جان جمالدینی پکری سیاست ءِ سرخیل اَت ۔ عبداللہ جان جمالدینی ءِ بیران بوھگ ءَ ھوار پکری سیاست ھم بیران بوت۔ 

ورناایں کلمکار عابد میر ءَ عبداللہ جان جمالدینی ءَ را خراج عقیدت پیش کناں ءَ گُشت کہ سنگت اکیڈیمی وتی سروک ءِ نام ءِ حاترا ہر ھند ءُُ جاگہ ءَ علمی ءُُ ادبی کارانی حاترا ساڑی انت۔ دیوان ءِ گڈ سر ا زند اکیڈیمی نوشکی ءِ نیمگ ءَ یار جان بادینی ءَ درستیں مہمانانی شکر ءُُ منت گپت خاص ہما مہمان کہ اے دیوان ءِ حاترا کوئٹہ ءَ چہ نوشکی ءَ اتگ انت ۔ آئی ءَ گشت اکتوبر سال 1999 ءَ من اولی وار ءَ ماہنامہ ’’ بلوچی زند‘‘ ءِ اولی تاک در کرتگ ات ۔ 

آ دور ءَ نوشکی ءَ چہ تاک ءِ ڈیکلریشن ءِ گرگ سک گراں ات ۔ مں وت پریس آرڈیننس گپت ءُُ نوشکی ءِ ڈی سی ءَ سر کرت۔ مزنیں جنجالے ءَ پد ماہتاک بلوچی زند ءِ ڈیکلریشن رستگ ات ۔ زند ءِ درکنگ ءَ چہ عبداللہ جان جمالدینی باز وش بوتگ ات ۔ آئی دلی واھگ اَت کہ بلوچستان ءِ ہر شہرءُُ بازار ءَ بلوچی زبان ءِ تاک ءُُ ماہتاک در بیا انت ۔ تنکہ بلوچی زبان ءُُ لبزانک دیمرئی بکنت ۔ گوستگیں ہژدہ سالانی تہا ماہتاک بلوچی زند ءَ چل ءَ زیات خاصیں تاک درکرتگ۔ 

ایشانی تہا میر گل خان نصیر ، آزات جمالدینی ،عطاء شاد ، سید ظہور شاہ ہاشمی ، غفار ندیم ، حاجی عبدالقیوم ، عنایت اللہ قومی ، غلام محمد شاہوانی ، یوسف عزیز مگسی، میر عبدالعزیز کرد ، ملک محمد پناہ، محمد حسین عنقاء ، بابو عبدالکریم شورش ، گوھر ملک ، غوث بخش صابر، محمد بیگ بیگل، عبداللہ جان جمالدینی ءُُ بازیں دومی کلمکار ءُُ کواس ءِ ھوار انت ۔ 

دیوان ءِ بندات ءَ زند اکیڈیمی ءِ نیمگ ءَ رد ءُُ بند داتگیں کتاب ءِ دیمدرائی کنگ بوت کہ درا مہمان آں کتاب دست ءَ کرت ءُُ اوشتات انت ۔ دیوان ءَ ساڑی ایں مردماں عبداللہ جان جمالدینی ءِ باروا چھاپ ءُُ شنگ کرتگیں کتاب ءَ باز دوست داشت رند ءَ دیوان ءِ ھلاسی ءِ جار جنگ بوت۔ 

میر گل خان نصیر لائبریری ءِ سروک لطیف الملک بادینیءَ مہماناں میر گل خان نصیر لائبریری ءِ تر ءُُ گرد کنائینت ۔ ڈاکٹر شاہ محمد مری ءَ میر گل خان نصیر لائبریری ءَ شش ماہ ءِ تہا ھزار کتاب سوغات کنگ ءِ جار جت ۔ ایشی پد کوئٹہ ءَ چہ اتکگیں کلمکار ءُُ کواساں میر گل خان نصیر ، میر عاقل خان مینگل ءُُ بانک گوھر ملک ءِ قبرانی سرا فاتحہ ونت ۔ 

ایشی ءَ پد بادینی ءِ حلق ءَ یار جان بادینی ءِ نیمگ ءَ داتگیں نانءِ دعوت ءَ بہر زورگ ءَ پد بَھٹو ءِ حلق ءَ شُت انت اودا عبداللہ جان جمالدینی ءُُ آئی لوگ بانک ءِ قبر ءِ سرا فاتحہ ونت انت ۔ رند ءَ دیم پہ کوئٹہ ءَ رادگ بوت انت۔