|

وقتِ اشاعت :   November 5 – 2017

گوستگیں روچاں بلوچستان حکومت ءِ تہی کارانی بہرگ ءَ اے جار پرینتگ ات کہ آہاں بلوچ سرمچار ڈاکٹر اللہ نذر ءِ لوگی گوں بازین دگہ زالبولاں دزگیرکتگ۔ چرآئی ءَ پد چاگردی رسانک در ءَ مزنیں ناوشی یے درشان کنگ بوتگ ات کہ زالبولانی دزگیر کنگ یا آوار جنگ اسلامی ربیت ءُُ پیغمبر ء اسلام ءِ سنت ءَ در انت بائدیں اسلامی ملکے ءَ اے وڑیں گامگیج زورگ مہ بیت۔ 

اے درائیں کار کرتاں بلوچستان حکومت ءِ تہی کارانی بہرگ ءِ گشگ ہمیش ات کہ اے زالبول چوکہ درکانودی رہبند ء چہ پاکستان ءَ افغانستان ءَ رہادگ بوتگ انت پمشکہ پاکستان ءُُ افغانستان ءِ سیمسراں اشاں دارگ ءُُ دزگیر کنگ بوتگ بلئے دزگیریں زالبولانی کہول ءِ ردا اے زالبول ملکءِ تہ ءَ دزگیر کنگ بوتگ انت ۔

اے درگت ءَ جیڑھ ایش نہ انت کہ زالبول چہ کجا دزگیر کنگ بوتگ انت بلکیں ایش انت کہ پرچہ دزگیر کنگ بوتگ انت؟ ہمے اسلامی ربیت ءِ درچ ءَ اے زالبولانی دزگیریءِ توار ماں پاکستان ءِ مزنیں ایوان سینٹ ءَ اِش کنگ بوتگ کہ اودا رضاربانی ءَ گشتگ ات کہ چوکہ زالبولانی دزگیری اسلامی ربیت ءِ ہلاپ انت پمشکہ بائدیں اے زالبول گوں شرپ ءُُ عزت ءَ یلہ دئیگ ءُُ آہانی لوگاں سرکنگ بہ بنت ۔

ہمے درچ ءَ بلوچ راج دوستیں گلانی نیمگءَ ہم بازیں حال ترانے دیم ءَ اتکگ ات ءُُ حکومت ء بلوچستان ءِ اے گامگیج ءَ را ایر جنگ بوتگ ات ۔اے درگت ءَ گچینی ھال تران بلوچستان ءِ پیسریگیں سروزیر اسلم رئیسانی ءِ نیمگ ءَ اتکگ ات کہ آئی ءَ گشتگ ات کہ اے زالبولانی دزگیر کنگ ءَ پد بلوچستان ءِ جاور ھال

چدو گیشتر حراب بوت کن انت ءُُ آئی ءَ گشتگ ات کہ بائدیں بلوچستان حکومت اسلامی ءُُ بلوچ ربیت ءِ پش در ءَ اے زالبولاں یل بکنت ۔
زاہریں اے درچ ءَ مستریں کرد چاگردی رسانک درئیگ ات اگاں چاگردی رسانک در ءَ اے جنز دیم ءَ میارورت انت گڈا بلکیں سینٹ ءَ چشیں توارے دیم ءَ مہ یتکیں ءُُ ننکہ بلوچ راج دوستیں گلاں چشیں توارے چست کتگ اَت بلئے آسر کہ شرانت بزاں ہرچی شرانت ۔

پمشکا ذی بلوچستان حکومت ءِ نیمگ ءَ اے سوڈگ کنگ بوت کہ اے دزگیریں زالبول اسلامی ءُُ بلوچی ربیت ءِ ردا یلہ کنگ بوتگ اَنت کہ بلوچستان حکومت ءِ یک جوانین گامگیجے ،پرچکہ اے زلوری نہ انت کہ کسے ءِ لوگ واجہ گوں ریاست ءَ جنگ ءَ بہ بیت ءُُ آئی ءِ سزا آئیءِ لوگبانک ءَ دئیگ بہ بیت ۔

اے گپ ءَ اسلامی ءُُ بلوچ ربیت ءَ ہوار کانود ہم نہ من ایت پرچکہ بازبراں اے وڑ بیت کہ اگاں پت پہ وت ءَ سیاسی راہ یے گچین کنت زلوری نہ انت ،چک آئیٗ،ہم پلہ مرزی کنوک منوک بہ بیت یاکہ اگاں برات پہ وت یک سیاسی راہ یے گچین کنت گڈا دومی برا ہم المی انت کہ ہما راہ ءِ مسافر بہ بیت ۔

بن دپتر اے گپ ءِ گواہ انت کہ بازیں پتاں وتی چک ،چکاں وتی پت ءُُ براتاں ،وتی برات پہ سیاسی دگری ءِ سرا کشتگ ءُُ جتگ انت ،پمشکہ اے چٹ انسانی حقانی ہلاپ انت کہ پت ءِ کرتگین ءِ سزا چک ءَ ،چک ءِ مات ءُُ برات ءِ برات ءَ را دئیگ بہ بیت ۔

ہرچ کارے کہ ہما مردم کنت آئی ءِ سزا ہما مردم ءَ دئیگ بہ بیت ۔پدر انت کہ بلوچستان حکومت ءَ اے ماراتگ ءُُ اے گامگیج زرتگ کہ آئی ءَ را اے وہد ءَ درائیں ملک ساڑاہگ بوہگان انت ۔
دومی بلوچستان ءِ سر وزیر نواب ثنا ء اللہ زہری ءَ اے زالبول سروزیری کارگس ءَ لوٹائینتگ ءُُ بلوچی چادر سر اداتگ ۔اے پہ آئیءِ بلوچی شان ءَ مزنیں کار ءُُ شرپے ۔اگاں چو مہ بوت اِنت بلکیں باندا بن دپتر ءِ بازیں تاکے پولنگ بوت انت یک گپے گیر آرگی انت کہ جوانیں کار مدام بن دپتر ءِ بہر بنت۔