من مروچی چہ وتی روچ ءِ چست ءُُ ایراں دمبرتگ ات ۔من یک سر جاہے زرت ءُُ دراج بوت آں کہ کمو تاہیر بباں بلئے انچوکہ من سر ایر کت دانکہ یکے من ءَ گوانک جنگ ءَ ات من چہ لوگ ءَ دراتک آں دیم پہ ہمے توار راہادگ بوت آں من وہدے ڈں ءَ رس ات آں دانکہ یکے اوشتاتگ چمی من ءَ سک انت من باز جہد کت بلئے من آئی ءَ راپجانیارت۔
واجہ تو من ءَ توار کنگ ءَ ئے ؟ من چہ آئی ءَ جست کت ۔’’ہو،من ترا توار کنگ ءَ آں آئی ءَ پسہ دات ۔ہیر انت واجہ من تراپجاآرگ ئنہ آں ترامنی ہاترا ءَ چے کار ہست انت ۔من چہ آئی ءَ پد ءَ جست کت تو من ءَ پجا نیارئے بلئے من ترا شرزاناں من زاناں کہ ابید تو دگہ کس منی حبر ءَ نہ زورایت من پمیشکا تئی گور ءَ اتکگاں ۔
آئی یک گین ءَ درائینت ۔من وَ ترا نہ زاناں کہ توکئے ؟ من ترا مرچی گندگاں چدی پیسر من ترا نہ دیستگ من پد ءَ جست کت ۔مناں کہ تو من ءَ چد ءُُ پیسر نہ دیستگ بلئے من ترا مدامی دیستگ من تئی دیما نیا تکگاں پمیشکا تو من ءَ نہ دیستگ من ءَ تئی ھاترا ءَ کار نہ بوتگ بلئے مروچی من ءَ تئی زلورت انت ۔ نوں تو من ءَ بہ گش کہ من منی کار ءَ کنئے یانا ۔۔آگشان ات۔تئی کار ءَ تئی کار چے انت من پد ءَ جست کت ۔
بیارواں من ترا گشاں آئی من ءَ دست ءَ گپت ءَ رہادگ بوت آئی من ءَ یک مچکدگے ءَ برت ءُُ گشت ئے بہ نند ءُُ بچار من نشتاں ءُُ چاراں یکے وتی مچ ءُُ ڈگاراں آپ بندگ ءَ انت دگہ یکے اتک ءُُ گوں ہمے مرد ءَ گر ءُُ چیل بوت ءُُ گشگ ءَ لگ ات کہ دنیگہ آپ منیگ انت تو چی ءَ آورتگ وتی ڈگار ءَ بندگ ءَ ئے آئی ہمے مرد ءَ را گشت ۔
من ایوک ءَ پنچ منٹ ساری آپ گپتگ گوستگیں ہپتگ تو دہ منٹ ءَ دانکہ وتی ڈگار ءَ بستگ گون ہمے حبر ءَ دوئیں سر ءَ مود بوت انت یکے ءَ دومی ءِ پوشاک درت انت ہردو چہ ہون ءَ میچل بوت انت ۔
آئی پد ءَ من ءَ دست ءَ گپت ءُُ گشتی دیست ئے نوں بیا رواں ماپاد اتک ایں ءُُ رہادگ بوت ایں دگہ میتگے ءَ سر بوت ایں اد ءَ دو مرد پہ آجگاہّ بوچ ءُُ باچ) سر ءَ جنگ کنگ ات انت من ترا گشتگ کہ وتی لوگ ءِ بوچ ءَ باچاں اد ءَ دور مہ دئے بلئے تو انگت ءَ پرچا دور اِش دی ئے آ ئی ءَ راگشگ ات اے وَ واجہ حدا ءِ کور انت نہ تئی جاہ انت نا منیگ انت آئی ءَ گشت ۔
اے دوئیں اد ءَ سر ءَ مود بوت انت ماچداں پاد اتک ءُُ دگہ جاھے شت ایں دانکہ دو جوان اد ءَ سر ءُُ مود ات یکے دومی ءَ گش ءَ ات کہ تو من ءَ چم سہر داتگ ہمک جاہ ءَ کہمئے سرکپت من چاراں کہ یکے پہ دومی ءِ ہوناں تنیگ انت ۔
تو وتی کار من ءَ نہ گشت باریں ترا منی ھاتر ءَ چے کارے ہست انت من چہ آئی ءَ جست کت من لوٹاں کہ ہمک گور ءَ مہر ءُُ دوستی بہ بیت من پمیشکا اے جیڑۃ ءُُ جنجال ترا پیش داشت انت اگاں تو بہ لوٹ ئے چوش بوت کنت آئی ءَ گشت ۔من بہ لوٹ آں من چے کت کناں منی دست کج ءَ رس ایت من آئی ءَ راگشت تئی دست ءَ بیت تو نہ زانئے من کیا آں ۔
من دپا ءِ درچک اں منی تاک ءُُ چوڑ کینگ ءِ آس ءَ ستکگ انت ۔بلئے منی چیزے بر پش کپتگ تو ایشاں بزور گلزمین ءِ دلبند ءَ شانک بدئے مہر ءِ آپ اش بہ واریں وہدے کہ اے درکپ انت ۔
من پد ءَ سبز ءُُ آباد باں یک رندے پد ءَ ہمک مہر ءُُ دوستی ودی بیت ءُُ چاریں نیمگاں تالان بیت ۔آئی ہمے برمنی دست ءِ دل ءَ دات انت ءُُ وت شت ءُُ گار بوت من ہمے برگلزمین ءِ دلبند ءَ شانک دات انت ءُُ مہر ءِ ودار ءَ نشتاں کہ کدین بیت وشی ءِ جمبر بہ بند انت ءُُ مہر ءِ ہور بہ گوارایت ءُُ وپا ءِ درچک سبز بہ بیت۔