کوئٹہ(اسٹاف رپورٹر)کوئٹہ میں تخریب کاری کا منصوبہ ناکام بنا دیا گیا ،سعید احمد خان روڈ پر پل کے نیچے سے دو مارٹر گولے برآمد کر لئے گئے ۔پولیس کے مطابق تھانہ قائد آباد کی حدود سعید احمد خان روڈ پر سیوریج نالے میں پل کے نیچے رکھے تھے۔ مقامی لوگوں کی جانب سے اطلاع ملنے پر پولیس اور ایف سی موقع پر پہنچ گئی اور علاقے کو گھیرے میں لیا۔بعد میں بم ڈسپوزل سکواڈ کو طلب کیا گیا جس نے ایک مارٹر گولے کو ناکارہ بنا دیا۔ بم ڈسپوزل سکواڈ کے مطابق دوسرا گولہ خطرناک حالت میں تھا اور اسے ڈی فیوز نہیں کیا جاسکتا اس لئے اسے آرمی رینج میں لے جاکر ضائع کردیاگیا ۔واضح رہے کہ ایک روز قبل بھی اسی مقام سے ایک مارٹر گولہ برآمد کیا گیا تھا۔
