کراچی: نارتھ ناظم آباد میں رینجرز ہیڈ کوارٹر کے قریب دھماکے سے متعدد افراد زخمی ہوگئے ہیں۔
کراچی کے علاقے نارتھ ناظم آباد بلاک بی میں واقع رینجرز ہیڈکوارٹر کے قریب ایک بیکری کے باہر دھماکے میں 8 افراد زخمی ہوگئے، زخمیوں کو عباسی شہید اسپتال منتقل کردیا گیا،جہاں انھیں طبی امداد فراہم کی جارہی ہے۔ دھماکے سے قریبی دکانوں، عمارتوں اور وہاں کھڑی موٹر سائیکلوں کو بھی نقصان پہنچا۔
واقعے کے فوری بعد رینجرز اور پولیس اہل کاروں نے جائے وقوعہ کو گھیرے میں لے کر شواہد اکٹھے کرکے تحقیقات کا آغاز کردیا۔ بم ڈسپوزل اسکواڈ کے مطابق دھماکے میں 5 کلو گرام دھماکا خیز مواد استعمال ہوا۔ دھماکا خیز مواد موٹر سائیکل میں نصب کیا گیا تھا۔
واضح رہے کہ نارتھ ناظم آباد میں واقع اس رینجرز ہیڈ کوارٹر کو گزشتہ 2 برسوں کے دوران 3 مرتبہ دہشتگردی کا نشانہ بن چکا ہے۔
