حسب سابق حکومت بلوچستان نے بجٹ دستاویزات کو خفیہ اور مقدس سمجھتے ہوئے اس سے عوام الناس اور میڈیا کو رسائی سے محروم رکھا حکمرانوں کی نظر میں یہ ایک مقدس دستاویز ہے لہٰذا اس کو عوام اور میڈیا کی پہنچ سے دور رکھا جائے دوسری وجہ یہ ہے کہ حکومت وقت اتنی مقبول ہے کہ اس کو عوام الناس میں میڈیا کے ذریعے تشہیر کی ضرورت نہیں ہے روایات کو برقرار رکھتے ہوئے افسر شاہی نے بجٹ دستاویزات میڈیا کو دینے سے انکار کیا ہمارے بہت ہی سینئر صحافی کے ساتھ نہ صرف تلخ کلامی کی بلکہ صاف طور پر یہ کہا کہ دستاویزات نہیں ملیں گی کیوں نہیں ملیں گی اس کا جواب کسی بھی افسر نے نہیں دیا یہ دوسرا سال ہے کہ موجودہ حکومت نے بجٹ کی دستاویزات اخبارات اور میڈیا کو فراہم نہیں کیں جبکہ دوسری جانب وزیراعلیٰ یہ شکایت کرتے رہے ہیں کہ انہوں نے اتنے کارنامے سرانجام دیئے ہیں میڈیا میں اس کی تشہیر نہیں ہوئی تشہیر بھی کیوں ہو حکومت خود معلومات کی فراہمی میں رخنہ ڈالتی ہے پورے پاکستان میں بجٹ کی زیادہ سے زیادہ تشہیر کیلئے وفاقی اور صوبائی حکومتیں سوائے بلوچستان حکومت کے تمام صحافیوں کو دستاویزات ان کے گھر اور دفاتر تک پہنچائی جاتی ہیں بلکہ تمام حکومتیں صحافیوں کو وہ تمام تر سہولیات فراہم کرتی ہیں کہ عوام الناس کو یہ تمام معلومات اخبارات کے ذریعے پہنچ جائیں اس کے لئے صحافیوں کو ہوائی جہاز کے ٹکٹ رہائش اور ٹرانسپورٹ تک فراہم کی جاتی ہے تاکہ بجٹ کے اچھے کام کی زیادہ تشہیر کی جاسکے دوسری طرف حکومت بلوچستان ہے جو ہر چیز کو خفیہ رکھنے میں اس حد تک بضد ہے کہ وہ سینئر صحافیوں سے تلخ کلامی پر اتر آئی ہے کسی قیمت پر بجٹ کی مناسب تشہیر نہیں کرانا چاہتی یہ بات سب کو معلوم ہے کہ حکومتی ارکان کی سب سے بڑی کمزوری PSDP ہے جس میں وزراء کا ذاتی ترقیاتی پروگرام سب سے زیادہ نمایاں ہے اس لئے اس کا خفیہ رکھنا ضروری سمجھا جاتا ہے اس کا مقصد یہ ہے کہ لوگوں کو یہ نہیں معلوم ہونا چاہیے کہ اس میں کتنی گٹر بناؤ اسکیمیں ہیں تاکہ اس کی معلومات عوام تک نہ پہنچیں معاشی ترقیاتی منصوبے کے دو اہداف ہیں پہلا کہ کسی منصوبہ پر عملدرآمد سے روزگار کے مواقع پیدا کئے جائیں اور دوسرا یہ کہ ریاست کی آمدنی میں اضافہ کیا جائے اگر کسی منصوبے سے یہ وہ اہداف حاصل نہیں ہوتے تو وہ گٹر بناؤ اسکیم سے زیادہ حیثیت نہیں رکھتی حالیہ بجٹ کا منفی اور نمایاں پہلو یہ ہے کہ غیر ترقیاتی بجٹ میں 10 ارب روپے کا اضافہ ہوگیا ہے ماہرین معاشیات یہ توقع کررہے تھے کہ اس بجٹ میں غیر ترقیاتی بجٹ میں کٹوتی ہوگی اور زیادہ سے زیادہ رقم معاشی ترقی کیلئے استعمال میں آئے گی مگر ایسا نہیں ہوا دوسری افسوسناک بات یہ ہے کہ رواں سال میں ترقیاتی اخراجات میں پانچ ارب روپے کم خرچ کئے گئے کیوں؟ اس کا کوئی جواب نہیں ہے صحت، تعلیم اور دوسرے شعبوں میں اضافی رقم رکھی گئی ہے مگر وہ صرف غیر ترقیاتی اخراجات کیلئے، پوری بجٹ تقریر میں صرف نعرے بازی نظر آتی ہے اس میں بجٹ تفصیلات کم ہیں یا نہ ہونے کے برابر ہیں یہ عوام الناس کے ساتھ زیادتی ہے کہ اس غریب صوبے کے 164ارب روپے غیر ترقیاتی اخراجات پر خرچ ہوں ماہرین معاشیات یہ جائز توقع رکھتے ہیں کہ غیر ترقیاتی اخراجات میں زبردست کمی ہو اور ترقیاتی عمل کو تیز کردیا جائے مگر اس بجٹ میں اس کے برعکس کام ہوا جو گزشتہ50سالوں سے ہورہا تھا۔
