بلوچستان روایتی طور پر پاکستان کا واحد صوبہ ہے جہاں پر روز اول سے اتحادیوں کی مشترکہ حکومت رہی ہے صوبہ بننے کے بعد سردار عطاء اللہ مینگل کی سربراہی میں نیشنل عوامی پارٹی اور جمعیت علماء اسلام کی اتحادی حکومت بنائی گئی اس کے بعد تقریباً ہر انتخابات کے بعد بلوچستان میں اتحادی حکومت بنائی گئی اس کی بنیادی وجہ صوبے کی وسعت ہے جو رقبے کے لحاظ سے آدھا پاکستان ہے اس وسیع وعریض صوبے میں کسی ایک پارٹی کی حکومت بننا مشکل ہے نہ ہی کوئی پارٹی اتنی مقبول ہے کہ وہ انتخابات میں سنگل اکثریتی پارٹی بن کر ابھرے اس لئے صوبے کے رہنماء انتہائی کشادہ دل انسان ہیں کہ دوسری پارٹیوں خصوصاً ہم خیال پارٹیوں کو اتحادی حکومت میں شامل ہونے کی دعوت دیتے ہیں اس کا بنیادی مقصد یہ ہے کہ مل جل کر بلوچستان کے پیچیدہ مسائل کا حل تلاش کریں اور عوام الناس کو زیادہ سے زیادہ راحتیں فراہم کریں بلوچستان کے مسائل بہت زیادہ گمبھیر ہیں جن کو حل کرنے کیلئے مشترکہ کوششوں کی ضرورت ہے بلوچستان میں سب سے بڑا مسئلہ پسماندگی اور غربت ہے اس کے بعد بے روزگاری، کم وسائل جس سے ترقی مشکل ہوتی ہے بنیادی ڈھانچہ آج دن تک تعمیر نہ ہوسکا امن عامہ کا مسئلہ زیادہ مشکل نہیں کیونکہ حکومت کی معمولی کوششوں سے اس میں بہ درجہ بہتری آگئی ہے نسبتاً شاہراہیں محفوظ ہوگئی ہیں لوگ بلا خوف خطر صوبے کے ایک کونے سے دوسرے کونے تک سفر کررہے ہیں انتظامیہ کے طرز عمل میں بہتری آئی ہے وہ لوگوں کی فریاد جلد سن لیتے ہیں کرپشن میں کمی کا رجحان نمایاں ہے لہٰذا ضرورت اس بات کی ہے کہ اتحادی پارٹیاں حکومت کو مضبوط بنائیں اور ایک دوسرے کے ساتھ تعاون کریں تاکہ سیاسی اختلافات کو ایک طرف کر کے صرف اور صرف عوامی فلاح اور بہبود کیلئے کام کریں عوام کی یہ جائز توقع ہے کہ چھوٹی چھوٹی باتوں اور اختلافات کو پس پشت ڈال دیں اور انتظامی اور حکومتی معاملات میں تعاون کریں اور مقصد عوامی مسائل کا حل ہونا چاہیے روز اول سے لوگوں کی یہ خواہش رہی ہے کہ اتحادی پارٹیاں اچھی حکمرانی کو یقینی بنائیں تاکہ عوامی مسائل جلد سے جلد حل ہوں اتحادی حکومت میں رہ کر اختلافات جمہوریت کی نفی تصور کئے جاتے ہیں اور اس سے لوگوں کو کوئی اچھا پیغام نہیں جاتا لوگوں کی یہ جائز توقع ہے کہ تمام اتحادی پارٹیاں صرف ایک کی حکومت کے ماتحت کام کریں خدانخواستہ صوبے میں دو حکومتیں نہیں ہیں اتحادی حکومت کا یہ فرض بنتا ہے کہ سب مل کر وفاق سے زیادہ سے زیادہ وسائل حاصل کریں اوران وسائل کو اپنے ہی حلقوں کے لوگوں اور ان کی فلاح وبہبود پر خرچ کریں اگر ایسا نہیں کریں گے تو وہ اپنے سیاسی مفادات کو خود نقصان پہنچائیں گے اتحاد کو مضبوط بنائیں حکومت کو مضبوط بنائیں اور وفاق سے اپنے حقوق مل کر حاصل کریں ورنہ اختلافات ہمیشہ تاریخ کا حصہ رہیں گے عوام الناس پر اس کا اچھا تاثر نہیں جائے گا۔
