کوئٹہ(اسٹاف رپورٹر)کوئٹہ کے علاقے جتک اسٹاپ پر ایف سی نے کارروائی کرتے ہوئے 88 افغان مہاجرین کو گرفتار لیا جبکہ سیٹلائٹ ٹاؤن سے پولیس نے گاڑی چوری کرنے والے کو چور کو رنگے ہاتھوں گرفتار کرلیا ۔ ایف سی ذرائع کے مطابق ایف سی اہلکاروں نے جتک اسٹاپ پر ناکہ لگا کرمختلف بسوں اور گاڑیوں کی تلاشی کے دوران 88 افغان مہاجرین کو گرفتار کر لیا اور انکے قبضے سے نائن ایم ایم پستول کا ایک جعلی لائسنس اور 27 راؤنڈز برآمد کرلئے ۔گرفتار افراد کو مزید کارروائی کیلئے سیٹلائٹ ٹاؤن پولیس کے حوالے کردیا گیا۔ ایف سی نے دوران چیکنگ بغیر کاغذات کی سات موٹر سائیکلیں بھی قبضے میں لے لیں اور ان کے مالکان کو گرفتار کرلیا ۔ایف سی نے 84 گاڑیوں سے کالے شیشے بھی اتار لئے۔ دوسری جانب پولیس نے سیٹلائٹ ٹاؤن میں گیلانی ہسپتال کے پارکنگ سے ایک چور کو گاڑی چوری کرتے ہوئے رنگے ہاتھوں گرفتارکر لیا۔ ایس پی سریاب عمران قریشی کے مطابق ملزم سے چوری کی گئی گاڑی اور پندرہ عدد ماسٹر چابیاں بھی برآمد کی گئیں۔