کوئٹہ(اسٹاف رپورٹر)بلوچستان کے ضلع نصیرآباد میں ریلوے پٹڑی کو دھماکے سے تباہ کردیا گیا۔ پولیس کے مطابق پیر اور منگل کی درمیانی شب تقریباً دو بجے نصیرآباد کی تحصیل ڈیرہ مراد جمالی میں لال شاہ قبرستان کے قریب نامعلوم افراد نے ریلوے پٹڑی پر دھماکا خیز مواد نصب کر رکھا تھا جس کے پھٹنے سے پٹڑی کا دو فٹ حصہ تباہ ہوگیا۔ دھماکے کے باعث ٹرینوں کی آمدروفت روک دی گئی۔ اطلاع ملنے پر پولیس موقع پر پہنچ گئی اور جائے وقوعہ سے شواہد اکٹھے کئے۔ ریلوے سکھر ڈویڑن کی ٹیم نے چار گھنٹے کی جدوجہد کے پٹڑی کی مرمت مکمل کرکے آمدروفت بحال کردی۔