اسلام آباد: چینی وزیر خارجہ وانگ ژی نے پاکستان کو اپنا ‘دوسرا گھر’ قرار دیتے ہوئے کہا ہے کہ چین پاکستان کے ساتھ تعلقات کو خصوصی اہمیت دیتا ہے اور دوونوں ممالک ایک دوسرے کے بہترین شراکت دار ہیں۔
جمعرات کو اپنے دو روزہ دورے کے سلسلے میں اسلام آباد پہنچنے والے چینی وزیر خارجہ وانگ ژی نے مشیر برائے امورخارجہ و قومی سلامتی سرتاج عزیز کے ساتھ ملاقات کی۔
ملاقات کے بعد مشترکہ پریس کانفرنس کے دوران وانگ ژی کا کہنا تھا کہ پاکستان اور چین کے درمیان اعتماد کی اعلیٰ فضا قائم ہے۔
ان کا کہنا تھا کہ پاکستان کے ساتھ توانائی، اسٹرکچراوراقتصادی راہداری کے منصوبوں پرکام جاری ہے اور اقتصادی راہداری سے پاکستان کے کئی شعبے ترقی کریں گے۔
افغانستان میں استحکام کے لیے ہر ممکن مدد فراہم کرنے کی یقین دہانی کراتے ہوئے چینی وزیر خارجہ کا کہنا تھا کہ افغانستان ایک نئے دور میں داخل ہورہا ہے، جہاں امن کا قیام خطے کے لیے بہت ضروری ہےاور چین اس سلسلے میں اپنا تعاون جاری رکھے گا۔
انھوں نے اعتراف کیا کہ افغانستان میں امن کے لیے پاکستان کا کردار اہم ہے اور پاکستان افغانستان کے مسائل کا بہتر حل پیش کرسکتا ہے۔
وانگ ژی کا کہنا تھا کہ چین کے صدر شی جنگ پنگ اسی سال پاکستان کا پہلا دورہ کریں گے۔
مشیر برائے امور خارجہ سرتاج عزیز نے پریس کانفرنس کے دوران کہا کہ چینی وزیر خارجہ کے ساتھ ملاقات میں سیاسی، اقتصادی اور اسٹریٹجک تعاون پر بات ہوئی۔
انھوں نے بتایا کہ چین اقتصادی راہداری کے تحت توانائی منصوبوں پر سرمایہ کاری کررہا ہے، جبکہ افغانستان میں استحکام کے لیے بھی چین اور پاکستان مل کر کام کریں گے۔
سرتاج عزیز نے مزید کہا کہ چین نے دہشت گردی کے خاتمے کے لیے پاکستانی اقدامات کو سراہا ہے۔
