کوئٹہ: ڈیرہ بگٹی میں ریموٹ کنٹرول دھماکے میں دو افراد جاں بحق ہوگئے جبکہ سوئی میں ایف سی چیک پوسٹ پر دو راکٹ داغے گئے ۔ لیویز کے مطابق ڈیرہ بگٹی سے 130کلو میٹر شمال مشرق میں کلچاس کے مقام پر سڑک کنارے نصب ریموٹ کنٹرول بم کا دھماکا اس وقت کیا گیا جب وہاں سے ایک پک اپ گاڑی گزر رہی تھی۔ ۔ دھماکے کے نتیجے میں گاڑی تباہ ہوگئی اور اس میں سوار پنے خان ولد جمعہ خان اورمحمد نواز ولد ہیرو مرہٹہ بگٹی سکنہ پھیلاواغ ڈیرہ بگٹی جاں بحق ہوگئے۔ بتایا جاتا ہے کہ دونوں افراد ڈیرہ بگٹی سے پنجاب کے علاقے راجن پور جارہے تھے۔ ادھر ضلع ڈیرہ بگٹی کی تحصیل سوئی میں نامعلوم افراد نے ایف سی سوئی رائفل22ونگ کی چیتا چیک پوسٹ نمبر8پر نامعلوم سمت سے یکے بعد دیگرے راکٹ کے دو گولے داغے جو چیک پوسٹ کے قریب گر کر دھماکوں سے پھٹ گئے تاہم کوئی جانی نقصان نہیں ہوا۔ایف سی کی جوابی کارروائی پر حملہ آور فرار ہوگئے۔
