کوئٹہ: بلوچستان کے ضلع قلات، کیچ اور لسبیلہ میں ٹریفک حادثات میں خاتون سمیت دو افراد جاں بحق جبکہ پچیس سے زائد زخمی ہوگئے۔ لیویز کے مطابق قلات کی تحصیل خالق آباد منگچر کے قریب سورو کے مقام پر کوئٹہ کراچی قومی شاہراہ پر مسافر بس اور ٹریلر میں تصادم ہوا۔ حادثے کے نتیجے میں ایک شخص جاں بحق جبکہ چودہ افراد زخمی ہوگئے۔ مسافر بس کراچی سے کوئٹہ آرہی تھی جبکہ ٹرالر کوئٹہ سے کراچی جارہا تھا۔ زخمیوں کو مستونگ کے سرکاری اسپتال میں طبی امداد فراہم کی گئی۔ ایک اور حادثہ ضلع کیچ کے نواحی علاقے تجابان میں پیش آیا جہاں تربت سے کیلکور بالگتر جانے والی مسافر پک اپ تیز رفتاری کے باعث الٹ گئی۔ حادثے کے نتیجے میں ایک خاتون مسافر جاں بحق جبکہ پانچ مسافر زخمی ہوگئے۔ زخمیوں کو تربت ٹیچنگ اسپتال پہنچایا گیا جہاں انہیں طبی امداد دی گئی۔ علاوہ ازیں ضلع لسبیلہ کے علاقے گڈانی موڑ پر کوئٹہ سے کراچی جانے والی ایک مسافر بس پھسلن اور دھند کے باعث الٹ گئی۔ حادثے کی شکار بس کو بچاتے ہوئے پیچھے سے آنے والی مسافر بس بھی حادثے کا شکار ہوئی۔ دونوں حادثات میں دس سے زائد مسافر زخمی ہوگئے۔ اطلاع ملتے ہی پولیس اور کوسٹ گارڈ کا عملہ موقع پر پہنچا اور امدادی سرگرمیاں شروع کردیں۔ زخمیوں کو قریبی اسپتال پہنچایا گیا جبکہ بسوں کو کرین کے ذریعے ہٹاکر قومی شاہراہ پر آمدروفت بحال کردی گئی۔
